Shatapatha Brahmana · Chapter 11.5.3

śauceyo ha prācīnayogyaḥ/ uddālakamāruṇimājagāma brahmodyamagnihotraṃ vividiṣiṣyāmīti -

sa hovāca/ gautama kā te'gnihotrī ko vatsaḥ kimupasṛṣṭā kiṃ saṃyojanaṃ kiṃ duhyamānaṃ kiṃ dugdhaṃ kimāhriyamāṇaṃ kimadhiśritaṃ kimavajyotyamānaṃ kimadbhiḥ pratyānītaṃ kimudvāsyamānaṃ kimudvāsitaṃ kimunnīyamānaṃ kimunnītaṃ kimudyataṃ kiṃ hriyamāṇaṃ kiṃ nigṛhītam -

kāṃ samidhamādadhāsi/ kā pūrvā''hutiḥ kimupāsīṣadaḥ kimapaikṣiṣṭhāḥ kottarā''hutiḥ -

kiṃ hutvā prakampayasi kiṃ srucaṃ parimṛjya kūrce nyamārjīḥ kiṃ dvitīyaṃ parimṛjya dakṣiṇato hastamupāsīṣadaḥ kiṃ pūrvaṃ prāśīḥ kiṃ dvitīyaṃ kimutsṛpyāpāḥ kiṃ srucyapa ānīya niraukṣīḥ kiṃ dvitīyaṃ kiṃ tṛtīyametāṃ diśamudaukṣīḥ kiṃ jaghanenāhavanīyamapo nyanaiṣīḥ kiṃ samatiṣṭhipo yadi vā etadvidvānagnihotramahauṣīratha te hutaṃ yadyu vā avidvānahutameva ta iti -

sa hovāca/ iḍaiva me mānavyagnihotrī vāyavyo vatsaḥ sajūrupasṛṣṭā virāṭsaṃyojanamāśvinaṃ duhyamānaṃ vaiśvadevaṃ dugdhaṃ vāyavyamāhriyamāṇamāgneyamadhiśritamaindrāgnamavajyotyamānaṃ vāruṇamadbhiḥ pratyānītaṃ vāyavyamudvāsyamānaṃ dyāvāpṛthivyamudvāsitamāśvinamunnīyamānaṃ vaiśvadevamunnītaṃ mahādevāyodyataṃ vāyavyaṃ hriyamāṇaṃ vaiṣṇavaṃ nigṛhītam -

atha yāṃ samidhamādadhāmi/ āhutīnāṃ sā pratiṣṭhā yā pūrvā''hutirdevāṃstayā' praiṣaṃ yadupāsīṣadaṃ bārhaspatyaṃ tadyadapaikṣiṣīmañcāmuṃ ca lokau tena samadhāṃ yottarā''hutirmāṃ tayā svarge loke'dhām -

atha yaddhutvā prakampayāmi/ vāyavyaṃ tadyatsrucaṃ parimṛjya kūrce nyamārjiṣamoṣadhivanaspatīṃstenāpraiṣaṃ yaddvitīyaṃ parimṛjya dakṣiṇato hastamupāsīṣadaṃ pitṝṃstenāpraiṣaṃ yatpūrvaṃ prāśiṣaṃ māṃ tenāpraiṣaṃ yaddvitīyaṃ prajāṃ tenātha yadutsṛpyāpāṃ paśūṃstenāpraiṣaṃ yatsrucyapa ānīya niraukṣiṣaṃ sarpadevajanāṃstenāpraiṣaṃ yaddvitīyaṃ gandharvāpsarasastenātha yattṛtīyametāṃ diśamudaukṣiṣaṃ svargasya lokasya tena dvāraṃ vyavāriṣaṃ yajjaghanenāhavanīyamapo nyanaiṣamasmai lokāya tena vṛṣṭimadāṃ yatsamatiṣṭhipaṃ yatpṛthivyā ūnaṃ tattenāpūpuramityetannau bhagavantsaheti hovāca -

