Shatapatha Brahmana · Chapter 11.5.9

prajāpatirha vā eṣa yadaṃśuḥ/ so'syaiṣa ātmaivātmā hyayaṃ prajāpatirvāgevādābhyaḥ sa yadaṃśuḥ gṛhītvādābhyaṃ gṛhṇātyātmānamevāsyaitatsaṃskṛtya tasminnetāṃ vācampratiṣṭhāpayati -

atha mano ha vā aṃśuḥ/ vāgadābhyaḥ prāṇa evāṃśurudāno'dābhyaścakṣurevāṃśuḥ śrotramadābhyastadyadetau grahau gṛhṇanti sarvatvāyaiva kṛtsnatāyai -

atha devāśca ha vā asurāśca ubhaye prājāpatyā aspardhanta ta etasminneva yajñe prajāpatāvaspardhantāsmākamayaṃ syādasmākamayaṃ syāditi -

tato devāḥ arcantaḥ śrāmyantaścerusta etaṃ grahaṃ dadṛśuretamadābhyaṃ tamagṛhṇata te savanāni prāvṛhanta te sarvaṃ yajñaṃ samavṛñjatāntarāyannasurānyajñāt -

te hocuḥ adabhāma vā enāniti tasmādadābhyo na vai no'dabhanniti tasmādadābhyo vāgvā adābhyaḥ seyamadabdhā vāktasmādvevādābhya evaṃ ha vai dviṣato bhrātṛvyasya sarvaṃ yajñaṃ saṃvṛṅkta evaṃ dviṣantaṃ bhrātṛvyaṃ sarvasmādyajñānnirbhajati bahirddhā karoti ya u evametadveda -

sa yenaiva pātreṇāṃśuṃ gṛhṇāti/ tasminneva pātre nigrābhyābhyo'pa ānīya tasminnetānaṃśūngṛhṇāti -

upayāmagṛhīto'si/ agnaye tvā gāyatracchandasaṃ gṛhṇāmīti gāyatraṃ prātaḥsavanaṃ tatprātaḥsavanaṃ pravṛhatīndrāya tvā triṣṭupchandasaṃ gṛhṇāmīti traiṣṭubhammādhyandinaṃ savanaṃ tanmādhyandinaṃ savanaṃ pravṛhati viśvebhyastvā devebhyo jagacchandasaṃ gṛhṇāmīti jāgataṃ tṛtīyasavanaṃ tattṛtīyasavana pravṛhatyanuṣṭupte'bhigara iti yadvā ūrdhvaṃ savanebhyastadānuṣṭubhaṃ tadevaitatpravṛhati tannābhiṣuṇoti vajro vai grāvā vāgadābhyo nedvajreṇa vācaṃ hinasānīti -

aṃśūnevādhūnoti/ vreśīnāṃ tvā patmannādhūnomi kukūnanānāṃ tvā patmannādhūnomi bhandanānāṃ tvā patmannādhūnomi madintamānāṃ tvāpatmannādhūnomi madhuntamānāṃ tvā patmannādhūnomītyetā vai daivīrāpastadyāścaiva daivīrāpo yāścemā mānuṣyastābhirevāsminnetadubhayībhī rasaṃ dadhāti -

śukraṃ tvā śukra ādhūnomīti śukraṃ hyetacchukra ādhūnotyahno rūpe sūryasya raśmiṣviti tadahnaścaivainametadrūpe sūryasya ca raśmiṣvādhūnoti -

kakubhaṃ rūpaṃ vṛṣabhasya rocate bṛhaditi/ etadvai kakubhaṃ rūpaṃ vṛṣabhasya rocate bṛhadya eṣa tapati śukraḥ śukrasya purogāḥ somaḥ somasya purogā iti tacchukramevaitacchukrasya purogāṃ karoti somaṃ somasya purogāṃ yatte somādābhyannāma jāgṛvi tasmai tvā gṛhṇāmītyetaddha vā asyādābhyaṃ nāma jāgṛvi yadvāktadvācamevaitadvāce gṛhṇāti -

athopaniṣkramya juhoti/ tasmai te soma somāya svāheti tatsomamevaitatsomāya juhoti tatho vācamagnau na pravṛṇaktyatha hiraṇyamabhivyanityasāveva bandhustasya tāvatīreva dakṣiṇā yāvatīraṃśoḥ -

athāṃśūnpunarapyarjati/ uśiktvaṃ deva somāgneḥ priyaṃ pātho'pīhi vaśī tvaṃ deva somendrasya priyaṃ pātho'pīhyasmatsakhā tvaṃ deva soma viśveṣāṃ devānāmpriyaṃ pātho'pīhīti savanāni vā adaḥ pravṛhati tānyevaitatpunarāpyāyayatyayātayāmāni karoti tairayātayāmairyajñaṃ tanvate -