Shatapatha Brahmana · Chapter 11.8.3

११.८.३ paśudevatāvikalpābhidhāyakaṃ brāhmaṇam
tadāhuḥ kiṃdevatya eṣa paśuḥ syāditi/ prājāpatyaḥ syādityāhuḥ prajāpatirvā etamagre'bhyapaśyattasmātprājāpatya evaiṣa paśuḥ syāditi -

atho apyāhuḥ/ saurya evaiṣa paśuḥ syāditi tasmādetasminnastamite paśavo badhyante badhnantyekānyathāgoṣṭhameka upasamāyanti tasmātsaurya evaiṣa paśuḥ syāditi -

atho apyāhuḥ/ aindrāgna evaiṣa paśuḥ syādityete vai devate anvanye devā yadyārto yajate pārayata eva yadi mahasā yajate pārayata eva tasmādaindrāgna evaiṣa paśuḥ syāditi -

prāṇa eva paśubandhaḥ/ tasmādyāvajjīvati nāsyānyaḥ paśūnāmīṣṭe baddhā hyasminnete bhavanti -

sa ha prajāpatiragnimuvāca/ yajai tvayā tvā''labhā iti neti hovāca vāyuṃ brūhīti sa ha vāyumuvāca yajai tvayā tvā''labhā iti neti hovāca puruṣaṃ brūhīti sa ha puruṣamuvāca yajai tvayā tvā''labhā iti neti hovāca paśūnbrūhīti sa ha paśūnuvāca yajai yuṣmābhirā vo labhā iti neti hocuścandramasaṃ brūhīti sa ha candramasamuvāca yajai tvayā tvā ''labhā iti neti hovācādityaṃ brūhīti sa hādityamuvāca yajai tvayā tvā''labhā iti tatheti hovāca ya u ta ete nācīkamanta kimu ma eteṣu syāditi yadyatkāmayethā iti tatheti tamālabhata so'syāyaṃ paśurālabdhaḥ saṃjñapto'śvayattametābhirāprībhirāprīṇāttadyadenametābhirāprībhirāprīṇāttasmādāpriyo nāma tasmādu paśuṃ saṃjñaptaṃ brūyācchetānnu muhūrtamiti sa yāvantamaśvamedheneṣṭvā lokaṃ jayati tāvantametena jayati -

taṃ prācī dik/ prāṇetyanuprāṇatprāṇamevāsmiṃstadadadhāttaṃ dakṣiṇādigvyānetyanuprāṇadvyānamevāsmiṃstadadadhāttaṃ pratīcī digapānetyanuprāṇadapānamevāsmiṃstadadadhāttamudīcī digudānetyanuprāṇadudānamevāsmiṃstadadadhāttamūrdhvā diksamānetyanuprāṇatsamānamevāsmiṃstadadadhāttasmādu putraṃ jātamakṛttanābhiṃ pañca brāhmaṇānbrūyādityenamanuprāṇiteti yadyu tānna vindedapi svayamevānuparikrāmamanuprāṇyātsa sarvamāyuretyā haiva jarāyai jīvati -

sa prāṇamevāgnerādatta/ tasmādeṣa nānupadhmāto nānupajvalito jvalatyātto hyasya
prāṇa ā ha vai dviṣato bhrātṛvyasya prāṇaṃ datte ya evaṃ veda -

rūpameva vāyorādatta/ tasmādetasya lelayata ivaivopaśṛṇvanti na tvenampaśyantyāttaṃ hyasya rūpamā ha vai dviṣato bhrātṛvyasya rūpaṃ datte ya evaṃ veda -

cittameva puruṣasyādatta/ tasmādāhurdevacittaṃ tvā'vatu mā manuṣyacittamityāttaṃ hyasya cittamā ha vai dviṣato bhrātṛvyasya cittaṃ datte ya evaṃ veda -

cakṣureva paśūnāmādatta tasmādete cākaśyamānā ivaiva na jānantyatha yadaivopajighrantyatha jānantyāttaṃ hyeṣāṃ cakṣurā ha vai dviṣato bhrātṛvyasya cakṣurddatte ya evaṃ veda -

bhāmeva candramasa ādatta/ tasmādetayoḥ sadṛśayoḥ satornatarāṃ candramā bhātyāttā hyasya bhā ā ha vai dviṣato bhrātṛvyasya bhāṃ datte ya evaṃ veda tadyadādatta tasmādādityaḥ -