Shatapatha Brahmana · Chapter 12.3.4

१२.३.४.
puruṣaṃ ha nārāyaṇaṃ prajāpatiruvāca yajasvayajasveti/ sa hovāca/ yajasvayajasveti vā tvaṃ māmāttha/ trirayakṣi/ vasavaḥ prātaḥsavanenāguḥ/ rudrā mādhyaṃdinena savanena/ ādityāstṛtīyasavanena/ atha mama yajñavāstveva/ yajñavāstāvevāhamāsa iti

sa hovāca/ yajasvaiva/ ahaṃ vai te tadvakṣyāmi/ yathā ta ukthyāni maṇiriva sūtra otāni bhaviṣyanti/ sūtramiva vā maṇāviti

tasmā u haitaduvāca/ prātaḥsavane bahiṣpavamāna udgātāramanvarabhāsai/ śyeno'si gāyatracchandā anu tvā''rabhe svasti mā saṃpāraya iti

atha mādhyandine pavamāne udgātāramanvārabhāsai/ suparṇo'si triṣṭupchandā anu tvā''rabhe svasti mā saṃpāraya iti

atha tṛtīyasavana ārbhave pavamāna udgātāramanvārabhāsai/ ṛbhurasi jagacchandā anu tvā''rabhe svasti mā saṃpāraya iti

atha saṃsthiteṣu saṃsthiteṣu savaneṣu japeḥ/ mayi bhargo mayi maho mayi yaśo mayi sarvam iti

ayaṃ vai loko bhargaḥ/ aṃtarikṣaloko mahaḥ/dyauryaśaḥ/ ye'nye lokāstatsarvam

agnirvai bhargaḥ/ vāyurmahaḥ/ ādityo yaśaḥ/ ye'nye devāstatsarvam

ṛgvedo vai bhargaḥ/ yajurvedo mahaḥ/ sāmavedo yaśaḥ/ ye'nye vedāstatsarvam

vāgvai bhargaḥ/ prāṇo mahaḥ/ cakṣuryaśaḥ/ ye'nye prāṇāstatsarvam

tadvidyāt sarvān lokānātmannadhiṣi/ sarveṣu lokeṣu ātmānamadhām/ sarvān vedān ātmannadhiṣi sarveṣu vedeṣvātmānamadhām/ sarvān prāṇānātmannadhiṣi/ sarveṣu prāṇeṣvātmānamadhāmiti/ akṣitā vai lokāḥ/ akṣitā devāḥ/ akṣitā vedāḥ/ akṣitāḥ prāṇāḥ/ akṣitaṃ sarvam/ akṣitāddha vā akṣitamupasaṃkrāmati/ apa punarmṛtyuṃ jayati/ sarvamāyureti/ ya evametadveda