Shatapatha Brahmana · Chapter 12.5.1

१२.५.१
tadāhuḥ – yadeva dīrghasattryagnihotraṃ juhvat pravasan mriyeta/ jahuyurasmā ३ i/ nā ३ iti/ taddhaike hotavyaṃ manyante/ āgantoriti/ tadu tathā na kuryāt/ atasthāno vā eṣa tasmai/ yadenaṃ śavadahyāyā iva juhuyuḥ/ yajñāya vā eṣa āhutibhyastasthānaḥ/ sa hainamamṛṣyamāṇastṛpraṃ sacate

atha haika āhuḥ/ evamevānvāhitā ahūyamānanāḥ śayīranniti/ tadu tathā na kuryāt/ atasthāno vā eṣa tasmai/ yadenaṃ śavadahyāyā ivendhīran/ yajñāya vā eṣa āhutibhyastasthānaḥ/ sa hainamamṛṣyamāṇastṛpraṃ sacate

atha haike/ araṇyoragnī samārohya nidadhati tam/ āhṛte nirmanthanti/ tadu tathā na kuryāt/ atasthāno vā eṣa tasmai/ yadenaṃ śavadahyāyā iva nirmanyeyuḥ/ yajñāya vā eṣa āhutibhyastasthānaḥ/ sahainamamṛṣyamāṇastṛpraṃ sacate

itthameva kuryāt/ nivānyavatsāmeṣṭavai brūyāt/ tasyai payasā juhuyāt/ ārtaṃ vā etatpayaḥ/ yannivānyavatsāyāḥ/ ārtametadagnihotram/ yanmṛtasya tat/ ārtenaiva tadārttaṃ niṣkṛtya śreyān bhavati

tadapi upamā'sti/ yat dvau rathau mṛditau samāgacchetām/ syādevānyataraḥ syadayiti

tasya vā etasyāgnihotrasyopacāraḥ/ prācīnāvītī dohayati/ yajñopavītī vai devebhyo dohayati/ athaivaṃ pitṛṇām

nāṃgāreṣvadhiśrayati/ yaddhāṃgāreṣvadhiśrayet/ devatrā kuryāt/ gārhapatyāduṣṇaṃ bhasma dakṣiṇā niruhya/ tasminnenadadhiśrayati/ pitṛdevatyamevainat tatkaroti

nāvajyotayati/ nāpaḥ pratyānayati/ yaddhāvajyotayet, yadapaḥ pratyānayet/ devatrā kuryāt/ na triḥ pratiṣṭhāpaṃ harati/ yat triḥ pratiṣṭhāpaṃ haret/ devatrā kuryāt/ sakṛdeva nikarṣan harati/ pitṛdevatyamevainat tatkaroti

nonneṣyāmītyāha/ na caturunnayati/ yaddhonneṣyāmīti brūyāt/ yaccaturunnayet/ devatrā kuryāt/ sakṛdeva tūṣṇīṃ nyak paryasyati/ pitṛdevatyamevainat tatkaroti

nopariṣṭāt samidhamabhyasya harati/ yaddhopariṣṭāt samidhamabhyasya haret/ devatrā kuryāt/ adhastādupāsya harati/ pitṛdevatyamevainat tatkaroti

nottareṇa gārhapatyameti/ yaddhottareṇa gārhapatyamiyāt/ devatrā kuryāt/ dakṣiṇena gārhapatyameti/ pitṛdevatyamevainat tatkaroti

atha yānyamūnyudīcīnāgrāṇi tṛṇāṇi bhavanti dakṣiṇāgrāṇi tāni karoti/ pitṛdevatyamevainat tatkaroti/ nodiṃgayati/ nopamṛṣṭena prāśnāti/ nodukṣati/ pitṛdevatyamevainat tatkaroti

tadāhuḥ – yadeṣa dīrghasatryagnihotraṃ juhvat pravasan mriyeta/ kathamenamagnibhiḥkuryuriti/ taṃ haike'dagdhvā'' haranti/ tamāhṛtamagnibhiḥ saṃghrāpayanti/ tadu tathā na kuryāt/ yathā'nyasyāṃ yonau retaḥ siktam/ tadanyasyāṃ prajijanayiṣet/ tādṛktat/ asthīnyetānyāhṛtya/ kṛṣṇājine nyupya/ puruṣavidhiṃ vidhāya/ ūrṇābhiḥ pracchādya/ ājyenābhighārya/ tamagnibhiḥ samupoṣet/ tadenaṃ svādyoneḥ prajanayatīti

taṃ haike – grāmāgninā dahanti/ tadu tathā na kuryāt/ eṣa vai viśvāt kravyādagniḥ/ sa hainamīśvaraḥ saputraṃ sapaśuṃ samattoḥ

atha haike – pradavyena dahanti/ tadu tathā na kuryāt/ eṣa vā aśānto'gniḥ/ sa hainamīśvaraḥ saputraṃ sapaśuṃ pradagdhoḥ

atha haike – ulmukyena dahanti/ tadu tathā na kuryāt/ eṣa vai rudriyo'gniḥ/ sa hainamīśvaraḥ saputraṃ sapaśumabhimantoḥ

atha haike – antareṇāgnīṃścitiṃ citvā tamagnibhiḥ samupoṣanti/ etadvai yajamānasyāyatanam/ yadantareṇāgnīniti/ tadu tathā na kuryāt/ yo hainaṃ tatra brūyāt/ madhye nvā ayaṃ grāmasyāśasanamajījanata/ kṣipre'syāśasanaṃ janiṣyate/ priyatamaṃ rotsyatīti/ īśvaro ha tathaiva syāt