Scripture Library

Shatapatha Brahmana · Chapter 11.6.2

11.6.2.11.6.2.1

janako ha vai vaideho/ brāhmaṇairdhāvayadbhiḥ samājagāma śvetaketunā''ruṇeyena somaśuṣmeṇa sātyayajñinā yājñavalkyena tānhovāca kathaṅkathamagnihotrañjuhutheti -

11.6.2.11.6.2.2

sa hovāca śvetaketurāruṇeyaḥ/ gharmāveva samrāḍahamajasrau yaśasā viṣyandamānāvanyo'nyasmiñjuhomīti kathaṃ tadityādityo vai gharmastaṃ sāyamagnau juhomyagnirvai gharmastaṃ prātarāditye juhomīti kiṃ sa bhavati ya evaṃ juhotyajasra eva śriyā yaśasā bhavatyetayośca devatayoḥ sāyujyaṃ salokatāṃ jayatīti -

11.6.2.11.6.2.3

atha hovāca somaśuṣmaḥ sātyayajñiḥ/ teja eva samrāḍahaṃ tejasi juhomīti kathaṃ tadityādityo vai tejastaṃ sāyamagnau juhomyagnirvai tejastaṃ prātarāditye juhomīti kiṃ sa bhavati ya evaṃ juhotīti tejasvī yaśasvyannādo bhavatyetayoścaiva devatayoḥ sāyujyaṃ salokatāṃ jayatīti -

11.6.2.11.6.2.4

atha hovāca yājñavalkyaḥ/ yadahamagnimuddharāmyagnihotrameva tadudyacchāmyādityaṃ vā astaṃ yantaṃ sarve devā anuyanti te ma etamagnimuddhṛtaṃ dṛṣṭvopāvartante'thāhaṃ pātrāṇi nirṇijyopavāpyāgnihotrīṃ dohayitvā paśyanpaśyatastarpayāmīti tvaṃ nediṣṭhaṃ yājñavalkyāgnihotrasyāmīmāṃsiṣṭhā dhenuśataṃ dadāmīti hovāca na tvevainayostvamutkrāntiṃ na gatiṃ na pratiṣṭhāṃ na tṛptiṃ na punarāvṛttiṃ na lokaṃ pratyutthāyinamityuktvā rathamāsthāya pradhāvayāṃcakāra -

11.6.2.11.6.2.5

te hocuḥ ati vai no'yaṃ rājanyabandhuravādīddhantainaṃ brahmodyamāhvayāmahā iti sa hovāca yājñavalkyo brāhmaṇā vai vayaṃ smo rājanyabandhurasau yadyamuṃ vayaṃ jayema kamajaiṣmeti brūyāmātha yadyasāvasmāñjayedbrāhmaṇānrājanyabandhurajaiṣīditi no brūyurmedamādṛḍhvamiti taddhāsya jajñuratha ha yājñavalkyo rathamāsthāyānupradhāvayāṃcakāra taṃ hānvājagāma sa hovācāgnihotraṃ yājñavalkya veditū३ ityagnihotraṃ samrāḍiti -

11.6.2.11.6.2.6

te vā ete āhutī hute utkrāmataḥ/ te antarikṣamāviśataste antarikṣamevāhavanīyaṃ kurvāte vāyuṃ samidhaṃ marīcīreva śukrāmāhutiṃ te antarikṣaṃ tarpayataste tata utkrāmataḥ -

11.6.2.11.6.2.7

te divamāviśataḥ/ te divamevāhavanīyaṃ kurvāte ādityaṃ samidhaṃ candramasameva śukrāmāhutiṃ te divaṃ tarpayataste tata āvartete -

11.6.2.11.6.2.8

te imāmāviśataḥ/ te imāmevāhavanīyaṃ kurvāte agniṃ samidhamoṣadhīreva śukrāmāhutiṃ te imāṃ tarpayataste tata utkrāmataḥ -

11.6.2.11.6.2.9

te puruṣamāviśataḥ/ tasya mukhamevāhavanīyaṃ kurvāte jihvāṃ samidhamannameva śukrāmāhutiṃ te puruṣaṃ tarpayataḥ sa ya evaṃ vidvānaśnātyagnihotramevāsya hutaṃ bhavati te tata utkrāmataḥ -

11.6.2.11.6.2.10

te striyamāviśataḥ/ tasyā upasthamevāhavanīyaṃ kurvāte dhārakāṃ samidhaṃ dhārakā ha vai nāmaiṣaitayā ha vai prajāpatiḥ prajā dhārayāṃcakāra reta eva śukrāmāhutiṃ te striyaṃ tarpayataḥ sa ya evaṃ vidvānmithunamupaityagnihotramevāsya hutambhavati yastataḥ putro jāyate sa lokaḥ pratyutthāyyetadagnihotraṃ yājñavalkya nātaḥ paramastīti hovāca tasmai ha yājñavalkyo varaṃ dadau sa hovāca kāmapraśna eva me tvayi yājñavalkyāsaditi tato brahmā janaka āsa -

Original text: śatapathabrāhmaṇam · Sanskrit Wikisource contributors · Sanskrit Wikisource · CC BY-SA 4.0