Shatapatha Brahmana · Chapter 12.7.2

१२.७.२
apa vā etasmātteja iṃdriyaṃ vīryaṃ krāmati/ yaṃ somo'tipavate – ūrdhvaṃ vā, avāṃcaṃ vā

tadāhuḥ – annaṃ vā etad brāhmaṇasya – yatsomaḥ/ na vai somena brāhmaṇaḥ somavāmī saḥ/ yo vā alaṃ bhūtyai sambhūtiṃ na prāpnoti/ yo vā'laṃ paśubhyaḥ sanpaśūnna viṃdate/ sa somavāmī/ paśavo hi soma iti

(१)sa etamāśvinaṃ dhūmramālabheta/(२)sārasvataṃ meṣam/(३)aindramṛṣabham/ aśvinau vai devānāṃ bhiṣajau/ tābhyāmevainaṃ bhiṣajyati/ sarasvatī bheṣajam/ tayaivāsmin bheṣajaṃ karoti/ iṃdra iṃdriyaṃ vīryam/ tenaivāsminnindriyaṃ vīryaṃ dadhāti

cakṣurvā aśvinau tejaḥ/ yadāśvino bhavati/ cakṣurevāsmiṃstattejo dadhāti, atho śrotram/ samānaṃ hi cakṣuśca śrotraṃ ca

prāṇaḥ sarasvatī vīryam/ yatsārasvato bhavati/ prāṇamevāsmiṃstadvīryaṃ dadhāti, atho apānam/ samānaṃ hi prāṇaścāpānaśca

vāgindro balam/ yadaiṃdro bhavati/ vācamevāsmiṃtadbalaṃ dadhāti, atho manaḥ/ samānaṃ hi vāk ca manaśca

āśvinīrajāḥ sārasvatīravīraiṃdrīrgāva ityāhuḥ/ yadete paśava ālabhyaṃte/ etābhireva devatābhiretānpaśūnavarundhe

(४)vaḍavā'nuśiśurbhavati/ yaśa evaikaśaphamavaruṃdhe/ āraṇyānāṃ paśūnāṃ lomāni bhavaṃti/ āraṇyānāṃ paśūnāmavaruddhyai/(५) vṛkalomāni bhavaṃti/ oja eva jūtimāraṇyānāṃ paśūnāmavaruṃdhe/ (६) vyāghralomāni bhavaṃti/ manyumeva rājyamāraṇyānāṃ paśūnāmavaruṃdhe/ (७) siṃhalomāni bhavaṃti/ saha eveśāmāraṇyānāṃ paśūnāmavarundhe

(८) vrīhayaśca (९) śyāmākāśca bhavanti/ (१०)godhūmāśca (११) kuvalāni ca / (१२) upavākāśca (१३)badarāṇi ca/ (१४) yavāśca (१५)karkkandhūni ca/ (१६) śaṣpāṇi ca (१७) tokmāni ca/ ubhayameva grāmyaṃ cānnamāraṇyaṃ cāvarundhe/ atho ubhayenaivānnena yathā rūpamindriyaṃ vīryamātmandhatte

(१८) sīsena śaṣpāṇi krīṇāti/ (१९) ūrṇābhistokmāni/ (२०) sūtrairvrīhīn/ ubhayorvā etadrūpam/ ayasaśca hiraṇyasya ca/ yatsīsam/ ubhayaṃ sautrāmaṇī/ iṣṭiśca paśubandhaśca/ ubhayasyāvaruddhyai

(२१) ūrṇāsūtreṇa krīṇāti/ tadvā etat strīṇāṃ karma, yadūrṇāsūtram/ karma vā indriyaṃ vīryam/ tadetadutsannaṃ strīṣu/ tadyadevendriyaṃ vīryamutsannaṃ strīṣu tadevāvarundhe

taddhaitat anye'dhvaryavaḥ – sīsena klībācchaṣpāṇi krīṇaṃti/ tattaditi/ na vā eṣa strī,na pumān/ yat klībaḥ/ neṣṭirna paśubaṃdhaḥ sautrāmaṇīti vadaṃtaḥ/ tadu tathā na kuryāt/ ubhayaṃ vai sautrāmaṇī/ iṣṭiśca paśubaṃdhaśca/ vyṛddhamu vā etanmanuṣyeṣu/ yat klībaḥ/ yajñamukha eva te yajñasya vyṛddhiṃ dadhati/ ye tathā kurvanti/ somavikrayiṇa eva krīṇīyāt/ somo vai sautrāmaṇī yajñamukha eva tatsomarūpaṃ karoti/ yajñasya samṛddhyai

