શતપથબ્રાહ્મણમ્ · અધ્યાય 12.4.3

૧૨.૪.૩.
તદાહુઃ – યત્ પૂર્વસ્યામાહુત્યાં હુતાયામ્। અથાગ્નિરનુગચ્છેત્। કિં તત્ર કર્મ। કા પ્રાયશ્ચિત્તિરિતિ। યં પ્રતિવેશં શકલં વિંદેત્। તમભ્યસ્યાભિજુહુયાત્। દારૌ દારાવગ્નિઃ ઇતિ। વદન્। દારૌ દારૌ હ્યેવાગ્નિમ્। યદ્યુ અસ્ય હૃદયં વ્યેવ લિખેત્। હિરણ્યમભિજુહુયાત્। અગ્નેર્વા એતદ્રેતઃ, યદ્ધિરણ્યમ્। ય ઉ વૈ પુત્રઃ, સ પિતા। યઃ પિતા, સ પુત્રઃ। તસ્માદ્ધિરણ્યમભિજુહુયાત્। એતદેવ તત્ર કર્મ

તદાહુઃ – યસ્યાહવનીય ઉદ્ધૃતઃ। પુરાઽગ્નિહોત્રાદનુગચ્છેત્। કિં તત્ર કર્મ। કા પ્રાયશ્ચિત્તિરિતિ। ગાર્હપત્યાદેવૈનં પ્રાંચમુદ્ધૃત્ય, ઉપસમાધાય, અગ્નિહોત્રં જુહુયાત્। સ યદ્યપિ શતમેવ કૃત્વઃ પુનઃ પુનરુદ્ધૃતોઽનુગચ્છેત્। ગાર્હપત્યાદેવૈનં પ્રાંચમુદ્ધૃત્યોપસમાધાયાગ્નિહોત્રં જુહુયાત્। એતદેવ તત્ર કર્મ

તદાહુઃ – યસ્ય ગાર્હપત્યોઽનુગચ્છેત્। કિં તત્ર કર્મ। કા પ્રાયશ્ચિત્તિરિતિ। તં હૈક ઉલ્મુકાદેવ નિર્મન્થન્તિ। યતો વૈ પુરુષસ્યાંતતો નશ્યતિ। તતો વૈ સ તસ્ય પ્રાશ્ચિત્તિમિચ્છતે ઇતિ વદન્તઃ। તદુ તથા ન કુર્યાત્। ઉલ્મુકં હ વૈવાદાય ચરેયુઃ। ઉલ્મુકસ્ય વાઽવવ્રશ્ચમ્। ઇત્થમેવ કુર્યાત્। ઉલ્મુકાદંગારમાદાય। તમરણ્યોરભિવિમથ્નીયાત્। ઉપ હ તં કામમાપ્નોતિ। ય ઉલ્મુકમથેય। ઉપો તં, યોઽરણ્યોઃ। એતદેવ તત્ર કર્મ

તદાહુઃ – યસ્યાગ્નાવગ્નિમભ્યુદ્ધરેયુઃ। કિં તત્ર કર્મ। કા પ્રાયશ્ચિત્તિરિતિ। ઈશ્વરૌ વા એતૌ સંપાદ્યાશાંતૌ યજમાનસ્ય પ્રજાં ચ પશૂંશ્ચ નિર્દ્દહતઃ। તદભિમન્ત્રયેત। સમિતં સંકલ્પેથાં સંપ્રિયૌ રોચિષ્ણૂ સુમનસ્યમાનૌ। ઇષમૂર્જમભિસંવસાનૌ॥ સં વાં મનાંસિ સંવ્રતા સમુ ચિત્તાન્યાકરમ્। અગ્ને પુરીષ્યાધિપા ભવ ત્વન્ન ઇષમૂર્જં યજમાનાય ધેહિ ઇતિ। શાંતિમેવાભ્યામેતદ્વદતિ। યજમાનસ્ય પ્રજાયૈ પશૂનામહિંસાયૈ

