Shatapatha Brahmana · Chapter 12.4.3

१२.४.३.
tadāhuḥ – yat pūrvasyāmāhutyāṃ hutāyām/ athāgniranugacchet/ kiṃ tatra karma/ kā prāyaścittiriti/ yaṃ prativeśaṃ śakalaṃ viṃdet/ tamabhyasyābhijuhuyāt/ dārau dārāvagniḥ iti/ vadan/ dārau dārau hyevāgnim/ yadyu asya hṛdayaṃ vyeva likhet/ hiraṇyamabhijuhuyāt/ agnervā etadretaḥ, yaddhiraṇyam/ ya u vai putraḥ, sa pitā/ yaḥ pitā, sa putraḥ/ tasmāddhiraṇyamabhijuhuyāt/ etadeva tatra karma

tadāhuḥ – yasyāhavanīya uddhṛtaḥ/ purā'gnihotrādanugacchet/ kiṃ tatra karma/ kā prāyaścittiriti/ gārhapatyādevainaṃ prāṃcamuddhṛtya, upasamādhāya, agnihotraṃ juhuyāt/ sa yadyapi śatameva kṛtvaḥ punaḥ punaruddhṛto'nugacchet/ gārhapatyādevainaṃ prāṃcamuddhṛtyopasamādhāyāgnihotraṃ juhuyāt/ etadeva tatra karma

tadāhuḥ – yasya gārhapatyo'nugacchet/ kiṃ tatra karma/ kā prāyaścittiriti/ taṃ haika ulmukādeva nirmanthanti/ yato vai puruṣasyāṃtato naśyati/ tato vai sa tasya prāścittimicchate iti vadantaḥ/ tadu tathā na kuryāt/ ulmukaṃ ha vaivādāya careyuḥ/ ulmukasya vā'vavraścam/ itthameva kuryāt/ ulmukādaṃgāramādāya/ tamaraṇyorabhivimathnīyāt/ upa ha taṃ kāmamāpnoti/ ya ulmukamatheya/ upo taṃ, yo'raṇyoḥ/ etadeva tatra karma

tadāhuḥ – yasyāgnāvagnimabhyuddhareyuḥ/ kiṃ tatra karma/ kā prāyaścittiriti/ īśvarau vā etau saṃpādyāśāṃtau yajamānasya prajāṃ ca paśūṃśca nirddahataḥ/ tadabhimantrayeta/ samitaṃ saṃkalpethāṃ saṃpriyau rociṣṇū sumanasyamānau/ iṣamūrjamabhisaṃvasānau// saṃ vāṃ manāṃsi saṃvratā samu cittānyākaram/ agne purīṣyādhipā bhava tvanna iṣamūrjaṃ yajamānāya dhehi iti/ śāṃtimevābhyāmetadvadati/ yajamānasya prajāyai paśūnāmahiṃsāyai

yadyu asya hṛdayaṃ vyeva likhet/ agnaye'gnimate'ṣṭākapālaṃ puroḍāśaṃ nirvapet/ tasyāvṛt/ saptadaśa sāmidhenīranubrūyāt/ vārtraghnāvājyabhāgau/virājau saṃyājye/ athaite yājyānuvākye/ agninā'gniḥ samidhyate kavirgṛhapatiryuvā/ havyavāḍ juhvāsyaḥ iti/ atha yājyā/ tvaṃ hyagne'gninā vipro vipreṇa santsatā/ sakhā sakhyā samidhyase iti/ śāṃtimevābhyāmetadvadati/ yajamānasya prajāyai paśūnāmahiṃsāyai/ etadeva tatra karma

tadāhuḥ - yasyāhavanīye'nanugate gārhapatyo'nugacchet/ kiṃ tatra karma/ kā prāyaścittiriti/ taṃ haike tata eva prāṃcamuddharanti/ prāṇā vā agnayaḥ/ prāṇānevāsmā etaduddharāma iti vadaṃtaḥ/ tadu tathā na kuryāt/ yo hainaṃ tatra brūyāt/ prāco nvā ayaṃ yajamānasya prāṇān prautsīt. mariṣyatyayaṃ yajamānaḥ/ iti īśvaro ha tathaiva syāt

atha haike pratyaṃcamāharanti/ prāṇodānāvimāviti vadaṃtaḥ/tadu tathā na kuryāt/ svargyaṃ vā etat, yadagnihotram/ yo hainaṃ tatra brūyāt/ prati nvā ayaṃ svargāllokādavārukṣat/ nāsyedaṃ svargyamiva bhaviṣyati iti/ īśvaro ha tathaiva syāt

atha haike'nyaṃ gārhapatyaṃ manthanti/ tadu tathā na kuryāt/ yo hainaṃ tatra brūyāt/ agnernvā ayamadhidviṣantaṃ bhrātṛvyamajījanata/ kṣipre'syadviṣanbhrātṛvyo janiṣyate/ priyatamaṃ rotsyati/ iti/ īśvaro ha tathaiva syāt

atha haike anugamayyānyaṃ manthanti/ tasyāśāṃ neyāt/ api yatpariśiṣṭamabhūt/ tadajījasata/ nāsya dāyādaścana pariśekṣyata iti/ īśvaro ha tathaiva syāt

itthameva kuryāt/ araṇyoragnī samārohya udaṅṅudavasāya nirmathya juhvadvaset/ tathā ha na kāṃcana paricakṣāṃ karoti/ navāvasāna u asyābhito rātraṃ hutaṃ bhavati