શતપથબ્રાહ્મણમ્ · અધ્યાય 12.9.2

૧૨.૯.૨ અથ સૌત્રામણ્યામવભૃથઃ
અવભૃથમિષ્ટવા યન્તિ। અવભૃથં વૈ સોમેનેષ્ટ્વા યન્તિ। સોમ એષઃ। યત્સૌત્રામણી

યદ્દેવા દેવહેડનમ્ ઇતિ। દેવકૃતાદેવૈનમેનસો મુંચતિ। યદિ દિવા યદિ નક્તમ્ ઇતિ। યદેવાહોરાત્રાભ્યામેનઃ કરોતિ। તસ્માદેવૈનં મુંચતિ। યદિ જાગ્રત્ યદિ સ્વપ્ને ઇતિ। મનુષ્યા વૈ જાગરિતમ્। પિતરઃ સુપ્તમ્। મનુષ્યકિલ્બિષાચ્ચૈવૈનં પિતૃકિલ્બિષાચ્ચ મુંચતિ॰

યદ્ગ્રામે યદરણ્યે ઇતિ। ગ્રામે વા હ્યરણ્યે વૈનઃ ક્રિયતે। તસ્માદેવૈનં મુંચતિ। યત્ સભાયામ્ ઇતિ। સભ્યાદેવૈનમેનસો મુંચતિ। યદિન્દ્રિયે ઇતિ। દૈવાદેવૈનમેનસો મુંચતિ। યત્ શૂદ્રે યદર્યે યદેનશ્ચકૃમા વયં યદેકસ્યાધિ ધર્મણિ તસ્યાવયજનમસિ ઇતિ। સર્વસ્માદેવૈનમેતસ્માદેનસો મુંચતિ

યદાપો અઘ્ન્યા ઇતિ વરુણેતિ શપામહે તતો વરુણ નો મુંચ ઇતિ। વરુણ્યાદેવૈનમેનસો મુંચતિ। અવભૃથનિચુંપુણ નિચેરુરસિ નિચુંપુણઃ ઇતિ। યો હ વા અયમપામાવર્તઃ। સ હાવભૃથઃ। સ હૈષ વરુણસ્ય પુત્રો વા ભ્રાતા વા। તમેવૈતત્ સ્તૌતિ। અવદેવૈર્દેવકૃતમેનોઽયક્ષિ ઇતિ। દેવકૃતમેવૈનોઽવયજતે। અવ મર્ત્યૈર્મર્ત્યકૃતમ્ ઇતિ। મર્ત્યકૃતમેવૈનોઽવયજતે। પુરુરાવ્ણો દેવ રિષસ્પાહિ ઇતિ। સર્વાભ્યો માઽઽર્તિભ્યો ગોપાયેત્યેવૈતદાહ

સમુદ્રે તે હૃદયમપ્સ્વંતઃ ઇતિ। આપો વૈ સમુદ્રઃ। રસો વા આપઃ। તદેનમેતેન રસેન સંસૃજતિ। સં ત્વા વિશંત્વોષધીરુતાપઃ ઇતિ તદેનમેતેન ઉભયેન રસેન સંસૃજતિ। યશ્ચ ઓષધિષુ યશ્ચાપ્સુ। દ્વૌ વિક્રમા ઉદઙુત્ક્રામતિ। એતાવતી વૈ મનુષ્યે જૂતિઃ। યાવાન્ વિક્રમઃ। તત્ યાવત્યેવાસ્મિન્ જૂતિઃ। તયૈવ પાપ્માનં વિજહાતિ

સુમિત્રિયા ન આપ ઓષધયઃ સન્તુ ઇતિ અંજલિના અપ ઉપાચતિ। વજ્રો વા આપઃ। વજ્રેણૈવૈતન્મિત્રધેયં કુરુતે। દુર્મિત્રિયાસ્તસ્મૈ સન્તુ યોઽસ્માન્ દ્વેષ્ટિ યં ચ વયં દ્વિષ્મઃ ઇતિ યામસ્ય દિશં દ્વેષ્યઃ સ્યાત્, તાં દિશં પરાસિંચેત્। તેનૈવ તં પરાભાવયતિ