યદ્યુ અસ્ય હૃદયં વ્યેવ લિખેત્। અગ્નયેઽગ્નિમતેઽષ્ટાકપાલં પુરોડાશં નિર્વપેત્। તસ્યાવૃત્। સપ્તદશ સામિધેનીરનુબ્રૂયાત્। વાર્ત્રઘ્નાવાજ્યભાગૌ।વિરાજૌ સંયાજ્યે। અથૈતે યાજ્યાનુવાક્યે। અગ્નિનાઽગ્નિઃ સમિધ્યતે કવિર્ગૃહપતિર્યુવા। હવ્યવાડ્ જુહ્વાસ્યઃ ઇતિ। અથ યાજ્યા। ત્વં હ્યગ્નેઽગ્નિના વિપ્રો વિપ્રેણ સન્ત્સતા। સખા સખ્યા સમિધ્યસે ઇતિ। શાંતિમેવાભ્યામેતદ્વદતિ। યજમાનસ્ય પ્રજાયૈ પશૂનામહિંસાયૈ। એતદેવ તત્ર કર્મ

તદાહુઃ - યસ્યાહવનીયેઽનનુગતે ગાર્હપત્યોઽનુગચ્છેત્। કિં તત્ર કર્મ। કા પ્રાયશ્ચિત્તિરિતિ। તં હૈકે તત એવ પ્રાંચમુદ્ધરન્તિ। પ્રાણા વા અગ્નયઃ। પ્રાણાનેવાસ્મા એતદુદ્ધરામ ઇતિ વદંતઃ। તદુ તથા ન કુર્યાત્। યો હૈનં તત્ર બ્રૂયાત્। પ્રાચો ન્વા અયં યજમાનસ્ય પ્રાણાન્ પ્રૌત્સીત્. મરિષ્યત્યયં યજમાનઃ। ઇતિ ઈશ્વરો હ તથૈવ સ્યાત્

અથ હૈકે પ્રત્યંચમાહરન્તિ। પ્રાણોદાનાવિમાવિતિ વદંતઃ।તદુ તથા ન કુર્યાત્। સ્વર્ગ્યં વા એતત્, યદગ્નિહોત્રમ્। યો હૈનં તત્ર બ્રૂયાત્। પ્રતિ ન્વા અયં સ્વર્ગાલ્લોકાદવારુક્ષત્। નાસ્યેદં સ્વર્ગ્યમિવ ભવિષ્યતિ ઇતિ। ઈશ્વરો હ તથૈવ સ્યાત્

અથ હૈકેઽન્યં ગાર્હપત્યં મન્થન્તિ। તદુ તથા ન કુર્યાત્। યો હૈનં તત્ર બ્રૂયાત્। અગ્નેર્ન્વા અયમધિદ્વિષન્તં ભ્રાતૃવ્યમજીજનત। ક્ષિપ્રેઽસ્યદ્વિષન્ભ્રાતૃવ્યો જનિષ્યતે। પ્રિયતમં રોત્સ્યતિ। ઇતિ। ઈશ્વરો હ તથૈવ સ્યાત્

અથ હૈકે અનુગમય્યાન્યં મન્થન્તિ। તસ્યાશાં નેયાત્। અપિ યત્પરિશિષ્ટમભૂત્। તદજીજસત। નાસ્ય દાયાદશ્ચન પરિશેક્ષ્યત ઇતિ। ઈશ્વરો હ તથૈવ સ્યાત્

ઇત્થમેવ કુર્યાત્। અરણ્યોરગ્ની સમારોહ્ય ઉદઙ્ઙુદવસાય નિર્મથ્ય જુહ્વદ્વસેત્। તથા હ ન કાંચન પરિચક્ષાં કરોતિ। નવાવસાન ઉ અસ્યાભિતો રાત્રં હુતં ભવતિ