(२२) śatātṛṇṇā kuṃbhī bhavati/ bahudheva sa vyasravat/ atho śatonmāno vai yajño yajñamevāvaruṃdhe/ (२३) sataṃ bhavati/ sadevāvaruṃdhe/ (२४) cappaṃ bhavati/ annādyasyaivāvaruddhyai/ (२५) pavitraṃ bhavati/ punaṃti hyenam/ (२६) vālo bhavati/ pāpmano vyāvṛttyai/ (२७) suvarṇaṃ (२८) hiraṇyaṃ bhavati/ rūpasyaivāvaruddhyai/ (२९) śatamānaṃ bhavati/ śatāyurvai puruṣaḥ śateṃdriyaḥ/ āyurevendriyaṃ vīryamātmandhatte

(३०) āśvatthaṃ pātraṃ bhavati/ apacitimevāvaruṃdhe/ (३१) auduṃbaraṃ bhavati/ ūrjamevāvaruṃdhe/ (३२) naiyagrodhaṃ bhavati/ svadhāmevāvaruṃdhe/ (३३) sthālyo bhavaṃti/ pṛthivyā evānnādyamavaruṃdhe

(३४) pālāśānyupaśayāni bhavaṃti/ brahma vai palāśaḥ/ brahmaṇaiva svargaṃ lokaṃ jayati/ apāṣṭhihasya (३५,३६) patre bhavataḥ/ tviṣimeva rājyaṃ vayasāmavaruṃdhe/ ṣaṭtriṃśadetāni bhavaṃti/ ṣaṭtriṃśadakṣarā vai bṛhatī/ bārhatāḥ paśavaḥ/ bṛhatyaivāsmai paśūnavaruṃdhe

tadāhuḥ – anyadevatyāḥ paśavo bhavaṃti/ anyadevatyā- puroḍāśāḥ/ vilomaitatkriyate/ kathametatsaloma bhavatīti/ aiṃdraḥ paśūnāmuttamo bhavati/ aiṃdraḥ puroḍāśānāṃ prathamaḥ/ iṃdriyaṃ vai vīryam iṃdraḥ/ iṃdriyeṇaivāsmā iṃdriyaṃ vīryaṃ saṃdadhāti/ iṃdriyeṇeṃdriyaṃ vīryamavaruṃdhe

sāvitraḥ puroḍāśo bhavati/ savitṛprasūtatāyai/ vāruṇo bhavati/ varuṇo vā etaṃ gṛhṇāti/ yaḥ pāpmanā gṛhīto bhavati/ varuṇenaivainaṃ varuṇyānmuṃcati/ aṃtyo bhavati/ aṃtata evainaṃ varuṇapāśātpramuṃcati

ekādaśakapāla aiṃdro bhavati/ ekādaśākṣarā vai triṣṭup/ iṃdriyamu vai vīryaṃ triṣṭup/ indriyasyaiva vīryasyāvaruddhyai

dvādaśakapālaḥ sāvitro bhavati/ dvādaśa vai māsāḥ saṃvatsarasya/ saṃvatsaraṃ vā annādyamanvāyattam/ saṃvatsarādevāsmā annādyamavaruṃdhe

daśakapālo vāruṇo bhavati/ daśākṣarā vai virāṭ/ annaṃ virāṭ/ varuṇo'nnapatiḥ/ varuṇenaivāsmā annamavarundhe/ madhyata etaiḥ puroḍāśaiḥ pracarati/ madhyaṃ vā eteṣāṃ yoniḥ/ svādevainān yoneḥ prajanayati

vaḍavā'nuśiśurdakṣiṇā bhavati/ ubhayaṃ vā eṣā janayati/ aśvaṃ cāśvataraṃ ca/ ubhayaṃ sautrāmaṇī/ iṣṭiśca paśubandhaśca/ ubhayasyaivāvaruddhyai