Shatapatha Brahmana · Chapter 12.2.4

१२.२.४ gavāmayanīyasaṃvatsarasya puruṣavidhopāsanam/
puruṣo vai saṃvatsaraḥ/ tasya prāṇa eva prāyaṇīyo'tirātraḥ/ prāṇena hi prayanti/ vāgevāraṃbhaṇīyamahaḥ/ vācā hyārabhante/ tadyadārabhante

ayameva dakṣiṇo hasto'bhiplavaḥ ṣaḍahaḥ/ tasyedameva prathamamahaḥ/ tasyedameva prātaḥsavanam/ idaṃ mādhyaṃdinaṃ savanam/ idaṃ tṛtīyasavanam/ gāyatryā āyatane/ tasmādiyamāsāṃ hrasiṣṭhā

idameva dvitīyamahaḥ/ tasyedameva prātaḥsavanam/ idaṃ mādhyandinaṃ savanam/ idaṃ tṛtīyasavanam/ triṣṭubha āyatane/ tasmādiyamasmai varṣīyasī

idameva tṛtīyamahaḥ/ tasyedameva prātaḥsavanam/ idaṃ mādhyandinaṃ savanam/ idaṃ tṛtīyasavanam/ jagatyā āyatane/ tasmādiyamāsāṃ varṣiṣṭhā

idameva caturthamahaḥ/ tasyedameva prātaḥsavanam/ idaṃ mādhyandinaṃ savanam/ idaṃ tṛtīyasavanam/ virāja āyatane/ annaṃ vai virāṭ/ tasmādiyamāsāmannāditamā

idameva paṃcamamahaḥ/ tasyedameva prātaḥsavanam/ idaṃ mādhyandinaṃ savanam/idaṃ tṛtīyasavanam/ paṃkterāyatane/ pṛthuriva vai paṃktiḥ/ tasmādayamāsāṃ prathiṣṭhaḥ

idameva ṣaṣṭhamahaḥ/ tasyedameva prātaḥsavanam/ idaṃ mādhyaṃdinaṃ savanam/ idaṃ tṛtīyasavanam/ aticchaṃdasa āyatane/ tasmādayamāsāṃ varṣiṣṭhaḥ/ gāyatrametadaharbhavati/ tasmādidaṃ phalakaṃ hrasiṣṭham/ sa ito'bhiplavaḥ ṣaḍahaḥ/ sa itaḥ/ sa itaḥ/ sa ita ātmā pṛṣṭhyaḥ

etaddha sma vai tadvidvānāha paiṃgyaḥ/plavanta iva vā abhiplavāḥ/ tiṣṭhatīva pṛṣṭhya iti/ plavata iva hyayamaṃgaiḥ/ tiṣṭhatīvātmaneti

śira evāsya trivṛt/ tasmāttat trividhaṃ bhavati/ tvagasthi mastiṣkaḥ

grīvāḥ paṃcadaśaḥ/ caturdaśa vā etāsāṃ karūkarāṇi/ vīryaṃ paṃcadaśam/ tasmādetābhiraṇvībhiḥ satībhirguruṃ bhāraṃ harati/ tasmāt grīvā paṃcadaśaḥ

uraḥ saptadaśaḥ/ aṣṭāvanye jatravo'ṣṭāvanye/ uraḥ saptadaśam/ tasmāduraḥ saptadaśaḥ

udaramekaviṃśaḥ/ viṃśatirvā aṃtarudare kuṃtāpāni/ udaramekaviṃśam/ tasmādudaramekaviṃśaḥ

pārśve triṇavaḥ/ trayodaśānyāḥ parśavastrayodaśānyāḥ/ pārśve triṇave/ tasmātpārśve triṇavaḥ

anūkaṃ trayastriṃśaḥ/ dvātriṃśadvā etasya karūkarāṇi/ anūkaṃ trayastriṃśam/ tasmādanūkaṃ trayastriṃśaḥ

ayameva dakṣiṇaḥ karṇo'bhijit/ yadidamakṣṇaḥ śuklam/ sa prathamaḥ svarasāmā/ yat kṛṣṇaṃ, sa dvitīyaḥ/ yanmaṃḍalaṃ, sa tṛtīyaḥ/ nāsike viṣuvān/ yadidamakṣṇo maṃḍalam/ sa prathamo'rvāksāmā/ yat kṛṣṇaṃ, sa dvitīyaḥ/ yat śuklaṃ, sa tṛtīyaḥ

ayamevottaraḥ karṇo viśvajit/ uktau pṛṣṭhyābhiplavau/ yāvavāṃcau prāṇau, te goāyuṣī/ aṃgāni daśarātraḥ/ mukhaṃ mahāvratam/ udāna evodayanīyo'tirātraḥ/ udānena hyudyaṃti/ sa eṣa saṃvatsaro'dhyātmaṃ pratiṣṭhitaḥ sa yo haivametaṃ saṃvatsaramadhyātmaṃ pratiṣṭhitaṃ veda/ pratitiṣṭhati prajayā paśubhirasmin loke, amṛtatvenāmuṣmin