Scripture Library

Shatapatha Brahmana · Chapter 11.6.1

11.6.1.11.6.1.1

bhṛgurha vai vāruṇiḥ/ varuṇaṃ pitaraṃ vidyayā'timene taddha varuṇo vidāṃcakārāti vai mā vidyayā manyata iti -

11.6.1.11.6.1.2

sa hovāca prāṅputraka vrajatāttatra yatpaśyestaddṛṣṭvā dakṣiṇā vrajatāttatra yatpaśyestaddṛṣṭvā pratyagvrajatāttatra yatpaśyestaddṛṣṭvodagvrajatāttatra yatpaśyestaddṛṣṭvaitayoḥ pūrvayoruttaramanvavāntaradeśaṃ vrajatāttatra yatpaśyestanma ācakṣīthā iti -

11.6.1.11.6.1.3

sa ha tata eva prāṅpravavrāja edu puruṣaiḥ puruṣānparvāṇyeṣāṃ parvaśaḥ saṃvraścaṃ parvaśo vibhajamānānidaṃ tavedaṃ mameti sa hovāca bhīṣmaṃ bata bhoḥ puruṣānvā etatpuruṣāḥ parvāṇyeṣāṃ parvaśaḥ saṃvraścaṃ parvaśo vyabhakṣateti te hocuritthaṃ vā ime'smānamuṣmiṃloke'sacanta tānvayamidamiha pratisacāmahā iti sahovācāstīha prāyaścittī३ ityastīti kā'ti pitā te vedeti -

11.6.1.11.6.1.4

sa ha tata eva dakṣiṇā pravavrāja edu puruṣaiḥ puruṣānparvāṇyeṣāṃ parvaśaḥ saṃkartaṃ parvaśo vibhajamānānidaṃ tavedaṃ mameti sa hovāca bhīṣmaṃ bata bhoḥ puruṣānvā etatpuruṣāḥ parvāṇyeṣāṃ parvaśaḥ saṃkartaṃ parvaśo vyabhakṣateti te hocuritthaṃ vā ime'smānamuṣmiṃloke'sacanta tānvayamidamiha pratisacāmahā iti sa hovācāstīha prāyaścittī३ ityastīti kā'ti pitaiva te vedeti -

11.6.1.11.6.1.5

sa ha tata eva pratyaṅpravavrāja edu puruṣaiḥ puruṣāṃstūṣṇīmāsīnāṃstūṣṇīmāsīnairadyamānāntsa hovāca bhīṣmaṃ bata bhoḥ puruṣānvā etatpuruṣāstūṣṇīmāsīnāṃstūṣṇīmāsīnā adantīti te hocuritthaṃ vā ime'smānamuṣmiṃloke'sacanta tānvayamidamiha pratisacāmahā iti sa hovācāstīhaprāyaścittī३ ityastīti kā'ti pitaiva te vedeti -

11.6.1.11.6.1.6

sa ha tata evodaṅpravavrāja edu puruṣaiḥ puruṣānākrandayata ākrandayadbhiradyamānāntsa hovāca bhīṣmaṃ bata bhoḥ puruṣānvā etatpuruṣā ākrandayata ākrandayanto'dantīti te hocuritthaṃ vā ime'smānamuṣmiṃloke'sacanta tānvayamidamiha pratisacāmahā iti sa hovācāstīhaprāyaścittī३ ityastīti kā'ti pitaiva te vedeti -

11.6.1.11.6.1.7

sa ha tata evaitayoḥ pūrvayoḥ uttaramanvavāntaradeśaṃ pravavrājedu striyau kalyāṇīṃ cātikalyāṇīṃ ca te antareṇa puruṣaḥ kṛṣṇaḥ piṅgākṣo daṇḍapāṇistasthau taṃ hainaṃ dṛṣṭvā bhīrviveda sa hetya saṃviveśa taṃ ha pitovācādhīṣva svādhyāyaṃ kasmānnu svādhyāyaṃ nādhīṣa iti sa hovāca kimadhyeṣye na kiṃ canāstīti taddha varuṇo vidāṃcakārādryagvā iti -

11.6.1.11.6.1.8

sa hovāca/ yānvai tatprācyāṃ diśyadrākṣīḥ puruṣaiḥ puruṣānparvāṇyeṣāṃ parvaśaḥ saṃvraścaṃ parvaśo vibhajamānānidaṃ tavedaṃ mameti vanaspatayo vai te abhūvantsa yadvanaspatīnāṃ samidhamādadhāti tena vanaspatīnavarunddhe tena vanaspatīnāṃ lokaṃ jayati -

11.6.1.11.6.1.9

atha yānetataddakṣiṇāyāṃ diśyadrākṣīḥ/ puruṣaiḥ puruṣānparvāṇyeṣāṃ parvaśaḥ saṃkartaṃ parvaśo vibhajamānānidaṃ tavedaṃ mameti paśavo vai te abhūvantsa yatpayasā juhoti tena paśūnavarundhe tena paśūnāṃ lokaṃ jayati -

11.6.1.11.6.1.10

atha yānetatpratīcyāṃ diśyadrākṣīḥ/ puruṣaiḥ puruṣāṃstūṣṇīmāsīnāṃstūṣṇīmāsīnairadyamānānoṣadhayo vai tā abhūvantsa yattṛṇenāvajyotayati tenauṣadhīravarunddhe tenauṣadhīnāṃ lokaṃ jayati -

11.6.1.11.6.1.11

atha yānetadudīcyāṃ diśyadrākṣīḥ/ puruṣaiḥ puruṣānākrandayata ākrandayadbhiradyamānānāpo vai tā abhūvantsa yadapaḥ pratyānayati tenāpo'varunddhe tenāpāṃ lokaṃ jayati -

11.6.1.11.6.1.12

atha ye ete striyāvadrākṣīḥ/ kalyāṇīṃ cātikalyāṇīṃ ca sā yā kalyāṇī sā śraddhā sa yatpūrvāmāhutiṃ juhoti tena śraddhāmavarunddhe tena śraddhāṃ jayatyatha yā'tikalyāṇī sā'śraddhā sa yaduttarāmāhutiṃ juhoti tenāśraddhāmavarunddhe tenāśraddhāṃ jayati -

11.6.1.11.6.1.13

atha ya ete/ so'ntareṇa puruṣaḥ kṛṣṇaḥ piṅgākṣo daṇḍapāṇirasthātkrodho vai so'bhūtsa yatsrucyapa ānīya ninayati tena krodhamavarunddhe tena krodhaṃ jayati sa ya evaṃ vidvānagnihotraṃ juhoti tena sarvaṃ jayati sarvamavarunddhe -

Original text: śatapathabrāhmaṇam · Sanskrit Wikisource contributors · Sanskrit Wikisource · CC BY-SA 4.0