દ્રુપદાદિવ મુમુચાનઃ સ્વિન્નઃ સ્નાતો મલાદિવ। પૂતં પવિત્રેણેવાજ્યમાપઃ શુન્ધન્તુ મૈનસઃ ઇતિ વાસોઽપપ્લાવયતિ। યથેષીકાં મુંજાત્ વિવૃહેત્। એવમેનં સર્વસ્માત્ પાપ્મનો વિવૃહતિ। સ્નાતિ। તમ એવાપહતે

ઉદ્વયં તમસસ્પરિ ઇતિ। પાપ્મા વૈ તમઃ। પાપ્માનમેવ તમોઽપહતે। સ્વઃ પશ્યન્ત ઉત્તરમ્ ઇતિ। અયં વૈ લોકોઽદ્ભ્ય ઉત્તરઃ। અસ્મિન્નેવ લોકે પ્રતિતિષ્ઠતિ। દેવં દેવત્રા સૂર્યમગન્મ જ્યોતિરુત્તમમ્ ઇતિ। સ્વર્ગો વૈ લોકઃ સૂર્યો જ્યોતિરુત્તમમ્। સ્વર્ગ એવ લોકેઽન્તતઃ પ્રતિતિષ્ઠતિ। અનપેક્ષમેત્ય આહવનીયમુપતિષ્ઠતે

અપો અદ્યાન્વચારિષમ્ ઇતિ। અપામેવ રસમવરુન્દ્ધે। રસેન સમસૃક્ષ્મહિ ઇતિ। અપામેવ રસમાત્મન્ ધત્તે। પયસ્વાનગ્ન આગમં તં મા સંસૃજ વર્ચસા પ્રજયા ચ ધનેન ચ ઇતિ। આશિષમેવૈતદાશાસ્તે

એધોઽસ્યેધિષીમહિ ઇતિ સમિધમાદત્તે। એધો હ વા અગ્નેઃ સમિત્। સમિદસિ તેજોઽસિ તેજો મયિ ધેહિ ઇતિ। આહવનીયે સમિધમભ્યાદધાતિ। અગ્નિમેવૈતયા સમિન્ધે। સ એનં સમિદ્ધસ્તેજસા સમિન્દ્ધે

આદિત્યં ચરું યક્ષ્યમાણો નિર્વપતિ। આદિત્યમીજાનઃ। ઇયં વા અદિતિઃ। અસ્યામેવ યજ્ઞં તનુતે। અસ્યામિષ્ટ્વા પ્રતિતિષ્ઠતિ। ધેનુર્દક્ષિણા। ઇયં વૈ ધેનુઃ। ઇમામેવ સર્વાન્ કામાન્ દુહે। વત્સં પૂર્વસ્યાં દધાતિ। માતરમુત્તરસ્યામ્। યદા વૈ વત્સો માતરં ધયતિ। અથ સા પ્રત્તા દુહે। પ્રત્તામેવૈમાં સર્વાન્ કામાન્ દુહે

તદાહુઃ। પ્રેવ વા એષોઽસ્માત્ લોકાત્ ચ્યવતે। યોઽપોઽવભૃથમભ્યવૈતીતિ। અવભૃથાદુદેત્ય મૈત્રાવરુણ્યા પયસ્યયા યજતે। અયં વૈ લોકો મિત્રઃ। અસૌ વરુણઃ। યદેવેદમન્તરેણ। તત્પયસ્યા। તત્ યત્ મૈત્રાવરુણ્યા પયસ્યયા યજતે। એષ્વેવૈતલ્લોકેષુ પ્રતિતિષ્ઠતિ। પ્રાણો વૈ મિત્રઃ। અપાનો વરુણઃ। અન્નમેવ પયસ્યા। તદ્યત્ મૈત્રાવરુણ્યા પયસ્યયા યજતે। પ્રાણ એવાન્નાદ્યેઽન્તતઃ પ્રતિતિષ્ઠતિ