Shatapatha Brahmana · Chapter 12.2.1

१२.२.१ samvatsare samudraprataraṇopāsanam/
samudraṃ vā ete prataranti/ ye saṃvatsarāya dīkṣante/ tasya tīrthameva prāyaṇīyo'tirātraḥ/ tīrthena hi prasnāṃti/ tadyatprāyaṇīyamatirātramupayanti/ yathā tīrthena samudraṃ prasnāyuḥ/tādṛktat

gādhameva pratiṣṭhā caturviṃśamahaḥ/ yathopapakṣadaghnaṃ vā kaṃṭhadaghnaṃ vā yato viśramya prasnāṃti/ prasneyo'bhiplavaḥ/ prasneyaḥ pṛṣṭhyaḥ

gādhameva pratiṣṭhā'bhijit/ yathopapakṣadaghnaṃ vā kaṇṭhadaghnaṃ vā yato viśramyotkrāmanti/ ūrudaghna eva prathamaḥ svarasāmā/ jānudaghno dvitīyaḥ/ kulphadaghnastṛtīyaḥ/ dvīpaḥ pratiṣṭhā viṣuvān/ kulphadaghna eva prathamo'rvāksāmā/ jānudaghno dvitīyaḥ/ ūrudaghnastṛtīyaḥ

gādhameva pratiṣṭhā viśvajit/ yathopapakṣadaghnaṃ vā kaṇṭhadaghnaṃ vā yato viśramya prasnānti/ prasneyaḥ pṛṣṭhyaḥ/ prasneyo'bhiplavaḥ/ prasneyo goāyuṣī/ prasneyo daśarātraḥ

gādhameva pratiṣṭhā mahāvratam/ yathopapakṣadaghnaṃ vā kaṇṭhadaghnaṃ vā yato viśramyotsnānti/ tīrthamevodayanīyo'tirātraḥ/ tīrthena hyutsnānti/ tadyadudayanīyamatirātramupayanti/ yathā tīrthena samudraṃ prasnāya tīrthenotsnāyuḥ/ tādṛktat

tadāhuḥ – kati saṃvatsarasyātirātrāḥ/ katyagniṣṭomāḥ/ katyukthyāḥ/ kati ṣoḍaśinaḥ/ kati ṣaḍahā iti/ dvāvatirātrau/ ṣaṭśatamagniṣṭomāḥ/ dve catvāriṃśe śate ukthyānām/ iti nu ya ukthyān svarasāmna upayanti

atha ye'gniṣṭomān/ dvādaśaśatamagniṣṭomāḥ/ dve catustriṃśe śate ukthyānām/ dvādaśa ṣoḍaśinaḥ/ ṣaṣṭiḥ ṣaḍahāḥ/ iti nu saṃvatsarasyāptiḥ

dvādaśa vai māsāḥ saṃvatsarasya/ teṣāmetattejaḥ, iṃdriyaṃ – yatpṛṣṭhāni/ tadyanmāsi māsi pṛṣṭhānyupayanti/ māsaśa eva tatsaṃvatsarasya teja āpnuvanti/ atha kathaṃ trayodaśasya māsasya teja āpnuvanti iti/ upariṣṭāt viṣuvato viśvajitaṃ sarvapṛṣṭhamagniṣṭomamupayanti/ evamu trayodaśasya māsasya teja āpnuvanti

etaddha sma vai tadvidvānāha śvetaketurāruṇeyaḥ/ saṃvatsarāya nvā ahaṃ dīkṣiṣya iti/ taṃ ha pitopekṣyovāca/ vettha nvāyuṣman saṃvatsarasya gādhapratiṣṭhā iti/ vedeti hovāca/ taddha tadvidvānuvāca