Shatapatha Brahmana · Chapter 12.7.1

१२.७.१
atha sautrāmaṇī yāgaḥ/
viśvarūpaṃ vai tvāṣṭramindro'han/ taṃ tvaṣṭā hataputro'bhyacarat/ so'bhicaraṇīyamapendraṃ somamāharat/ tasyendro yajñaveśasaṃ kṛtvā prāsahā somamapibat/ sa viṣvaṅvyārcchat/ tasyendriyaṃ vīryamaṅgādaṅgādasravat

tasyākṣibhyāmeva tejo'sravat, so'jaḥ paśurabhavaddhūmraḥ/ atha yatpakṣmabhyaste godhūmāḥ/ yadaśrubhyastatkuvalam

nāsikābhyāmevāsya vīryamasravat, so'viḥ paśurabhavanmeṣaḥ/ atha yat śleṣmaṇastā upavākāḥ/ yat snīhā tadbadaram

mukhādevāsya balamasravat, sa gauḥ paśurabhavadṛṣabhaḥ/ atha ye phenāste yavāḥ/ yat snehaḥ tatkarkandhu

śrotrādevāsya yaśo'sravat, tadekaśaphamabhavat, aśvo'śvataro garddabhaḥ

stanābhyāmevāsya śukramasravat, tatpayo'bhavat, paśūnāṃ jyotiḥ/ urasa evāsya hṛdayāttviṣirasravat, sa śyeno'pāṣṭhihā'bhavat, vayasāṃ rājā

nābhyā evāsya śūṣo'sravat, tatsīsamabhavat, nāyaḥ, na hiraṇyam/ retasa evāsya rūpamasravat, tat suvarṇaṃ hiraṇyamabhavat/ śiśnādevāsya raso'sravat, sā parisrudabhavat/ sphigībhyāmevāsya bhāmo'sravat, sā surā'bhavat, annasya rasaḥ

mūtrādevāsyaujo'sravat, sa vṛko'bhavat, āraṇyānāṃ paśūnāṃ jūtiḥ/ ūvadhyādevāsya manyurasravat, sa vyāghro'bhavat, āraṇyānāṃ paśūnāṃ rājā/ lohitādevāsya saho'sravat, sa siṃho'bhavat, āraṇyānāṃ paśūnāmīśaḥ

lomabhya evāsya cittamasravat, te śyāmākā abhavan/ tvaca evāsyāpacitirasravat, so 'śvattho vanaspatirabhavat/ māṃsebhya evāsyorgasravat, sa uduṃbaro'bhavat/ asthibhya evāsya svadhā'sravat, sa nyagrodho'bhavat/ majjabhya evāsya bhakṣaḥ somapītho'sravat, te vrīhayo'bhavan/ evamasyendriyāṇi vīryāṇi vyudakrāman

atha ha vai tarhi namucinaivāsureṇa saha cacāra/ sa aikṣata namuciḥ, apunarvā ayamabhūt/ haṃta asyendriyaṃ vīryaṃ somapīthamannādyaṃ harāṇīti/ tasyaitayaiva surayendriyaṃ vīryaṃ somapīthamannādyamaharat/ sa ha nyarṇaḥ śiśye/ taṃ devā upasaṃjagmire/ śreṣṭho vai no'yamabhūt/ tamimaṃ pāpmā'vidat/ hanta imaṃ bhiṣajyāmeti

te'śvināvabruvan/ yuvaṃ vai brahmāṇau bhiṣajau sthaḥ/ yuvamimaṃ bhiṣajyatamiti/ tāvabrūtām/ astu nau bhāga iti/ te'bruvan/ ya eṣo'jaḥ, sa vāṃ bhāga iti/ tatheti/ tasmādāśvino dhūmro bhavati

te sarasvatīmabruvan/ tvaṃ vai bhaiṣajyamasi/ tvamimaṃ bhiṣajyeti/ sā'bravīt/ astu me bhāga iti/ te'bruvan/ ya eṣo'viḥ, sa te bhāga iti/ tatheti/ tasmātsārasvato meṣo bhavati

athābruvan/ etāvadvā asmin etarhi/ yāvat ayamṛṣabhaḥ/ asyaivāyamastviti/ tatheti/ tasmādaindra ṛṣabho bhavati

tāvaśvinau ca sarasvatī ca iṃdriyaṃ vīryaṃ namucerāhṛtya tadasminpunaradadhuḥ/ taṃ pāpmano'trāyaṃta/ sutrātaṃ batainaṃ pāpmano'trāsmahīti/ tadvāva sautrāmaṇyabhavat/ tatsautrāmaṇyai sautrāmaṇītvam/ trāyate mṛtyorātmānam/ apa pāpmānaṃ hate/ ya evametatsautrāmaṇyai sautrāmaṇītvaṃ veda/ trayastriṃśaddakṣiṇā bhavaṃti/ trayastriṃśaddhi taṃ devatā abhiṣajyan/ tasmādāhuḥ/ bheṣajaṃ dakṣiṇā iti