શતપથબ્રાહ્મણમ્ · અધ્યાય 12.3.4

૧૨.૩.૪.
પુરુષં હ નારાયણં પ્રજાપતિરુવાચ યજસ્વયજસ્વેતિ। સ હોવાચ। યજસ્વયજસ્વેતિ વા ત્વં મામાત્થ। ત્રિરયક્ષિ। વસવઃ પ્રાતઃસવનેનાગુઃ। રુદ્રા માધ્યંદિનેન સવનેન। આદિત્યાસ્તૃતીયસવનેન। અથ મમ યજ્ઞવાસ્ત્વેવ। યજ્ઞવાસ્તાવેવાહમાસ ઇતિ

સ હોવાચ। યજસ્વૈવ। અહં વૈ તે તદ્વક્ષ્યામિ। યથા ત ઉક્થ્યાનિ મણિરિવ સૂત્ર ઓતાનિ ભવિષ્યન્તિ। સૂત્રમિવ વા મણાવિતિ

તસ્મા ઉ હૈતદુવાચ। પ્રાતઃસવને બહિષ્પવમાન ઉદ્ગાતારમન્વરભાસૈ। શ્યેનોઽસિ ગાયત્રચ્છન્દા અનુ ત્વાઽઽરભે સ્વસ્તિ મા સંપારય ઇતિ

અથ માધ્યન્દિને પવમાને ઉદ્ગાતારમન્વારભાસૈ। સુપર્ણોઽસિ ત્રિષ્ટુપ્છન્દા અનુ ત્વાઽઽરભે સ્વસ્તિ મા સંપારય ઇતિ

અથ તૃતીયસવન આર્ભવે પવમાન ઉદ્ગાતારમન્વારભાસૈ। ઋભુરસિ જગચ્છન્દા અનુ ત્વાઽઽરભે સ્વસ્તિ મા સંપારય ઇતિ

અથ સંસ્થિતેષુ સંસ્થિતેષુ સવનેષુ જપેઃ। મયિ ભર્ગો મયિ મહો મયિ યશો મયિ સર્વમ્ ઇતિ

અયં વૈ લોકો ભર્ગઃ। અંતરિક્ષલોકો મહઃ।દ્યૌર્યશઃ। યેઽન્યે લોકાસ્તત્સર્વમ્

અગ્નિર્વૈ ભર્ગઃ। વાયુર્મહઃ। આદિત્યો યશઃ। યેઽન્યે દેવાસ્તત્સર્વમ્

ઋગ્વેદો વૈ ભર્ગઃ। યજુર્વેદો મહઃ। સામવેદો યશઃ। યેઽન્યે વેદાસ્તત્સર્વમ્

વાગ્વૈ ભર્ગઃ। પ્રાણો મહઃ। ચક્ષુર્યશઃ। યેઽન્યે પ્રાણાસ્તત્સર્વમ્

તદ્વિદ્યાત્ સર્વાન્ લોકાનાત્મન્નધિષિ। સર્વેષુ લોકેષુ આત્માનમધામ્। સર્વાન્ વેદાન્ આત્મન્નધિષિ સર્વેષુ વેદેષ્વાત્માનમધામ્। સર્વાન્ પ્રાણાનાત્મન્નધિષિ। સર્વેષુ પ્રાણેષ્વાત્માનમધામિતિ। અક્ષિતા વૈ લોકાઃ। અક્ષિતા દેવાઃ। અક્ષિતા વેદાઃ। અક્ષિતાઃ પ્રાણાઃ। અક્ષિતં સર્વમ્। અક્ષિતાદ્ધ વા અક્ષિતમુપસંક્રામતિ। અપ પુનર્મૃત્યું જયતિ। સર્વમાયુરેતિ। ય એવમેતદ્વેદ