શતપથબ્રાહ્મણમ્ · અધ્યાય 12.3.2

૧૨.૩.૨
પુરુષો વૈ સંવત્સરઃ। પુરુષ ઇત્યેકમ્। અત્ર તત્સમમ્। દ્વે વૈ સંવત્સરસ્યાહોરાત્રે। દ્વાવિમૌ પુરુષે પ્રાણૌ। અત્ર તત્સમમ્। ત્રય ઋતવઃ સંવત્સરસ્ય। ત્રય ઇમે પુરુષે પ્રાણાઃ। અત્ર તત્સમમ્। ચતુરક્ષરો વૈ સંવત્સરઃ। ચતુરક્ષરોઽયં યજમાનઃ। અત્ર તત્સમમ્। પંચર્તવઃ સંવત્સરસ્ય। પંચેમે પુરુષે પ્રાણાઃ। અત્ર તત્સમમ્। ષડ્ ઋતવઃ સંવત્સરસ્ય। ષડિમે પુરુષે પ્રાણાઃ। અત્ર તત્ સમમ્। સપ્તર્તવઃ સંવત્સરસ્ય। સપ્તેમે પુરુષે પ્રાણાઃ। અત્ર તત્સમમ્

દ્વાદશ વૈ માસાઃ સંવત્સરસ્ય। દ્વાદશેમે પુરુષે પ્રાણા-. અત્ર તત્સમમ્। ત્રયોદશ વૈ માસાઃ સંવત્સરસ્ય। ત્રયોદશેમે પુરુષે પ્રાણાઃ। નાભિસ્ત્રયોદશી। અત્ર તત્સમમ્। ચતુર્વિંશતિર્વૈ સંવત્સરસ્યાર્દ્ધમાસાઃ। ચતુર્વિંશોઽયં પુરુષઃ। વિંશત્યંગુલિઃ। ચતુરંગઃ। અત્ર તત્સમમ્। ષડ્વિંશતિર્વૈ સંવત્સરસ્યાર્દ્ધમાસાઃ। ષડ્વિંશોઽયં પુરુષઃ। પ્રતિષ્ઠે ષડ્વિંશ્યૌ। અત્ર તત્સમમ્

ત્રીણિ ચ વૈ શતાનિ ષષ્ટિશ્ચ સંવત્સરસ્ય રાત્રયઃ। ત્રીણિ ચ શતાનિ ષષ્ટિશ્ચ પુરુષસ્યાસ્થીનિ। અત્ર તત્સમમ્। ત્રીણિ ચ વૈ શતાનિ ષષ્ટિશ્ચ સંવત્સરસ્યાહાનિ। ત્રીણિ ચ શતાનિ ષષ્ટિશ્ચ પુરુષસ્ય મજ્જાનઃ। અત્ર તત્સમમ્

સપ્ત ચ વૈ શતાનિ વિંશતિશ્ચ સંવત્સરસ્યાહોરાત્રાણિ। સપ્ત ચ શતાનિ વિંશતિશ્ચ પુરુષસ્યાસ્થીનિ ચ મજ્જાનશ્ચ। અત્ર તત્સમમ્

દશ ચ વૈ સહસ્રાણ્યષ્ટૌ ચ શતાનિ સંવત્સરસ્ય મુહૂર્તાઃ। યાવન્તો મુહૂર્તાસ્તાવન્તિ પંચદશકૃત્વઃ ક્ષિપ્રાણિ। યાવન્તિ ક્ષિપ્રાણિ તાવન્તિ પંચદશકૃત્વ એતર્હીણિ। યાવન્ત્યેતર્હીણિ તાવન્તિ પંચદશકૃત્વ ઇદાનીનિ। યાવન્તીદાનીનિ તાવન્તઃ પંચદશકૃત્વઃ પ્રાણાઃ। યાવન્તઃ પ્રાણાસ્તાવન્તોઽક્તનાઃ। યાવન્તોઽક્તનાસ્તાવન્તો નિમેષાઃ। યાવંતો નિમેષાસ્તાવંતો લોમગર્તાઃ। યાવન્તો લોમગર્તાસ્તાવન્તિ સ્વેદાયનાનિ। યાવંતિ સ્વેદાયનાનિ તાવંત એતે સ્તોકા વર્ષંતિ

એતદ્ધ સ્મ વૈ તદ્વિદ્વાનાહ વાર્કલિઃ। સાર્વભૌમં મેઘં વર્ષંતં વેદાહમ્। અસ્ય વર્ષસ્ય સ્તોકાનિતિ

તદેષ શ્લોકોઽભ્યુક્તઃ – શ્રમાદન્યત્ર પરિવર્તમાનસ્તિષ્ઠન્નાસીનો યદિ વા સ્વપન્નપિ। અહોરાત્રાભ્યાં પુરુષઃ સમેન કતિકૃત્વઃ પ્રાણિતિ ચાપ ચાનિતિ ઇતિ

તદેષ શ્લોકઃ પ્રત્યુક્તઃ – શતં શતાનિ પુરુષઃ સમેનાષ્ટૌ શતા યન્મિતં તદ્વદંતિ। અહોરાત્રાભ્યાં પુરુષઃ સમેન તાવત્કૃત્વઃ પ્રાણિતિ ચાપ ચાનિતિ