Shatapatha Brahmana · Chapter 12.9.2

१२.९.२ atha sautrāmaṇyāmavabhṛthaḥ
avabhṛthamiṣṭavā yanti/ avabhṛthaṃ vai someneṣṭvā yanti/ soma eṣaḥ/ yatsautrāmaṇī

yaddevā devaheḍanam iti/ devakṛtādevainamenaso muṃcati/ yadi divā yadi naktam iti/ yadevāhorātrābhyāmenaḥ karoti/ tasmādevainaṃ muṃcati/ yadi jāgrat yadi svapne iti/ manuṣyā vai jāgaritam/ pitaraḥ suptam/ manuṣyakilbiṣāccaivainaṃ pitṛkilbiṣācca muṃcati॰

yadgrāme yadaraṇye iti/ grāme vā hyaraṇye vainaḥ kriyate/ tasmādevainaṃ muṃcati/ yat sabhāyām iti/ sabhyādevainamenaso muṃcati/ yadindriye iti/ daivādevainamenaso muṃcati/ yat śūdre yadarye yadenaścakṛmā vayaṃ yadekasyādhi dharmaṇi tasyāvayajanamasi iti/ sarvasmādevainametasmādenaso muṃcati

yadāpo aghnyā iti varuṇeti śapāmahe tato varuṇa no muṃca iti/ varuṇyādevainamenaso muṃcati/ avabhṛthanicuṃpuṇa nicerurasi nicuṃpuṇaḥ iti/ yo ha vā ayamapāmāvartaḥ/ sa hāvabhṛthaḥ/ sa haiṣa varuṇasya putro vā bhrātā vā/ tamevaitat stauti/ avadevairdevakṛtameno'yakṣi iti/ devakṛtamevaino'vayajate/ ava martyairmartyakṛtam iti/ martyakṛtamevaino'vayajate/ pururāvṇo deva riṣaspāhi iti/ sarvābhyo mā''rtibhyo gopāyetyevaitadāha

samudre te hṛdayamapsvaṃtaḥ iti/ āpo vai samudraḥ/ raso vā āpaḥ/ tadenametena rasena saṃsṛjati/ saṃ tvā viśaṃtvoṣadhīrutāpaḥ iti tadenametena ubhayena rasena saṃsṛjati/ yaśca oṣadhiṣu yaścāpsu/ dvau vikramā udaṅutkrāmati/ etāvatī vai manuṣye jūtiḥ/ yāvān vikramaḥ/ tat yāvatyevāsmin jūtiḥ/ tayaiva pāpmānaṃ vijahāti

sumitriyā na āpa oṣadhayaḥ santu iti aṃjalinā apa upācati/ vajro vā āpaḥ/ vajreṇaivaitanmitradheyaṃ kurute/ durmitriyāstasmai santu yo'smān dveṣṭi yaṃ ca vayaṃ dviṣmaḥ iti yāmasya diśaṃ dveṣyaḥ syāt, tāṃ diśaṃ parāsiṃcet/ tenaiva taṃ parābhāvayati

drupadādiva mumucānaḥ svinnaḥ snāto malādiva/ pūtaṃ pavitreṇevājyamāpaḥ śundhantu mainasaḥ iti vāso'paplāvayati/ yatheṣīkāṃ muṃjāt vivṛhet/ evamenaṃ sarvasmāt pāpmano vivṛhati/ snāti/ tama evāpahate

udvayaṃ tamasaspari iti/ pāpmā vai tamaḥ/ pāpmānameva tamo'pahate/ svaḥ paśyanta uttaram iti/ ayaṃ vai loko'dbhya uttaraḥ/ asminneva loke pratitiṣṭhati/ devaṃ devatrā sūryamaganma jyotiruttamam iti/ svargo vai lokaḥ sūryo jyotiruttamam/ svarga eva loke'ntataḥ pratitiṣṭhati/ anapekṣametya āhavanīyamupatiṣṭhate

apo adyānvacāriṣam iti/ apāmeva rasamavarunddhe/ rasena samasṛkṣmahi iti/ apāmeva rasamātman dhatte/ payasvānagna āgamaṃ taṃ mā saṃsṛja varcasā prajayā ca dhanena ca iti/ āśiṣamevaitadāśāste

edho'syedhiṣīmahi iti samidhamādatte/ edho ha vā agneḥ samit/ samidasi tejo'si tejo mayi dhehi iti/ āhavanīye samidhamabhyādadhāti/ agnimevaitayā samindhe/ sa enaṃ samiddhastejasā saminddhe

ādityaṃ caruṃ yakṣyamāṇo nirvapati/ ādityamījānaḥ/ iyaṃ vā aditiḥ/ asyāmeva yajñaṃ tanute/ asyāmiṣṭvā pratitiṣṭhati/ dhenurdakṣiṇā/ iyaṃ vai dhenuḥ/ imāmeva sarvān kāmān duhe/ vatsaṃ pūrvasyāṃ dadhāti/ mātaramuttarasyām/ yadā vai vatso mātaraṃ dhayati/ atha sā prattā duhe/ prattāmevaimāṃ sarvān kāmān duhe

tadāhuḥ/ preva vā eṣo'smāt lokāt cyavate/ yo'po'vabhṛthamabhyavaitīti/ avabhṛthādudetya maitrāvaruṇyā payasyayā yajate/ ayaṃ vai loko mitraḥ/ asau varuṇaḥ/ yadevedamantareṇa/ tatpayasyā/ tat yat maitrāvaruṇyā payasyayā yajate/ eṣvevaitallokeṣu pratitiṣṭhati/ prāṇo vai mitraḥ/ apāno varuṇaḥ/ annameva payasyā/ tadyat maitrāvaruṇyā payasyayā yajate/ prāṇa evānnādye'ntataḥ pratitiṣṭhati