Shatapatha Brahmana · Chapter 12.3.5

१२.३.५.
sāvitraṃ ha smaitaṃ pūrve paśumālabhante/ athaitarhi prājāpatyam/ yo hyeva savitā sa prajāpatiriti vadantaḥ/ tasmāt saṃnyupyāgnīn tena yajeran/ gṛhapaterevāgniṣu/ yayedaṃ jāghanyā patnīḥ saṃyājayanti/ tasyāṃ nopya'saditi/ te tato yadānikāmaṃ dīkṣante

tadu vā āhuḥ/ nānādhiṣṇyā eva syuḥ/ yadi dīkṣitasyopatapet/ pārśvataḥ agnihotraṃ juhvat vaset/ sa yadyagado bhavati/ saṃsṛjyainaṃ punarupahvayante/ yadyu mriyate/svaireva tamagnibhirdahanti/ aśavāgnibhiritare yajamānā āsata iti/tadahaivāhitāgneḥ karma/ samānadhiṣṇyāste bhavanti/ tasya tadeva brāhmaṇaṃ yat puraścaraṇe

tadāhuḥ – yat saṃvatsarāya saṃvatsarasado dīkṣante/ kathameṣāmagnihotramanantaritaṃ bhavatīti/ vrateneti brūyāt

tadāhuḥ – yatsaṃvatsarāya saṃvatsarasado dīkṣante/ kathameṣāṃ paurṇamāsaṃ haviranantaritaṃ bhavatīti/ ājyena ca puroḍāśena ceti brūyāt

tadāhuḥ – yatsaṃvatsarāya saṃvatsarasado dīkṣante/ kathameṣāṃ pitṛyajño'nantarito bhavatīti/ aupāsanairiti brūyāt

tadāhuḥ – yatsaṃvatsarāya saṃvatsarasado dīkṣante/ kathameṣāmāmāvāsyaṃ haviranantaritaṃ bhavatīti/ dadhnā ca puroḍāśena ceti brūyāt

tadāhuḥ – yatsaṃvatsarāya dīkṣante/ kathameṣāmāgrayaṇeṣṭiranantaritā bhavatīti/ saumyena caruṇeti brūyāt

tadāhuḥ – yatsaṃvatsarāya saṃvatsarasado dīkṣante/ kathameṣāṃ cāturmāsyānyanantaritāni bhavantīti/ payasyayeti brūyāt

tadāhuḥ – yatsaṃvatsarāya saṃvatsarasado dīkṣante/ kathameṣāṃ paśubandho'nantarito bhavatīti/ paśunā ca puroḍāśena ceti brūyāt

tadāhuḥ – yat saṃvatsarāya saṃvatsarasado dīkṣaṃte/ kathameṣāṃ somo'nantarito bhavatīti/ savanairiti brūyāt

te vā evamete yajñakratavaḥ saṃvatsaramapiyanti/ sa yo haivametāṃ yajñakratūnāmapītiṃ veda/ apyasya svarge loke bhavati

saṃvatsarasya samatā veditavyā/ ekaṃ purastāt viṣuvato'tirātramupayanti/ ekamupariṣṭāt/ trayaḥpañcāśataṃ purastādviṣuvato'gniṣṭomānupayanti/ trayaḥpaṃcāśatamupariṣṭāt/ viṃśatiśataṃ purastāt viṣuvata ukthyānyahānyupayanti/ viṃśatiśatamupariṣṭāt/ iti nu ya ukthyān svarasāmna upayanti

atha ye'gniṣṭomān ṣaṭpaṃcāśataṃ purastāt viṣuvato'gniṣṭomānupayaṃti/ ṣaṭpaṃcāśatamupariṣṭāt/ saptadaśaṃ śataṃ purastāt viṣuvata ukthyānyahānyupayaṃti/ saptadaśamupariṣṭāt/ ṣaṭpurastādviṣuvataḥ ṣoḍaśina upayaṃti/ ṣaḍupariṣṭāt/ triṃśataṃ purastādviṣuvataḥ ṣaḍahānyupayaṃti/ triṃśatamupariṣṭāt/ eṣā hāsya samatā/ samena ha vā asyā vyṛddhenānyūnenānatiriktenāyanenetaṃ bhavati/ ya evametadveda