શતપથબ્રાહ્મણમ્ · અધ્યાય 12.3.5

૧૨.૩.૫.
સાવિત્રં હ સ્મૈતં પૂર્વે પશુમાલભન્તે। અથૈતર્હિ પ્રાજાપત્યમ્। યો હ્યેવ સવિતા સ પ્રજાપતિરિતિ વદન્તઃ। તસ્માત્ સંન્યુપ્યાગ્નીન્ તેન યજેરન્। ગૃહપતેરેવાગ્નિષુ। યયેદં જાઘન્યા પત્નીઃ સંયાજયન્તિ। તસ્યાં નોપ્યઽસદિતિ। તે તતો યદાનિકામં દીક્ષન્તે

તદુ વા આહુઃ। નાનાધિષ્ણ્યા એવ સ્યુઃ। યદિ દીક્ષિતસ્યોપતપેત્। પાર્શ્વતઃ અગ્નિહોત્રં જુહ્વત્ વસેત્। સ યદ્યગદો ભવતિ। સંસૃજ્યૈનં પુનરુપહ્વયન્તે। યદ્યુ મ્રિયતે।સ્વૈરેવ તમગ્નિભિર્દહન્તિ। અશવાગ્નિભિરિતરે યજમાના આસત ઇતિ।તદહૈવાહિતાગ્નેઃ કર્મ। સમાનધિષ્ણ્યાસ્તે ભવન્તિ। તસ્ય તદેવ બ્રાહ્મણં યત્ પુરશ્ચરણે

તદાહુઃ – યત્ સંવત્સરાય સંવત્સરસદો દીક્ષન્તે। કથમેષામગ્નિહોત્રમનન્તરિતં ભવતીતિ। વ્રતેનેતિ બ્રૂયાત્

તદાહુઃ – યત્સંવત્સરાય સંવત્સરસદો દીક્ષન્તે। કથમેષાં પૌર્ણમાસં હવિરનન્તરિતં ભવતીતિ। આજ્યેન ચ પુરોડાશેન ચેતિ બ્રૂયાત્

તદાહુઃ – યત્સંવત્સરાય સંવત્સરસદો દીક્ષન્તે। કથમેષાં પિતૃયજ્ઞોઽનન્તરિતો ભવતીતિ। ઔપાસનૈરિતિ બ્રૂયાત્

તદાહુઃ – યત્સંવત્સરાય સંવત્સરસદો દીક્ષન્તે। કથમેષામામાવાસ્યં હવિરનન્તરિતં ભવતીતિ। દધ્ના ચ પુરોડાશેન ચેતિ બ્રૂયાત્

તદાહુઃ – યત્સંવત્સરાય દીક્ષન્તે। કથમેષામાગ્રયણેષ્ટિરનન્તરિતા ભવતીતિ। સૌમ્યેન ચરુણેતિ બ્રૂયાત્

તદાહુઃ – યત્સંવત્સરાય સંવત્સરસદો દીક્ષન્તે। કથમેષાં ચાતુર્માસ્યાન્યનન્તરિતાનિ ભવન્તીતિ। પયસ્યયેતિ બ્રૂયાત્

તદાહુઃ – યત્સંવત્સરાય સંવત્સરસદો દીક્ષન્તે। કથમેષાં પશુબન્ધોઽનન્તરિતો ભવતીતિ। પશુના ચ પુરોડાશેન ચેતિ બ્રૂયાત્

તદાહુઃ – યત્ સંવત્સરાય સંવત્સરસદો દીક્ષંતે। કથમેષાં સોમોઽનન્તરિતો ભવતીતિ। સવનૈરિતિ બ્રૂયાત્

તે વા એવમેતે યજ્ઞક્રતવઃ સંવત્સરમપિયન્તિ। સ યો હૈવમેતાં યજ્ઞક્રતૂનામપીતિં વેદ। અપ્યસ્ય સ્વર્ગે લોકે ભવતિ

સંવત્સરસ્ય સમતા વેદિતવ્યા। એકં પુરસ્તાત્ વિષુવતોઽતિરાત્રમુપયન્તિ। એકમુપરિષ્ટાત્। ત્રયઃપઞ્ચાશતં પુરસ્તાદ્વિષુવતોઽગ્નિષ્ટોમાનુપયન્તિ। ત્રયઃપંચાશતમુપરિષ્ટાત્। વિંશતિશતં પુરસ્તાત્ વિષુવત ઉક્થ્યાન્યહાન્યુપયન્તિ। વિંશતિશતમુપરિષ્ટાત્। ઇતિ નુ ય ઉક્થ્યાન્ સ્વરસામ્ન ઉપયન્તિ

અથ યેઽગ્નિષ્ટોમાન્ ષટ્પંચાશતં પુરસ્તાત્ વિષુવતોઽગ્નિષ્ટોમાનુપયંતિ। ષટ્પંચાશતમુપરિષ્ટાત્। સપ્તદશં શતં પુરસ્તાત્ વિષુવત ઉક્થ્યાન્યહાન્યુપયંતિ। સપ્તદશમુપરિષ્ટાત્। ષટ્પુરસ્તાદ્વિષુવતઃ ષોડશિન ઉપયંતિ। ષડુપરિષ્ટાત્। ત્રિંશતં પુરસ્તાદ્વિષુવતઃ ષડહાન્યુપયંતિ। ત્રિંશતમુપરિષ્ટાત્। એષા હાસ્ય સમતા। સમેન હ વા અસ્યા વ્યૃદ્ધેનાન્યૂનેનાનતિરિક્તેનાયનેનેતં ભવતિ। ય એવમેતદ્વેદ