Shatapatha Brahmana · Chapter 11.8.4

११.८.४ paśuprāyaścittīyāḥ spṛtihomāḥ
keśigṛhapatīnāmu ha/ samrāḍdughāṃ śārdūlo jaghāna saha sa sattriṇa āmantrayāṃcakre keha prāyaścittiriti te hocurneha prāyaścittirasti khaṇḍika evaudbhārirasya prāyaścittiṃ veda sa u ta etādṛkcaiva kāmayate'taśca pāpīya iti -

sa hovāca/ saṃgrahītaryuṅgdhi me syantsyāmi sa yadyaha me vakṣyati samāpsyāmi yadyu mā mārayiṣyati yajñaṃ vikṛṣṭamanu vikrakṣya iti -

sa ha yuktvā yayāvājagāma/ taṃ ha pratikhyāyovāca yannvetānyevājināni mṛgeṣu bhavantyathaiṣāṃ pṛṣṭīrapi śīrya pacāmahe kṛṣṇājinaṃ me grīvāsvābaddhamityeva medamadhṛṣo'bhyavasyanttū३miti -

neti hovāca/ samrāḍdughāṃ vai me bhagavaḥ śārdūlo'vadhītsa yadyaha me vakṣyasi samāpsyāmi yadyu mā mārayiṣyasi yajñaṃ vikṛṣṭamanu vikrakṣya iti -

sa hovāca/ āmantraṇīyānnvāmantrayā iti tānhāmantryovāca yadyasmai vakṣyāmyamuṣyaivedaṃ prajā bhaviṣyati na mama lokī tvahaṃ bhaviṣyāmi yadyu vā asmai na vakṣyāmi mamaivedaṃ prajā bhaviṣyati nāmuṣya lokī tvasau bhaviṣyatīti te hocurmā bhagavo voco'yaṃ vāva kṣatriyasya loka iti sa hovāca vakṣyāmyevāmūrvai rātrayo bhūyasya iti -

tasmā u haitaduvāca/ spṛtīrhutvānyāmājateti brūtātsā te samrāḍdughā syāditi candrāntte manaḥ spṛṇomi svāhā sūryātte cakṣu spṛṇomi svāhā vātātte prāṇāntspṛṇomi svāhā digbhyaste śrotraṃ spṛṇomi svāhā'dbhyaste lohitaṃ spṛṇomi svāhā pṛthivyai te śarīraṃ spṛṇomi svāhetyathānyāmājateti brūtātsā te samrāḍdughā syāditi tato haiva sa utsasāda kaiśinīrevemā apyetarhi prajā jāyante -