શતપથબ્રાહ્મણમ્ · અધ્યાય 12.5.1

૧૨.૫.૧
તદાહુઃ – યદેવ દીર્ઘસત્ત્ર્યગ્નિહોત્રં જુહ્વત્ પ્રવસન્ મ્રિયેત। જહુયુરસ્મા ૩ ઇ। ના ૩ ઇતિ। તદ્ધૈકે હોતવ્યં મન્યન્તે। આગન્તોરિતિ। તદુ તથા ન કુર્યાત્। અતસ્થાનો વા એષ તસ્મૈ। યદેનં શવદહ્યાયા ઇવ જુહુયુઃ। યજ્ઞાય વા એષ આહુતિભ્યસ્તસ્થાનઃ। સ હૈનમમૃષ્યમાણસ્તૃપ્રં સચતે

અથ હૈક આહુઃ। એવમેવાન્વાહિતા અહૂયમાનનાઃ શયીરન્નિતિ। તદુ તથા ન કુર્યાત્। અતસ્થાનો વા એષ તસ્મૈ। યદેનં શવદહ્યાયા ઇવેન્ધીરન્। યજ્ઞાય વા એષ આહુતિભ્યસ્તસ્થાનઃ। સ હૈનમમૃષ્યમાણસ્તૃપ્રં સચતે

અથ હૈકે। અરણ્યોરગ્ની સમારોહ્ય નિદધતિ તમ્। આહૃતે નિર્મન્થન્તિ। તદુ તથા ન કુર્યાત્। અતસ્થાનો વા એષ તસ્મૈ। યદેનં શવદહ્યાયા ઇવ નિર્મન્યેયુઃ। યજ્ઞાય વા એષ આહુતિભ્યસ્તસ્થાનઃ। સહૈનમમૃષ્યમાણસ્તૃપ્રં સચતે

ઇત્થમેવ કુર્યાત્। નિવાન્યવત્સામેષ્ટવૈ બ્રૂયાત્। તસ્યૈ પયસા જુહુયાત્। આર્તં વા એતત્પયઃ। યન્નિવાન્યવત્સાયાઃ। આર્તમેતદગ્નિહોત્રમ્। યન્મૃતસ્ય તત્। આર્તેનૈવ તદાર્ત્તં નિષ્કૃત્ય શ્રેયાન્ ભવતિ

તદપિ ઉપમાઽસ્તિ। યત્ દ્વૌ રથૌ મૃદિતૌ સમાગચ્છેતામ્। સ્યાદેવાન્યતરઃ સ્યદયિતિ

તસ્ય વા એતસ્યાગ્નિહોત્રસ્યોપચારઃ। પ્રાચીનાવીતી દોહયતિ। યજ્ઞોપવીતી વૈ દેવેભ્યો દોહયતિ। અથૈવં પિતૃણામ્

નાંગારેષ્વધિશ્રયતિ। યદ્ધાંગારેષ્વધિશ્રયેત્। દેવત્રા કુર્યાત્। ગાર્હપત્યાદુષ્ણં ભસ્મ દક્ષિણા નિરુહ્ય। તસ્મિન્નેનદધિશ્રયતિ। પિતૃદેવત્યમેવૈનત્ તત્કરોતિ

નાવજ્યોતયતિ। નાપઃ પ્રત્યાનયતિ। યદ્ધાવજ્યોતયેત્, યદપઃ પ્રત્યાનયેત્। દેવત્રા કુર્યાત્। ન ત્રિઃ પ્રતિષ્ઠાપં હરતિ। યત્ ત્રિઃ પ્રતિષ્ઠાપં હરેત્। દેવત્રા કુર્યાત્। સકૃદેવ નિકર્ષન્ હરતિ। પિતૃદેવત્યમેવૈનત્ તત્કરોતિ

