શતપથબ્રાહ્મણમ્ · અધ્યાય 11.5.8

૧૧.૫.૮ સર્વપ્રાયશ્ચિત્તવિધાયકં બ્રાહ્મણમ્
પ્રજાપતિર્વા ઇદમગ્ર આસીત્ એક એવ। સોઽકામયત સ્યાં પ્રજાયેયેતિ સોઽશ્રામ્યત્સ તપોઽતપ્યત તસ્માચ્છ્રાન્તાત્તેપાનાત્ત્રયો લોકા અસૃજ્યન્ત પૃથિવ્યન્તરિક્ષં દ્યૌઃ -

સ ઇમાંસ્ત્રીંલોકાનભિતતાપ। તેભ્યસ્તપ્તેભ્યસ્ત્રીણિ જ્યોતીંષ્યજાયન્તાગ્નિર્યોઽયં પવતે સૂર્યઃ -

સ ઇમાનિ ત્રીણિ જ્યોતીંષ્યભિતતાપ। તેભ્યસ્તપ્તેભ્યસ્ત્રયો વેદા અજાયન્તાગ્નેરૃગ્વેદો
વાયોર્યજુર્વેદઃ સૂર્યાત્સામવેદઃ -

સ ઇમાંસ્ત્રીન્વેદાનભિતતાપ તેભ્યસ્તપ્તેભ્યસ્ત્રીણિ શુક્રાણ્યજાયન્ત ભૂરિત્યૃગ્વેદાદ્ભુવ ઇતિ યજુર્વેદાત્સ્વરિતિ સામવેદાત્તદૃગ્વેદેનૈવ હોત્રમકુર્વત યજુર્વેદેનાધ્વર્યવં સામવેદેનોદ્ગીથં યદેવ ત્રય્યૈ વિદ્યાયૈ શુક્રં તેન બ્રહ્મત્વમથોચ્ચક્રામ -

તે દેવાઃ પ્રજાપતિમબ્રુવન્। યદિ ન ઋક્તો વા યજુષ્ટો વા સામતો વા યજ્ઞોહ્વલેત્કેનૈનં ભિષજ્યેમેતિ -

સ હોવાચ યદ્યૃક્તો ભૂરિતિ ચતુર્ગૃહીતમાજ્યં ગૃહીત્વા ગાર્હપત્યે જુહવથ યદિ યજુષ્ટો ભુવ ઇતિ ચતુર્ગૃહીતમાજ્યં ગૃહીત્વાઽઽગ્નીધ્રીયે જુહવથાન્વાહાર્યપચને વા હવિર્યજ્ઞે યદિ સામતઃ સ્વરિતિ ચતુર્ગૃહીતમાજ્યં ગૃહીત્વાઽઽહવનીયે જુહવથ યદ્યુ અવિજ્ઞાતમસત્સર્વાણ્યનુદ્રુત્યાહવનીયે જુહવથ તદૃગ્વેદેનૈવર્ગ્વેદં ભિષજ્યતિ યજુર્વેદેન યજુર્વેદં સામવેદેન સામવેદં સ યથા પર્વણા પર્વ સંદધ્યાદેવં હૈવ સ સંદધાતિ ય એતાભિર્ભિષજ્યત્યથ યો હાતોઽન્યેન ભિષજ્યતિ યથા શીર્ણેન શીર્ણં સંધિત્સેદ્યથા વા શીર્ણે ગરમભિનિદધ્યાદેવં તત્તસ્માદેવંવિદમેવ બ્રહ્માણં કુર્વીત નાનેવંવિદમ્ -

તદાહુઃ યદૃચા હૌત્રં ક્રિયતે યજુષાધ્વર્યવં સામ્નોદ્ગીથોઽથ કેન બ્રહ્મત્વમિત્યનયા ત્રય્યા વિદ્યયેતિ હ બ્રૂયાત્ -