Shatapatha Brahmana · Chapter 11.5.6

११.५.६ pañcamahāyajñabrāhmaṇam
pañcaiva mahāyajñāḥ/ tānyeva mahāsattrāṇi bhūtayajño manuṣyayajñaḥ pitṛyajño devayajño brahmayajña iti -

aharaharbhūtebhyo baliṃ haret tathaitaṃ bhūtayajñaṃ samāpnotyaharahardadyādodapātrāttathaitaṃ manuṣyayajñaṃ samāpnotyaharahaḥ svadhākuryādodapātrāttathaitaṃ pitṛyajñaṃ samāpnotyaharahaḥ svāhākuryādā kāṣṭhāttathaitaṃ devayajñaṃ samāpnoti -

ā
atha brahmayajñaḥ/ svādhyāyo vai brahmayajñastasya vā etasya brahmayajñasya vāgeva juhūrmana upabhṛccakṣurdhruvā medhā sruvaḥ satyamavabhṛthaḥ svargo loka udayanaṃ yāvantaṃ ha vā imāṃ pṛthivīṃ vittena pūrṇāṃ dadallokaṃ jayati tristāvantaṃ jayati bhūyāṃsaṃ cākṣayyaṃ ya evaṃ vidvānaharahaḥ svādhyāyamadhīte tasmātsvādhyāyo'dhyetavyaḥ -

paya'āhutayo ha vā etā devānām/ yadṛcaḥ sa ya evaṃ vidvānṛco'harahaḥ svādhyāyamadhīte paya'āhutibhireva taddevāṃstarpayati ta enaṃ tṛptāstarpayanti yogakṣemeṇa prāṇena retasā sarvātmanā sarvābhiḥ puṇyābhiḥ sampadbhirghṛtakulyā madhukulyāḥ pitṝntsvadhā abhivahanti -

ājyāhutayo ha vā etā devānām yadyajūṃṣi sa ya evaṃ vidvānyajūṃṣyaharahaḥ svādhyāyamadhīta ājyāhutibhireva taddevāṃstarpayati ta enaṃ tṛptāstarpayanti yogakṣemeṇa prāṇena retasā sarvātmanā sarvābhiḥ puṇyābhiḥ sampadbhirghṛtakulyā madhukulyāḥ pitṝntsvadhā abhivahanti -

somāhutayo ha vā etā devānām yatsāmāni sa ya evaṃ vidvāntsāmānyaharahaḥ svādhyāyamadhīte somāhutibhireva taddevāṃstarpayati ta enaṃ tṛptāstarpayanti yogakṣemeṇa prāṇena retasā sarvātmanā sarvābhiḥ puṇyābhiḥ sampadbhirghṛtakulyā madhukulyāḥ pitṝntsvadhā abhivahanti -

meda'āhutayo ha vā etā devānām/ yadatharvāṅgirasaḥ sa ya evaṃvidvānatharvāṅgiraso'harahaḥ svādhyāyamadhīte meda'āhutibhireva taddevāṃstarpayati ta enaṃ tṛptāstarpayanti yogakṣemeṇa prāṇena retasā sarvātmanā sarvābhiḥ puṇyābhiḥ sampadbhirghṛtakulyā madhukulyāḥ pitṝntsvadhā abhivahanti -

madhvāhutayo ha vā etā devānām/ yadanuśāsanāni vidyā vākovākyamitihāsapurāṇaṃ
gāthā nārāśaṃsyaḥ sa ya evaṃ vidvānanuśāsanāni vidyā vākovākyamitihāsapurāṇaṃ gāthā nārāśaṃsīrityaharahaḥ svādhyāyamadhīte madhvāhutibhireva taddevāṃstarpayati ta enaṃ tṛptāstarpayanti yogakṣemeṇa prāṇena retasā sarvātmanā sarvābhiḥ puṇyābhiḥ sampadbhirghṛtakulyā madhukulyāḥ pitṝntsvadhā abhivahanti -

tasya vā etasya brahmayajñasya catvāro vaṣaṭkārā yadvāto vāti yadvidyotate yatstanayati yadavasphūrjati tasmādevaṃvidvāte vāti vidyotamāne stanayatyavasphūrjatyadhīyītaiva vaṣaṭkārāṇāmacchambaṭkārāyāti ha vai punarmṛtyummucyate gacchati brahmaṇaḥ sātmatāṃ sa cedapi prabalamiva na śaknuyādapyekaṃ devapadamadhīyītaiva tathā bhūtebhyo na hīyate -