Shatapatha Brahmana · Chapter 12.4.1

१२.४.१
dīrghasatraṃ vā eta upayaṃti/ ye'gnihotraṃ juhvati/ etadvai jarāmaryaṃ satram/ yadagnihotram/ jarayā vā hyevāsmānmucyaṃte mṛtyunā vā

tadāhuḥ – yadetasya dīrghasatriṇo'gnihotraṃ juhvato'ntareṇāgnī/ yuktaṃ vā vivāyāt/ saṃ vā careyuḥ/ kiṃ tatra karma/ kā prāyaścittiriti/ kurvīta haiva niṣkṛtim/ apīṣṭyā yajeta/ tadu tannādriyeta/ imānvā eṣa lokānanu vitanute/ yo'gnī ādhatte

tasyāyameva loko gārhapatyaḥ/ antarikṣaloko'nvāhāryapacanaḥ/ asau loka āhavanīyaḥ/ kāmaṃ nvā eṣu lokeṣu vayāṃsi yuktaṃ cā yuktaṃ ca saṃcaranti/ sa yadi hāsyāpyaṃtareṇa grāmo'gnīn viyāyāt/ naiva me kācanārtirasti/ na riṣṭiḥ/ iti havai vidyāt

trayo ha tvāva paśavo'medhyāḥ – durvarāhaḥ, aiḍakaḥ, śvā/ teṣāṃ yadyadhiśrite'gnihotre'ntareṇa kaścitsaṃcaret, kiṃ tatra karma, kā prāyaścittiriti/ taddhaike – gārhapatyādbhasmopahatyāhavanīyānnivapanto yanti/ idaṃ viṣṇurvicakrame ityetayarcā/ yajño vai viṣṇuḥ/ tadyajñenaiva yajñamanusantanmaḥ/ bhasmanā'sya padamapi vapāma iti vadantaḥ/ tadu tathā na kuryāt/ yo hainaṃ tatra brūyāt/ āsāṃ nvā ayaṃ yajamānasyāvāpsīt/ kṣipre paramā sā nāvapsyate/ jyeṣṭhagṛhyaṃ rotsyatīti/ īśvaro ha tathaiva syāt

itthameva kuryāt/ udasthālīṃ vaivodakamaṇḍaluṃ vā''dāya/ gārhapatyādagra āhavanīyānninayanniyāt/ idaṃ viṣṇurvicakrame ityetayaivarcā/ yajño vai viṣṇuḥ/ tadyajñenaiva yajñamanusaṃtanoti/ yadvai yajñasya riṣṭam/ yadaśāntam/ āpo vai tasya sarvasya śāntiḥ/ adbhirevainattacchāṃtyā śamayati/ etadeva tatra ca karma

tadāhuḥ – yasyāgnihotraṃ dohyamānaṃ skandet/ kiṃ tatra karma/ kā prāyaścittiriti/ skannaprāyaścittenābhimṛśya/ adbhirupaninīya pariśiṣṭena juhuyāt/ yadyu nīcī sthālī syāt/ yadi vā bhidyeta/ skannaprāyaścittenaivābhimṛśya adbhirupaninīya/ yadanyadviṃdet – tena juhuyāt

atha yatra skannaṃ syāt/ tadabhimṛśet askannadhita prājani iti/ yadā vai skandati/ atha dhīyate/ yadā dhīyate/ atha prajāyate/ yonirvā iyam/ retaḥ payaḥ/ tadasyāṃ yonau reto dadhāti/ anuṣṭhyā hāsya retaḥ siktaṃ prajāyate/ ya evametadveda/ amuto vai divo varṣati/ ihauṣadhayo vanaspatayaḥ prajāyante/ puruṣādretaḥ skandati/ paśubhyastata idaṃ sarvaṃ prajāyate/ tadvidyāt/ bhūyasī me prajātirabhūt/ bahuḥ prajayā paśubhirbhaviṣyāmi/ śreyān bhaviṣyāmīti

atha yatrāvabhinnaṃ syāt/ tadudasthālīṃ vai vā udakamaṇḍaluṃ vā ninayet/ yadvai yajñasya riṣṭam/ yadaśāntam/ āpo vai tasya sarvasya śāntiḥ/ adbhirevainattacchāṃtyā śamayati/ bhūrbhuvaḥ svaḥ ityetābhirvyāhṛtibhiḥ/ etā vai vyāhṛtayaḥ sarvaprāyaścittīḥ/ tadanena sarveṇa prāyaścittiṃ kurute/ tāni kapālāni saṃcitya/ yatra bhasmodadhṛtaṃ syāt/ tannivapet/ etadeva tatra karma

tadāhuḥ – yasyāgnihotrī dohyamānopaviśet/ kiṃ tatra karma/ kā prāyaścittiriti/ tāṃ haike yajuṣotthāpayanti/ udasthāddevyaditiḥ iti/ iyaṃ vā aditiḥ/ imāmevāsmā etadutthāpayāma iti vadantaḥ/ āyuryajñapatāvadhāt iti/ āyurevāsmiṃstaddadhma iti vadantaḥ/ indrāya kṛṇvatī bhāgam iti/ indriyamevāsmiṃstaddadhma iti vadantaḥ/ mitrāya varuṇāya ca iti/ prāṇodānau vai mitrāvaruṇau/ prāṇodānāvevāsmiṃstaddadhma iti vadantaḥ/ tāṃ tasyāmāhutyāṃ brāhmaṇāya dadyāt, yamanabhyāgamiṣyanmanyeta/ ārtiṃ vā eṣā pāpmānaṃ yajamānasya pratidṛśyopāvikṣat/ ārtimevāsmiṃstatpāpmānaṃ pratimuṃcāma iti vadantaḥ

tadu hovāca yājñavalkyaḥ/ aśraddadhānebhyo haibhyo gaurapakrāmati/ ārtyo vā āhutiṃ vidhyanti/ itthameva kuryāt/ daṇḍenaivaināṃ vipiṣyotthāpayediti/ tadyathaivādaḥ dhāvayato'śvo vā'śvataro vā gadāyeta/ balīvardo vā yuktaḥ/ tena daṇḍaprajitena tottraprajitena yamadhvānaṃ samīpsati taṃ samaśnute/ evamevaitayā daṇḍaprajitayā tottraprajitayā yaṃ svargaṃ lokaṃ samīpsati taṃ samaśnute

atha hovācāruṇiḥ/ dyaurvā etasyāgnihotrasyāgnihotrī/ ayameva vatsaḥ/ yo'yaṃ pavate/ iyamevāgnihotrasthālī/ na vā evaṃ viduṣo'gnihotrī naśyati/ kva hyasau naśyet/ naivaṃ viduṣo'gnihotrī/ vatso naśyati/ kva hyeṣa naśyet/ naivaṃ viduṣo'gnihotrasthālī bhidyate/ kva hīyaṃ bhidyeta/ śriyo vai parjanyo varṣati/ tadvidyāt/ śremāṇaṃ me mahimānamadhārayamāṇopāvikṣat/ śreyān bhaviṣyāmīti/ tāmātmanyeva kurvīta/ ātmanyeva tacchriyaṃ dhatte/ iti ha smāhāruṇiḥ/ etadeva tatra karma

tadāhuḥ yasyāgnihotrī dohyamānā vāśyeta/ kiṃ tatra karma/ kā prāyaścittiriti/ staṃbamācchidya grāsayet/ etadeva tatra karma