Shatapatha Brahmana · Chapter 11.5.8

११.५.८ sarvaprāyaścittavidhāyakaṃ brāhmaṇam
prajāpatirvā idamagra āsīt eka eva/ so'kāmayata syāṃ prajāyeyeti so'śrāmyatsa tapo'tapyata tasmācchrāntāttepānāttrayo lokā asṛjyanta pṛthivyantarikṣaṃ dyauḥ -

sa imāṃstrīṃlokānabhitatāpa/ tebhyastaptebhyastrīṇi jyotīṃṣyajāyantāgniryo'yaṃ pavate sūryaḥ -

sa imāni trīṇi jyotīṃṣyabhitatāpa/ tebhyastaptebhyastrayo vedā ajāyantāgnerṛgvedo
vāyoryajurvedaḥ sūryātsāmavedaḥ -

sa imāṃstrīnvedānabhitatāpa tebhyastaptebhyastrīṇi śukrāṇyajāyanta bhūrityṛgvedādbhuva iti yajurvedātsvariti sāmavedāttadṛgvedenaiva hotramakurvata yajurvedenādhvaryavaṃ sāmavedenodgīthaṃ yadeva trayyai vidyāyai śukraṃ tena brahmatvamathoccakrāma -

te devāḥ prajāpatimabruvan/ yadi na ṛkto vā yajuṣṭo vā sāmato vā yajñohvaletkenainaṃ bhiṣajyemeti -

sa hovāca yadyṛkto bhūriti caturgṛhītamājyaṃ gṛhītvā gārhapatye juhavatha yadi yajuṣṭo bhuva iti caturgṛhītamājyaṃ gṛhītvā''gnīdhrīye juhavathānvāhāryapacane vā haviryajñe yadi sāmataḥ svariti caturgṛhītamājyaṃ gṛhītvā''havanīye juhavatha yadyu avijñātamasatsarvāṇyanudrutyāhavanīye juhavatha tadṛgvedenaivargvedaṃ bhiṣajyati yajurvedena yajurvedaṃ sāmavedena sāmavedaṃ sa yathā parvaṇā parva saṃdadhyādevaṃ haiva sa saṃdadhāti ya etābhirbhiṣajyatyatha yo hāto'nyena bhiṣajyati yathā śīrṇena śīrṇaṃ saṃdhitsedyathā vā śīrṇe garamabhinidadhyādevaṃ tattasmādevaṃvidameva brahmāṇaṃ kurvīta nānevaṃvidam -

tadāhuḥ yadṛcā hautraṃ kriyate yajuṣādhvaryavaṃ sāmnodgītho'tha kena brahmatvamityanayā trayyā vidyayeti ha brūyāt -