Shatapatha Brahmana · Chapter 12.9.3

१२.९.३
duṣṭarīturha pauṃsāyano daśapuruṣaṃ rājyādaparuddha āsa/ revottarasam u ha pāṭavaṃ cākraṃ sthapatiṃ sṛṃjayā aparurudhuḥ

sa hovāca duṣṭarītuṃ pauṃsyāyanam/ sautrāmaṇyā tvā yājayāni/ yadidaṃ sṛṃjayeṣu rāṣṭram/ tat tvayi dhāsyāmīti/ tatheti/ tayainamayājayat

tadu ha balhikaḥ prātipīyaḥ śuśrāva kauravyo rājā/ yo ha vā ayaṃ duṣṭarītuḥ pauṃsāyano daśapuruṣaṃ rājyādaparuddho'bhūt/ tamayaṃ cākraḥ sthapatiḥ sautrāmaṇyā yājayiṣyati/ yadidaṃ sṛñjayeṣu rāṣṭram/ taddhāsmin dhāsyatīti

sa hovāca/ tannvā ahaṃ taṃ vediṣyāmi/ yadi sa tasmin rāṣṭraṃ dhāsyati/ bahirdhā vainaṃ rāṣṭrāt dhāsyatīti/ sa ājagāma/ yasyāṃ velāyāṃ grahā gṛhyante

sa hovāca/ sthapate cākra nāhavanīye surā hotavyetyāhuḥ/ nānyatrāhavanīyāt/ yadyāhavanīye surāṃ hoṣyasi/ pāpavasyasaṃ kariṣyasi/ jāmi yajñasya/ yadyanyatrāhavanīyāt/ bahirdhainaṃ rāṣṭrāt dhāsyasi/ nainaṃ rāṣṭre dhāsyasi/ nāsmin rāṣṭraṃ dhāsyasīti

sa hovāca/ nāhavanīye surāṃ hoṣyāmi/ nānyatrāhavanīyāt/ na pāpavasyasaṃ kariṣyāmi/ na jāmi yajñasya/ nainaṃ bahirddhā rāṣṭrāt dhāsyāmi/ rāṣṭra enaṃ dhāsyāmi/ rāṣṭramasmin dhāsyāmīti

sa hovāca/ kathaṃ hi kariṣyasī३ iti/sa haitaduvāca/ asureṣu vā eṣo'gre yajña āsīt sautrāmaṇī/ sa devānupaprait/ so'pa āgacchat/ tamāpaḥ pratyanaṃdan/ tasmāt u śreyāṃsamāgataṃ pratyeva naṃdaṃti/ taṃ hocuḥ/ ehyeva bhagava iti

sa hovāca/ bibhemi vai/ praṇayata meti/ kasmāt bhagavo bibheṣīti/ asurebhya iti/ tatheti/ tamāpaḥ prāṇayan/ tasmāt yo vadhatro bhavati/ sa bibhyataṃ praṇayati/ yadāpaḥ prāṇayan/ tasmādāpaḥ praṇītāḥ/ tat praṇītānāṃ praṇītātvam/ prati ha tiṣṭhati/ ya evametat praṇītānāṃ praṇītātvaṃ veda

tadiṣṭāḥ prayājā āsuḥ/ aparyagnikṛtam/ athāsurā anvājagmuḥ/ te devāḥ paryagninaivāsurān sapatnān bhrātṛvyān yajñādaṃtarāyan/ tatho evaiṣa etat paryagninaiva dviṣantaṃ bhrātṛvyaṃ yajñādaṃtareti

devayonirvā eṣaḥ/ yadāhavanīyaḥ/ tasyaitāvamṛtapakṣau/ yāvetāvabhito'gnī/ tat yadāhavanīye yajñaṃ tanvate/ devayonāvevaitaddevebhyo yajñaṃ tanvate/ upa hainaṃ punaryajño namati/ nāsmāt yajño vyavacchidyate/ ya evametadveda/ yasya vaivaṃ viduṣa etat karma kriyate

uttare'gnau payograhān juhvati/ uttare'gnau paśūn śrapayaṃti/ paśūneva tanmartyān sato'mṛtayonau dadhāti/ martyān sato'mṛtayoneḥ prajanayati/ apa ha vai paśūnāṃ punarmṛtyuṃ jayati/ nāsmāt yajño vyavacchidyate/ ya evametadveda/ yasya vaivaṃ viduṣa etat karma kriyate

dakṣiṇe'gnau surāgrahān juhvati/ dakṣiṇe'gnau pāvayaṃti pavitrābhistriṣaṃyuktābhiḥ/ pitṝneva tanmartyān sato'mṛtayonau dadhāti/ martyān sato'mṛtayoneḥ prajanayati/apa ha vai pitṝṇāṃ punarmṛtyuṃ jayati/ nāsmāt yajño vyavacchidyate/ ya evametadveda/ yasya vaivaṃ viduṣa etat karma kriyate

tadyadetāvagnī āhavanīyāt vihriyete/ tenāhavanīyau/ atha yadāhavanīyaṃ punarnāśnuvāte/ tenānāhavanīyau/ tenobhau homā upāpnoti/ yaścāhavanīye/ yaścānāhavanīye/ yacca hutam/ yaccāhutam/ punarhāyamitvovāca/ na tadasti yat sṛṃjayānāṃ rāṣṭram/ duṣṭarītostat/ adya tathā'yaṃ cākrasthapatiryajñe'kariti

uttare'gnau paśubhiḥ puroḍāśaiḥ payograhairiti caranti/ yadu cānyat/ tena devāneva taddevaloke prīṇāti/ ta enaṃ prītāḥ prīṇanti/ atho devalokameva jayati

sa vā eṣa ātmaiva/ yatsautrāmaṇī/ tasmāt sā niruktā/ nirukto hyātmā/
loko vayodhāḥ/ tasmāt so'niruktaḥ/ anirukto hi lokaḥ/ ātmā vai yajñasya yatsautrāmaṇī/ bāhū aindraśca vayodhāśca/ tadyadetāvabhitaḥ paśū bhavataḥ/ tasmādimāvātmānamabhito bāhū/ yathā u vai paśuḥ/ evaṃ yūpaḥ/tadyadetaṃ sautrāmaṇikaṃ yūpametau yūpāvabhito bhavataḥ/ tasmādimāvātmānamabhito bāhū