Shatapatha Brahmana · Chapter 12.4.2

१२.४.२.
tadāhuḥ – yasyāgnihotrī lohitaṃ duhīta/ kiṃ tatra karma/ kā prāyaścittiriti/ vyutkrāmatetyuktvā mekṣaṇaṃ kṛtvā/ anvāhāryapacanaṃ pariśrayitavai brūyāt/ tasminnetacchrapayitvā/ tasmiṃstūṣṇīṃ juhuyāt/ anirukto vai prajāpatiḥ/ prājāpatyamagnihotram/ sarvaṃ vā aniruktam/ tadanena sarveṇa prāyaścittiṃ kurute/ tāṃ tasyāmāhutyāṃ brāhmaṇāya dadyāt yamanabhyāgamiṣyanmanyeta/ ārtiṃ vā eṣā pāpmānaṃ yajamānasya pratidṛśya duhe/ yā lohitaṃ duhe/ ārtimevāsmiṃstatpāpmānaṃ pratimuñcati/ atha yadanyadviṃdeta/ tena juhuyāt/ anārtenaiva tadārtaṃ yajñasya niṣakaroti/ etadeva tatra karma

tadāhuḥ – yasyāgnihotraṃ dohyamānamamedhyamāpadyeta/ kiṃ tatra karma/ kā prāyaścittiriti/ taddhaike hotavyaṃ manyante/ prayatametat/ naitasyā homo'vakalpate/ na vai devāḥ kasmāccana bībhatsante/ bībhatsaṃtā ३ i tu devāḥ/ itthameva kuryāt/ gārhapatyāduṣṇaṃ bhasma niruhya/ tasminnenaduṣṇe bhasmaṃstūṣṇīṃ ninayet/ adbhirupaninayati/ adbhirenadāpnoti/ atha yadanyadviṃdet/ tena juhuyāt/ etadeva tatra karma

tadāhuḥ – yasyāgnihotraṃ dohitamamedhyamāpadyeta/ kiṃ tatra karma/ kā prāyaścittiriti/ ya evaitade'ṅgārā nirūḍhā/ yeṣvadhiśrayiṣyan bhavati/ tānpratyuhya tasminnenaduṣṇe bhasmaṃstūṣṇīṃ niyet/ adbhirupaninayati/ adbhirenadāpnoti/ atha yadanyadviṃdet/ tena juhuyāt/ etadeva tatra karma

tadāhuḥ – yasyāgnihotramadhiśritamamedhyamāpadyeta/ kiṃ tatra karma/ kā prāyaścittiriti/ ya evaite'ṅgārā nirūḍhā/ yeṣvadhiśritaṃ bhavati/ teṣvenattūṣṇīṃ juhuyāt/ taddhutamahutam/ yadahainatteṣu juhoti/ tena hutam/ yadvenāṃstenaivāānugamayati/ tenāhutam/ adbhirupaninayati/ adbhirenadāpnoti/ atha yadanyadvindet/ tena juhuyāt/ etadeva tatra karma

tadāhuḥ - yadadhiśrite'gnihotre yajamāno mriyeta/ kiṃ tatra karma/ kā prāyaścittiriti/ tadevainadabhiparyādhāya viṣyaṃdayet/ atho khalvāhuḥ – etāvatī sarvasya haviryasya prāyaścittiriti/ etadeva tatra karma

tadāhuḥ – yasyāgnihotraṃ srucyunnītaṃ skandet/ kiṃ tatra karma/ kā prāyaścittiriti/ skannaprāyaścittenābhimṛśya adbhiruninīya pariśiṣṭena juhuyāt/ yadyu nīcī sruk syāt/ yadi vā bhidyeta/ skannaprāyaścittenaivābhimṛśya adbhiruninīya yatsthālyāṃ pariśiṣṭaṃ syāt/ tena juhuyāt

taddhaike pratiparetya yat sthālyāṃ pariśiṣṭaṃ bhavati tena juhvati/ tadu tathā na kuryāt/ svargyaṃ vā etat/ yadagnihotram/ yo hainaṃ tatra brūyāt/ prati nvā ayaṃ svargāllokādavārukṣat/ nāsyedaṃ svargyamiva bhaviṣyatīti/ īśvaro ha tathaiva syāt

itthameva kuryāt/ tadevopaviśet/ yat sthālyāṃ pariśiṣṭaṃ syāt/ tasmā unnīyāhareyuḥ/ taddhaika upavalhante/ hutocchiṣṭaṃ vā etat/ yātayāma vā etat/ naitasya hotavyamiti/ tadu tannādriyeta/ yadā vā etadayātayāma/ athainaddhavirātaṃcanaṃ kurvate. tasmādyatsthālyāṃ pariśiṣṭaṃ syāt/ tadasmā unnīyāhareyuḥ/ yadyu tatra na syāt/ yadanyat viṃdet/ tadagnāvadhiśrityāvajyotyāpaḥ pratyānīyodvāsya/ tadado haivonneṣyāmītyuktaṃ bhabhavati/ athātra yathonnītamevāsmā unnīyāhareyuḥ/ tena kāmaṃ juhuyāt/ etadeva tatra karma

tadāhuḥ – yasyāgnihotraṃ srucyunnītamamedhyamāpadyeta/ kiṃ tatra karma/ kā prāyaścittiriti/ taddhaike hotavyaṃ manyaṃte. prayatametat/ naitasyā homo'vakalpate/ na vai devāḥ kasmāccana bībhatsaṃta iti/ taddhaika utsicya cchardayanti/ tadu tathā na kuryāt/ yo hainaṃ tatra brūyāt/ parāsicata nvā ayamagnihotram/ kṣipre'yaṃ yajamānaḥ parāsekṣyata iti/ īsvaro ha tathaiva syāt/ itthameva kuryāt āhavanīye samidhamabhyādhāya āhavanīyādevoṣṇaṃ bhasma niruhya tasminnenaduṣṇe bhasmaṃstūṣṇīṃ ninayet/ adbhiruninayati/ adbhirenadāpnoti/ atha yadanyat viṃdet, tena juhuyāt/ etadeva tatra karma

tadāhuḥ – yasyāgnihotraṃ srucyunnītamupariṣṭādavavarṣet/ kiṃ tatra karma/ kā prāyaścittiriti/ tadvidyāt/ upariṣṭānmā śukramāgannupa māṃ devāḥ prābhūvan śreyān bhaviṣyāmi iti/ tena kāmaṃ juhuyāt/ etadeva tatra karma