Shatapatha Brahmana · Chapter 12.2.2

१२.२.२.
tadāhuḥ - kasmādubhayatojyotiṣo'bhiplavā bhavanti/ anyatojyotiḥ pṛṣṭhya iti/ ime vai lokā abhiplavāḥ/ ubhayatojyotiṣo vā ime lokāḥ – agninetaḥ, ādityenāmutaḥ/ ṛtavaḥ pṛṣṭhyaḥ/ anyatojyotiṣo vā ṛtavaḥ/ eṣa eṣāṃ jyotiḥ/ ya eṣa tapati

devacakre vā eta pṛṣṭhyapratiṣṭhite yajamānasya pāpmānaṃ tṛṃhatī pariplavete/ sa yo haivaṃ viduṣāṃ dīkṣitānāṃ pāpakaṃ satre kīrtayati/ ete hāsya devacakre śiraśchiṃtaḥ/ daśarātra uddhiḥ/ pṛṣṭhyābhiplavau cakre

tadāhuḥ – yatsame eva cakre bhavataḥ/ athaite viṣamāḥ/ stomāḥ/ kathamasyaite samā stomāḥ/ upetā bhavantīti/ yadeva ṣaḍanyānyahāni ṣaḍanyāni/ teneti brūyāt

pṛṣṭhyābhiplavau tantre kurvīta / iti ha smāha paiṃgyaḥ/ tayoḥ stotrāṇi ca śastrāṇi ca saṃcārayediti/ sa yatsaṃcārayati/ tasmādime prāṇā nānā santa ekotayaḥ samānamūtimanu sañcaranti/ atha yanna saṃcārayet/ pramāyuko yajamānaḥ syāt/ eṣa ha vai pramāyukaḥ/ yo'ndho vā badhiro vā

navāgniṣṭomā māsi saṃpadyante/ nava vai prāṇāḥ/ prāṇānevaiṣvetaddadhāti/ tathā sarvamāyuryanti/ tathā u ha na purā''yuṣo'smāllokātprayanti

ekaviṃśatirukthyāḥ/ dvādaśa vai māsāḥ saṃvatsarasya/ paṃcartavaḥ/ trayo lokāḥ/ tadviṃśatiḥ/ eṣaevaikaviṃśaḥ/ ya eṣa tapati etāmabhisaṃpadam/ sa etayā saṃpadā māsi māsi svargaṃ lokaṃ rohati/ māsaśaḥ svargaṃ lokaṃ samaśnute/ ekaviṃśaṃ ca stomaṃ bṛhatīṃ ca cchandaḥ

catustriṃśadagniṣṭomā māsi saṃpadyante/ trayastriṃśadvai devāḥ/ prajāpatiścatustriṃśaḥ/ sarvāsāṃ devatānāmāptyai/ eka ukthyaḥ ṣoḍaśimān/ annaṃ vā ukthyaḥ/ vīryaṃ ṣoḍaśī

etena vai devā vīryeṇānnena sarvān kāmānāpnuvan/ sarvān kāmānāśnuvata/ tathā u evaiṣa etena vīryeṇānnena sarvān kāmānāpnoti/ sarvān kāmānaśnute/ tasmāt pṛṣṭhyābhiplavāupaiveyāt – saṃvatsarāya dīkṣita etasmai kāmāya

athādityāśca ha vā aṃgirasaśca ubhaye prājāpatyā asparddhaṃta/ vayaṃ pūrve svargaṃ lokameṣyāmo vayaṃ pūrva iti

ta ādityāścaturbhiḥ stomaiścaturbhiḥ pṛṣṭhairlaghubhiḥ sāmabhiḥ svargaṃ lokamabhyaplavanta/ yadabhyaplavanta/ tasmādabhiplavāḥ

anvaṃca ivāṃgirasaḥ sarvaiḥ stomaiḥ sarvaiḥ pṛṣṭhairgurubhiḥ sāmabhiḥ svargaṃ lokamaspṛśan/ yadaspṛśan/ tasmāt pṛṣṭhyaḥ

abhiplavaḥ ṣaḍahaḥ/ ṣaḍḍhyahāni bhavanti/ abhiplavaḥ pañcāhaḥ/ pañca hyahāni bhavanti/ yaddhyeva prathamamahaḥ/ taduttamam/ abhiplavaścaturahaḥ/ catvāro hi stomā bhavanti/ trivṛt pañcadaśaḥ saptadaśa ekaviṃśa iti/ abhiplavastryahaḥ/ tryāvṛddhi jyotirgaurāyuḥ/ abhiplavo dvyahaḥ/ dve hyeva sāmanī bhavataḥ/ bṛhadrathantare eva/ abhiplava ekāhaḥ/ ekāhasya u hi stomaistāyate/ caturṇāmukthyānāṃ dvādaśa stotrāṇi dvādaśa śastrāṇyatiyanti/ sa saptamo'gniṣṭomaḥ/ evamu saptāgniṣṭomāḥ sampadyante

protirha kauśāṃbeyaḥ kausuribiṃdiruddālake āruṇau brahmacaryamuvāsa/ taṃ hācāryaḥ papraccha/ kumāra kati te pitā saṃvatsarasyāhānyamanyateti

daśeti hovāca/ daśa vā iti hovāca/ daśākṣarā virāṭ/ vairājo yajñaḥ

kati tveveti/ naveti hovāca/ nava vā iti hovāca/ nava vai prāṇāḥ/ prāṇairu yajñastāyate

kati tveveti/ aṣṭeti hovāca/ aṣṭau vā iti hovāca/ aṣṭākṣarā gāyatrī/ gāyatro yajñaḥ

kati tveveti/ sapteti hovāca/ sapta vā iti hovāca/ sapta cchaṃdāṃsi caturuttarāṇi/ chandobhiru yajñastāyate

kati tveveti/ ṣaḍiti hovāca/ ṣaḍvā iti hovāca/ ṣaḍ ṛtavaḥ saṃvatsaraḥ/ saṃvatsaro yajñaḥ/ samānametadahaḥ – yat prāyaṇīyodayanīyau

kati tveveti/ pañceti hovāca/ pañca vā iti hovāca/ pāṃkto yajñaḥ/ pāṃktaḥ paśuḥ/ paṃcartavaḥ saṃvatsarasya/ saṃvatsaro yajñaḥ/ samānametadahaḥ – yat caturviṃśamahāvrate

kati tveveti/ catvārīti hovāca/ catvāri vā iti hovāca/ catuṣpādāḥ paśavaḥ/ paśavo yajñaḥ/ samānametadahaḥ – yat pṛṣṭhyābhiplavau

kati tveveti/ trīṇīti hovāca/ trīṇi vā iti hovāca/ trīṇi cchaṃdāṃsi/ trayo lokāḥ/ trisavano yajñaḥ/ samānametadahaḥ – yadabhijidviśvajitau

kati tveveti/ dve iti hovāca/ dve vā iti hovāca/ dvipādvai puruṣaḥ/ puruṣo yajñaḥ/ samānametadahaḥ – yatsvarasāmānaḥ

kati tveveti/ ekamiti hovāca/ ahareveti/ tadetadaharahariti sarvaṃ saṃvatsaram/ saiṣā saṃvatsarasyopaniṣat/ sa yo haivametāṃ saṃvatsarasyopaniṣadaṃ veda/ ā hāsmāt śreyān jāyate/ sātmā bhavati/ saṃvatsaro bhavati/ saṃvatsaro bhūtvā devānapyeti