નોન્નેષ્યામીત્યાહ। ન ચતુરુન્નયતિ। યદ્ધોન્નેષ્યામીતિ બ્રૂયાત્। યચ્ચતુરુન્નયેત્। દેવત્રા કુર્યાત્। સકૃદેવ તૂષ્ણીં ન્યક્ પર્યસ્યતિ। પિતૃદેવત્યમેવૈનત્ તત્કરોતિ

નોપરિષ્ટાત્ સમિધમભ્યસ્ય હરતિ। યદ્ધોપરિષ્ટાત્ સમિધમભ્યસ્ય હરેત્। દેવત્રા કુર્યાત્। અધસ્તાદુપાસ્ય હરતિ। પિતૃદેવત્યમેવૈનત્ તત્કરોતિ

નોત્તરેણ ગાર્હપત્યમેતિ। યદ્ધોત્તરેણ ગાર્હપત્યમિયાત્। દેવત્રા કુર્યાત્। દક્ષિણેન ગાર્હપત્યમેતિ। પિતૃદેવત્યમેવૈનત્ તત્કરોતિ

અથ યાન્યમૂન્યુદીચીનાગ્રાણિ તૃણાણિ ભવન્તિ દક્ષિણાગ્રાણિ તાનિ કરોતિ। પિતૃદેવત્યમેવૈનત્ તત્કરોતિ। નોદિંગયતિ। નોપમૃષ્ટેન પ્રાશ્નાતિ। નોદુક્ષતિ। પિતૃદેવત્યમેવૈનત્ તત્કરોતિ

તદાહુઃ – યદેષ દીર્ઘસત્ર્યગ્નિહોત્રં જુહ્વત્ પ્રવસન્ મ્રિયેત। કથમેનમગ્નિભિઃકુર્યુરિતિ। તં હૈકેઽદગ્ધ્વાઽઽ હરન્તિ। તમાહૃતમગ્નિભિઃ સંઘ્રાપયન્તિ। તદુ તથા ન કુર્યાત્। યથાઽન્યસ્યાં યોનૌ રેતઃ સિક્તમ્। તદન્યસ્યાં પ્રજિજનયિષેત્। તાદૃક્તત્। અસ્થીન્યેતાન્યાહૃત્ય। કૃષ્ણાજિને ન્યુપ્ય। પુરુષવિધિં વિધાય। ઊર્ણાભિઃ પ્રચ્છાદ્ય। આજ્યેનાભિઘાર્ય। તમગ્નિભિઃ સમુપોષેત્। તદેનં સ્વાદ્યોનેઃ પ્રજનયતીતિ

તં હૈકે – ગ્રામાગ્નિના દહન્તિ। તદુ તથા ન કુર્યાત્। એષ વૈ વિશ્વાત્ ક્રવ્યાદગ્નિઃ। સ હૈનમીશ્વરઃ સપુત્રં સપશું સમત્તોઃ

અથ હૈકે – પ્રદવ્યેન દહન્તિ। તદુ તથા ન કુર્યાત્। એષ વા અશાન્તોઽગ્નિઃ। સ હૈનમીશ્વરઃ સપુત્રં સપશું પ્રદગ્ધોઃ

અથ હૈકે – ઉલ્મુક્યેન દહન્તિ। તદુ તથા ન કુર્યાત્। એષ વૈ રુદ્રિયોઽગ્નિઃ। સ હૈનમીશ્વરઃ સપુત્રં સપશુમભિમન્તોઃ

અથ હૈકે – અન્તરેણાગ્નીંશ્ચિતિં ચિત્વા તમગ્નિભિઃ સમુપોષન્તિ। એતદ્વૈ યજમાનસ્યાયતનમ્। યદન્તરેણાગ્નીનિતિ। તદુ તથા ન કુર્યાત્। યો હૈનં તત્ર બ્રૂયાત્। મધ્યે ન્વા અયં ગ્રામસ્યાશસનમજીજનત। ક્ષિપ્રેઽસ્યાશસનં જનિષ્યતે। પ્રિયતમં રોત્સ્યતીતિ। ઈશ્વરો હ તથૈવ સ્યાત્