શતપથબ્રાહ્મણમ્ · અધ્યાય 12.2.1

૧૨.૨.૧ સમ્વત્સરે સમુદ્રપ્રતરણોપાસનમ્।
સમુદ્રં વા એતે પ્રતરન્તિ। યે સંવત્સરાય દીક્ષન્તે। તસ્ય તીર્થમેવ પ્રાયણીયોઽતિરાત્રઃ। તીર્થેન હિ પ્રસ્નાંતિ। તદ્યત્પ્રાયણીયમતિરાત્રમુપયન્તિ। યથા તીર્થેન સમુદ્રં પ્રસ્નાયુઃ।તાદૃક્તત્

ગાધમેવ પ્રતિષ્ઠા ચતુર્વિંશમહઃ। યથોપપક્ષદઘ્નં વા કંઠદઘ્નં વા યતો વિશ્રમ્ય પ્રસ્નાંતિ। પ્રસ્નેયોઽભિપ્લવઃ। પ્રસ્નેયઃ પૃષ્ઠ્યઃ

ગાધમેવ પ્રતિષ્ઠાઽભિજિત્। યથોપપક્ષદઘ્નં વા કણ્ઠદઘ્નં વા યતો વિશ્રમ્યોત્ક્રામન્તિ। ઊરુદઘ્ન એવ પ્રથમઃ સ્વરસામા। જાનુદઘ્નો દ્વિતીયઃ। કુલ્ફદઘ્નસ્તૃતીયઃ। દ્વીપઃ પ્રતિષ્ઠા વિષુવાન્। કુલ્ફદઘ્ન એવ પ્રથમોઽર્વાક્સામા। જાનુદઘ્નો દ્વિતીયઃ। ઊરુદઘ્નસ્તૃતીયઃ

ગાધમેવ પ્રતિષ્ઠા વિશ્વજિત્। યથોપપક્ષદઘ્નં વા કણ્ઠદઘ્નં વા યતો વિશ્રમ્ય પ્રસ્નાન્તિ। પ્રસ્નેયઃ પૃષ્ઠ્યઃ। પ્રસ્નેયોઽભિપ્લવઃ। પ્રસ્નેયો ગોઆયુષી। પ્રસ્નેયો દશરાત્રઃ

ગાધમેવ પ્રતિષ્ઠા મહાવ્રતમ્। યથોપપક્ષદઘ્નં વા કણ્ઠદઘ્નં વા યતો વિશ્રમ્યોત્સ્નાન્તિ। તીર્થમેવોદયનીયોઽતિરાત્રઃ। તીર્થેન હ્યુત્સ્નાન્તિ। તદ્યદુદયનીયમતિરાત્રમુપયન્તિ। યથા તીર્થેન સમુદ્રં પ્રસ્નાય તીર્થેનોત્સ્નાયુઃ। તાદૃક્તત્

તદાહુઃ – કતિ સંવત્સરસ્યાતિરાત્રાઃ। કત્યગ્નિષ્ટોમાઃ। કત્યુક્થ્યાઃ। કતિ ષોડશિનઃ। કતિ ષડહા ઇતિ। દ્વાવતિરાત્રૌ। ષટ્શતમગ્નિષ્ટોમાઃ। દ્વે ચત્વારિંશે શતે ઉક્થ્યાનામ્। ઇતિ નુ ય ઉક્થ્યાન્ સ્વરસામ્ન ઉપયન્તિ

અથ યેઽગ્નિષ્ટોમાન્। દ્વાદશશતમગ્નિષ્ટોમાઃ। દ્વે ચતુસ્ત્રિંશે શતે ઉક્થ્યાનામ્। દ્વાદશ ષોડશિનઃ। ષષ્ટિઃ ષડહાઃ। ઇતિ નુ સંવત્સરસ્યાપ્તિઃ

દ્વાદશ વૈ માસાઃ સંવત્સરસ્ય। તેષામેતત્તેજઃ, ઇંદ્રિયં – યત્પૃષ્ઠાનિ। તદ્યન્માસિ માસિ પૃષ્ઠાન્યુપયન્તિ। માસશ એવ તત્સંવત્સરસ્ય તેજ આપ્નુવન્તિ। અથ કથં ત્રયોદશસ્ય માસસ્ય તેજ આપ્નુવન્તિ ઇતિ। ઉપરિષ્ટાત્ વિષુવતો વિશ્વજિતં સર્વપૃષ્ઠમગ્નિષ્ટોમમુપયન્તિ। એવમુ ત્રયોદશસ્ય માસસ્ય તેજ આપ્નુવન્તિ

એતદ્ધ સ્મ વૈ તદ્વિદ્વાનાહ શ્વેતકેતુરારુણેયઃ। સંવત્સરાય ન્વા અહં દીક્ષિષ્ય ઇતિ। તં હ પિતોપેક્ષ્યોવાચ। વેત્થ ન્વાયુષ્મન્ સંવત્સરસ્ય ગાધપ્રતિષ્ઠા ઇતિ। વેદેતિ હોવાચ। તદ્ધ તદ્વિદ્વાનુવાચ