Shatapatha Brahmana · Chapter 12.2.3

१२.२.३.
sa vā eṣa saṃvatsaro bṛhatīmabhisaṃpannaḥ/ dvāvārkṣyatāmahnāṃ ṣaḍahau/ dvau pṛṣṭhyābhiplavau/ goāyuṣī/ daśarātraḥ/ tat ṣaṭtriṃśat/ ṣaṭtriṃśadakṣarā vai bṛhatī/ bṛhatyā vai devāḥ svarge loke'yatanta/ bṛhatyā svargaṃ lokamāpnuvan/ tathā u evaiṣa etad bṛhatyaiva svarge loke yatate/ bṛhatyā svargaṃ lokamāpnoti/ atha yo bṛhatyāṃ kāmaḥ/ tamevaitenaivamvidavaruṃdhe

yadvai caturviṃśamahaḥ/ daśarātrasya vai tatsaptamaṃ vā navamaṃ vā/ abhiplavāt pṛṣṭhyo nirmitaḥ/ pṛṣṭhyādabhijit/ abhijitaḥ svarasāmānaḥ/ svarasāmabhyo viṣuvān/ viṣuvataḥ svarasāmānaḥ/ svarasāmabhyo viśvajit/ viśvajitaḥ pṛṣṭhyaḥ/ pṛṣṭhyādabhiplavaḥ/ abhiplavāt goāyuṣī/ goāyurbhyāṃ daśarātraḥ

athaitadaharārkṣyat, yanmahāvratam/ paṃcaviṃśo hyetasya stomo bhavati/ nākṣarācchando vyetyekasmāt/ na dvābhyām/ na stotriyayā stomaḥ

abhiplavaṃ pūrvaṃ purastāt viṣuvata upayanti/ pṛṣṭhyamuttaram/ putrā vā abhiplavaḥ/ pitā pṛṣṭhyaḥ/ tasmāt pūrvavayase putrāḥ pitaramupajīvanti/ pṛṣṭhyamupariṣṭāt viṣuvataḥ pūrvamupayanti/ abhiplavamuttaram/ tasmāduttaravayase putrān pitopajīvati/ upa ha vā enaṃ pūrvavayase putrā jīvanti/ upottaravayase putrān jīvati/ ya evametadveda

tadāhuḥ – yaccaturviṃśamaharupetya preyāt/ kathamanāgūrtī bhavatīti/ yadevādaḥ prāyaṇīyamatirātramupayanti/ teneti brūyāt

tadāhuḥ – yat dvādaśa māsāḥ saṃvatsarasya/ athaitadaharatyeti/ yat vaiṣuvatam/ avareṣāmetā ३ tpareṣā ३ miti/ avareṣāṃ caiva pareṣāṃ ceti ha brūyāt/ ātmā vai saṃvatsarasya viṣuvān / aṃgāni māsāḥ/ yatra vā ātmā tadaṃgāni/ yatro aṃgāni tadātmā/ na vā ātmā aṃgānyatiricyate/ nātmānamaṃgānyatiricyante/ evamu haitat avareṣāṃ caiva pareṣāṃ ca bhavati

atha ha vā eṣa mahāsuparṇa eva/ yat saṃvatsaraḥ/ tasyā yān purastāt viṣuvataḥ ṣaṇmāsānupayanti/ saḥ anyataraḥ pakṣaḥ/ atha yān ṣaḍupariṣṭāt saḥ anyataraḥ/ ātmā viṣuvān/ yatra vā ātmā tatpakṣau/ yatra vā pakṣau tadātmā/ na vā ātmā pakṣāvatiricyate/ nātmānaṃ pakṣāvatiricyete/ evamu hai tat/ avareṣāṃ caiva pareṣāṃ ca bhavati

tadāhuḥ – yat purastāt viṣuvat ūrdhvān stomān ṣaṇmāsānupayanti/ ṣaḍupariṣṭādāvṛttān/ kathamasyaita ūrdhvāḥ stomā upetā bhavaṃtīti/ yamevāmumūrdhvastomaṃ daśarātramupayanti/ teneti brūyāt/ devebhyo ha vai mahāvrataṃ na tasthe/ kathamūrdhvai stomairviṣuvantamupāgāta/ āvṛttairmāmiti

te ha devā ūcuḥ/ upa taṃ yajñakratuṃ jānīta/ ya ūrdhvastomaḥ/ yenedamāpnavāmeti/ ta etamūrdhvastomaṃ daśarātramapaśyan saṃvatsaravidhan tasya yaḥ pṛṣṭhyaḥ ṣaḍahaḥ/ ṛtavaḥ saḥ/ ime lokāśchandomāḥ/ saṃvatsaro daśamamahaḥ/tenainadāpnuvan/ tadebhyo'tiṣṭhata/ tiṣṭhate ha vā asmai mahāvratam/ ya evametadveda

atha vā ato'hnāmabhyārohaḥ/ prāyaṇīyenātirātreṇodayanīyamatirātramabhyārohanti/ caturviṃśena mahāvratam/ abhiplavena paramabhiplavam/ pṛṣṭhyena paraṃ pṛṣṭhyam/ abhijitā viśvajitam/ svarasāmabhiḥ parān svarasāmnaḥ/ athaitadaharanabhyārūḍham/ yat vaiṣuvatam/ abhi ha vai śreyāṃsaṃ rohati/ nainaṃ pāpīyānabhyārohati/ ya evametadveda

atha vā ato'hnāṃ nivāhaḥ/ prāyaṇīyo'tirātraścaturviṃśāyāhne nivahati/ caturviṃśamaharabhiplavāya/ abhiplavaḥ pṛṣṭhyāya/ pṛṣṭhyo'bhijite/ abhijit svarasāmabhyaḥ/ svarasāmāno viṣuvate/ viṣuvān svarasāmabhyaḥ/ svarasāmāno viśvajite/ viśvajit pṛṣṭhyāya/ pṛṣṭhyo'bhiplavāya abhiplavo goāyurbhyām/ goāyuṣī daśarātrāya/ daśarātro mahāvratāya/ mahāvratamudayanīyāyātirātrāya/ udayanīyo'tirātraḥ svargāya lokāya pratiṣṭhāyā annādyāya

tāni vā etāni yajñāraṇyāni yajñakṛṃtatrāṇi/ tāni śataṃ śataṃ rathāhnyāni/ antareṇa tāni ye vidvāṃsa upayanti/ yathā''raṇyānyāṃ mugdhām̐ścarato'śanāyā vā pipāsā vā pāpmāno rakṣāṃsi saceran/ evaṃ haivainānaśanāyā vā pipāsā vā pāpmāno rakṣāṃsi sacaṃte/ atha ye vidvāṃso yathā pravāhātpravāhaṃ abhayādabhayam/ evaṃ haiva te devatāyai devatāmupasaṃyanti/ te svasti svargaṃ lokaṃ samaśnuvate

tadāhuḥ – kati saṃvatsarasyāhāni parāñci/ katyarvāṃcīti/ sa yāni sakṛtsakṛdupayanti/ tāni parāṃci/ atha yāni punaḥ punaḥ/ tānyarvāṃci iti ha tvevainānyupāsīta/ ṣaḍahayorhi āvṛttimanvāvartaṃte