Scripture Library

Shatapatha Brahmana · Chapter 13.1.2

13.1.2.13.1.2.1

vyṛddhamu vā etadyajñasya yadayajuṣkeṇa kriyata imāmagṛbhṇanraśanāmṛtasyetyaśvābhidhānīmādatte yajuṣkṛtyai yajñasya samṛddhyai dvādaśāratnirbhavati dvādaśa māsāḥ saṃvatsaraḥ saṃvatsarameva yajñamāpnoti -

13.1.2.13.1.2.2

tadāhuḥ dvādaśāratnī raśanā kāryā३ trayodaśāratnī३ ityṛṣabho vā eṣa ṛtūnāṃ yatsaṃvatsarastasya trayodaśo māso viṣṭapamṛṣabha eṣa yajñānāṃ yadaśvamedho yathā vā ṛṣabhasya viṣṭapamevametasya viṣṭapaṃ trayodaśamaratniṃ raśanāyāmupādadhyāttadyatha ṛṣabhasya viṣṭapaṃ saṃskriyate tādṛktat -

13.1.2.13.1.2.3

abhidhā asīti tasmādaśvamedhayājī sarvā diśo'bhijayati bhuvanamasīti bhuvanaṃ tajjayati yantāsi dharteti yantāramevainaṃ dhartāraṃ karoti sa tvamagniṃ vaiśvānaramityagnimevainaṃ vaiśvānaraṃ gamayati saprathasaṃ gaccheti prajayaivainaṃ paśubhiḥ prathayati svāhākṛta iti vaṣaṭkāra evāsyaiṣa svagā tvā devebhya iti devebhya evainaṃ svagā karoti prajāpataya iti prājāpatyo'śvaḥ svayaivainaṃ devatayā samardhayati -

13.1.2.13.1.2.4

īśvaro vā eṣaḥ ārtimārtoryo brahmaṇe devebhyo'pratiprocyāśvaṃ badhnāti brahmannaśvaṃ bhantsyāmi devebhyaḥ prajāpataye tena rādhyāsamiti brahmāṇamāmantrayate brahmaṇa evainaṃ pratiprocya badhnāti nārtimārcchati taṃ badhāna devebhyaḥ prajāpataye tena rādhnuhīti brahmā prasauti svayaivainaṃ devatayā samardhayatyatha prokṣatyasāveva bandhuḥ -

13.1.2.13.1.2.5

sa prokṣati prajāpataye tvā juṣṭaṃ prokṣāmīti prajāpatirvai devānāṃ vīryavattamo vīryamevāsmindadhāti tasmādaśvaḥ paśūnāṃ vīryavattamaḥ -

13.1.2.13.1.2.6

indrāgnibhyāṃ tvā juṣṭaṃ prokṣāmīti indrāgnī vai devānāmojasvitamā oja evāsmindadhāti tasmādaśvaḥ paśūnāmojasvitamaḥ -

13.1.2.13.1.2.7

vāyave tvā juṣṭaṃ prokṣāmīti vāyurvai devānāmāśiṣṭho javamevāsmindadhāti tasmādaśvaḥ paśūnāmāśiṣṭhaḥ -

13.1.2.13.1.2.8

viśvebhyastvā devebhyo juṣṭaṃ prokṣāmīti viśve vai devā devānāṃ yaśasvitamā yaśa evāsmindadhāti tasmādaśvaḥ paśūnāṃ yaśasvitamaḥ sarvebhyastvā devebhyo juṣṭaṃ prokṣāmīti -

13.1.2.13.1.2.9

tadāhuḥ yatprājāpatyo'śvo'tha kathāpyanyābhyo devatābhyaḥ prokṣatīti sarvā vai devatā aśvamedhe'nvāyattā yadāha sarvebhyastvā devebhyaḥ prokṣāmīti sarvā evāsmindevatā anvāyātayati tasmādaśvamedhe sarvā devatā anvāyattāḥ pāpmā vā etambhrātṛvya īpsati yo'śvamedhena yajeta vajro'śvaḥ paro martaḥ paraḥ śveti śvānaṃ caturakṣaṃ hatvā'dhaspadamaśvasyopaplāvayati vajreṇaivainamavakrāmati nainampāpmā bhrātṛvya āpnoti -

Original text: śatapathabrāhmaṇam · Sanskrit Wikisource contributors · Sanskrit Wikisource · CC BY-SA 4.0