Shatapatha Brahmana · Chapter 11.5.7

११.५.७ brahmayajñalakṣaṇasvādhyāyapraśaṃsākhyaṃ brāhmaṇam
athātaḥ svādhyāyapraśaṃsā/ priye svādhyāyapravacane bhavato yuktamanā bhavatyaparādhīno'harahararthāntsādhayate sukhaṃ svapiti paramacikitsaka ātmano bhavatīndriyasaṃyamaścaikārāmatā ca prajñāvṛddhiryaśo lokapaktiḥ prajñā vardhamānā caturo dharmānbrāhmaṇamabhiniṣpādayati brāhmaṇyampratirūpacaryāṃ yaśo lokapaktiṃ lokaḥ pacyamānaścaturbhirdharmairbrāhmaṇaṃ bhunaktyarcayā ca dānena cājyeyatayā cāvadhyatayā ca -

ye ha vai ke ca śramāḥ/ ime dyāvāpṛthivī antareṇa svādhyāyo haiva teṣāṃ paramatākāṣṭhā ya evaṃ vidvāntsvādhyāyamadhīte tasmātsvādhyāyo'dhyetavyaḥ -

yadyaddha vā ayaṃ chandasaḥ/ svādhyāyamadhīte tena tena haivāsya yajñakratuneṣṭaṃ bhavati ya evaṃ vidvāntsvādhyāyamadhīte tasmātsvādhyāyo'dhyetavyaḥ -

yadi ha vā apyabhyaktaḥ alaṃkṛtaḥ suhitaḥ sukhe śayane śayānaḥ svādhyāyamadhīta ā haiva sa nakhāgrebhyastapyate ya evaṃ vidvāntsvādhyāyamadhīte tasmātsvādhyāyo'dhyetavyaḥ -

madhu ha vā ṛcaḥ/ ghṛtaṃ ha sāmānyamṛtaṃ yajūṃṣi yaddha vā ayaṃ vākovākyamadhīte kṣīraudanamāṃsaudanau haiva tau -

madhunā ha vā eṣa devāṃstarpayati/ ya evaṃ vidvānṛco'harahaḥ svādhyāyamadhīte ta enaṃ tṛptāstarpayanti sarvaiḥ kāmaiḥ sarvairbhogaiḥ -

ghṛtena ha vā eṣa devāṃstarpayati/ ya evaṃ vidvāntsāmānyaharahaḥ svādhyāyamadhīte ta enaṃ tṛptāstarpayanti sarvaiḥ kāmaiḥ sarvairbhogaiḥ -

amṛtena ha vā eṣa devāṃstarpayati/ ya evaṃ vidvānyajūṃṣyaharahaḥ svādhyāyamadhīte ta enaṃ tṛptāstarpayanti sarvaiḥ kāmaiḥ sarvairbhogaiḥ -

kṣīraudanamāṃsaudanābhyāṃ ha vā eṣa devāṃstarpayati/ ya evaṃ vidvānvākovākyamitihāsapurāṇamityaharahaḥ svādhyāyamadhīte ta enaṃ tṛptāstarpayanti sarvaiḥ kāmaiḥ sarvairbhogaiḥ -

yanti vā āpaḥ/ etyāditya eti candramā yanti nakṣatrāṇi yathā ha vā etā devatā neyurna kuryurevaṃ haiva tadaharbrāhmaṇo bhavati yadahaḥ svādhyāyaṃ nādhīte tasmātsvādhyāyo'dhyetavyastasmādapyṛcaṃ vā yajurvā sāma vā gāthāṃ vā kuṃbyāṃ vābhivyāharedvratasyāvyavacchedāya -