Shatapatha Brahmana · Chapter 12.3.2

१२.३.२
puruṣo vai saṃvatsaraḥ/ puruṣa ityekam/ atra tatsamam/ dve vai saṃvatsarasyāhorātre/ dvāvimau puruṣe prāṇau/ atra tatsamam/ traya ṛtavaḥ saṃvatsarasya/ traya ime puruṣe prāṇāḥ/ atra tatsamam/ caturakṣaro vai saṃvatsaraḥ/ caturakṣaro'yaṃ yajamānaḥ/ atra tatsamam/ paṃcartavaḥ saṃvatsarasya/ paṃceme puruṣe prāṇāḥ/ atra tatsamam/ ṣaḍ ṛtavaḥ saṃvatsarasya/ ṣaḍime puruṣe prāṇāḥ/ atra tat samam/ saptartavaḥ saṃvatsarasya/ sapteme puruṣe prāṇāḥ/ atra tatsamam

dvādaśa vai māsāḥ saṃvatsarasya/ dvādaśeme puruṣe prāṇā-. atra tatsamam/ trayodaśa vai māsāḥ saṃvatsarasya/ trayodaśeme puruṣe prāṇāḥ/ nābhistrayodaśī/ atra tatsamam/ caturviṃśatirvai saṃvatsarasyārddhamāsāḥ/ caturviṃśo'yaṃ puruṣaḥ/ viṃśatyaṃguliḥ/ caturaṃgaḥ/ atra tatsamam/ ṣaḍviṃśatirvai saṃvatsarasyārddhamāsāḥ/ ṣaḍviṃśo'yaṃ puruṣaḥ/ pratiṣṭhe ṣaḍviṃśyau/ atra tatsamam

trīṇi ca vai śatāni ṣaṣṭiśca saṃvatsarasya rātrayaḥ/ trīṇi ca śatāni ṣaṣṭiśca puruṣasyāsthīni/ atra tatsamam/ trīṇi ca vai śatāni ṣaṣṭiśca saṃvatsarasyāhāni/ trīṇi ca śatāni ṣaṣṭiśca puruṣasya majjānaḥ/ atra tatsamam

sapta ca vai śatāni viṃśatiśca saṃvatsarasyāhorātrāṇi/ sapta ca śatāni viṃśatiśca puruṣasyāsthīni ca majjānaśca/ atra tatsamam

daśa ca vai sahasrāṇyaṣṭau ca śatāni saṃvatsarasya muhūrtāḥ/ yāvanto muhūrtāstāvanti paṃcadaśakṛtvaḥ kṣiprāṇi/ yāvanti kṣiprāṇi tāvanti paṃcadaśakṛtva etarhīṇi/ yāvantyetarhīṇi tāvanti paṃcadaśakṛtva idānīni/ yāvantīdānīni tāvantaḥ paṃcadaśakṛtvaḥ prāṇāḥ/ yāvantaḥ prāṇāstāvanto'ktanāḥ/ yāvanto'ktanāstāvanto nimeṣāḥ/ yāvaṃto nimeṣāstāvaṃto lomagartāḥ/ yāvanto lomagartāstāvanti svedāyanāni/ yāvaṃti svedāyanāni tāvaṃta ete stokā varṣaṃti

etaddha sma vai tadvidvānāha vārkaliḥ/ sārvabhaumaṃ meghaṃ varṣaṃtaṃ vedāham/ asya varṣasya stokāniti

tadeṣa śloko'bhyuktaḥ – śramādanyatra parivartamānastiṣṭhannāsīno yadi vā svapannapi/ ahorātrābhyāṃ puruṣaḥ samena katikṛtvaḥ prāṇiti cāpa cāniti iti

tadeṣa ślokaḥ pratyuktaḥ – śataṃ śatāni puruṣaḥ samenāṣṭau śatā yanmitaṃ tadvadaṃti/ ahorātrābhyāṃ puruṣaḥ samena tāvatkṛtvaḥ prāṇiti cāpa cāniti