śauceyo jñaptaḥ/ prakṣyāmi tveva bhagavantamiti pṛcchaiva prācīnayogyeti sa hovāca yasminkāla uddhṛtāste'gnayaḥ syurupāvahṛtāni pātrāṇi hoṣyantsyā atha ta āhavanīyo'nugacchedvettha tadbhayaṃ yadatra juhvato bhavatīti vedeti hovāca purā'cirādasya jyeṣṭhaḥ putro mriyeta yasyaitadaviditaṃ syādvidyābhistvevāhamatāriṣamiti kiṃ viditaṃ kā prāyaścittiriti prāṇa udānamapyagāditi gārhapatya āhutiṃ juhuyāṃ saiva prāyaścittirna tadāgaḥ kurvīyetyetannau bhagavantsaheti hovāca -

śauceyo jñaptaḥ/ prakṣyāmi tveva bhagavantamiti pṛcchaiva prācīnayogyeti sa hovāca yatra ta etasminneva kāle gārhapatyo'nugacchedvettha tadbhayaṃ yadatra juhvato bhavatīti vedeti hovāca purā'cirādasya gṛhapatirmriyeta yasyaitadaviditaṃ syādvidyābhistvevāhamatāriṣamiti kiṃ viditaṃ kā prāyaścittirityudānaḥ prāṇamapyagādityāhavanīya āhutiṃ juhuyāṃ saiva prāyaścittirna tadāgaḥ kurvīyetyetannau bhagavantsaheti hovāca -

śauceyo jñaptaḥ/ prakṣyāmi tveva bhagavantamiti pṛcchaiva prācīnayogyeti sa hovāca yatra ta etasminneva kāle'nvāhāryapacano'nugacchedvettha tadbhayaṃ yadatra juhvato bhavatīti vedeti hovāca purā'cirādasya sarve paśavo mriyeranyasyaitadaviditaṃsyādvidyābhistvevāhamatāriṣamiti kiṃ viditaṃ kā prāyaścittiriti vyāna udānamapyagāditi gārhapatya āhutiṃ juhuyāṃ saiva prāyaścittirna tadāgaḥ kurvīyetyetannau bhagavantsaheti hovāca -

śauceyo jñaptaḥ/ prakṣyāmi tveva bhagavantamiti pṛcchaiva prācīnayogyeti sa hovāca yatra ta etasminneva kāle sarve'gnayo'nugaccheyurvettha tadbhayaṃ yadatra juhvato bhavatīti vedeti hovāca purā'cirādasyādāyādaṃ kulaṃ syādyasyaitadaviditaṃ syādvidyābhistvevāhamatāriṣamiti kiṃ viditaṃ kā prāyaścittiriti purā'cirādagnim
mathitvā yāṃ diśaṃ vāto vāyāttāṃ diśamāhavanīyamuddhṛtya vāyavyāmāhutiṃ juhuyāṃ sa vidyāṃ samṛddhaṃ me'gnihotraṃ sarvadevatyaṃ vāyuṃ hyeva sarvāṇi bhūtānyapiyanti vāyoḥ punarvisṛjyante saiva prāyaścittirna tadāgaḥ kurvīyetyetannau bhagavantsaheti hovāca -

śauceyo jñaptaḥ/ prakṣyāmi tveva bhagavantamiti pṛcchaiva prācīnayogyeti sa hovāca yatra ta etasminneva kāle nivāte sarve'gnayo'nugaccheyurvettha tadbhayaṃ yadatra juhvato bhavatīti vedeti hovācāpriyamevāsmiṃloke paśyetāpriyamamuṣminyasyaitadaviditaṃ syādvidyābhistvevāhamatāriṣamiti kiṃ viditaṃ kā prāyaścittiriti purā'cirādagniṃ mathitvā prāñcamāhavanīyamuddhṛtya jaghanenāhavanīyamupaviśyāhamevainatpibeyaṃ sa vidyāṃ samṛddhaṃ me'gnihotraṃ sarvadevatyaṃ brāhmaṇaṃ hyeva sarvāṇi bhūtānyapiyanti brāhmaṇātpunarvisṛjyante saiva prāyaścittirna tadāgaḥ kurvīyetyatha vā ahametannāvediṣamiti hovāca -

śauceyo jñaptaḥ/ imāni samitkāṣṭhānyupāyāni bhagavantamiti sa hovāca yadevaṃ nāvakṣyo mūrddhā te vyapatiṣyadehyupehīti tatheti taṃ hopaninye tasmai haitāṃ śokatarāṃ vyāhṛtimuvāca yatsatyaṃ tasmādu satyameva vadet -