Scripture Library

Shatapatha Brahmana · Chapter 11.5.2

11.5.2.11.5.2.1

prajāpatirha cāturmāsyairātmānaṃ vidadhe/ sa imameva dakṣiṇaṃ bāhuṃ vaiśvadevaṃ havirakuruta tasyāyamevāṅguṣṭha āgneyaṃ haviridaṃ saumyamidaṃ sāvitraṃ -

11.5.2.11.5.2.2

sa vai varṣiṣṭhaḥ puroḍāśo bhavati/ tasmādiyamāsāṃ varṣiṣṭhedaṃ sārasvatamidampauṣṇamatha ya eṣa upariṣṭāddhastasya saṃdhistanmārutamidaṃ vaiśvadevaṃ dordyāvāpṛthivīyaṃ tadvā aniruktaṃ bhavati tasmāttadaniruktam -

11.5.2.11.5.2.3

ayameva dakṣiṇa ūrurvaruṇapraghāsāḥ tasya yāni pañca havīṃṣi samāyīni tā imāḥ pañcāṅgulayaḥ kulphāvevaindrāgnaṃ havistadvai dvidevatyaṃ bhavati tasmādimau dvau kulphāvidaṃ vāruṇamidaṃ mārutamanūkaṃ kāyaṃ tadvā aniruktaṃ bhavati tasmāttadaniruktam -

11.5.2.11.5.2.4

mukhamevāsyānīkavatīṣṭiḥ/ mukhaṃ hi prāṇānāmanīkamuraḥ sāṃtapanīyorasā hi samiva tapyata udaraṃ gṛhamedhīyā pratiṣṭhā vā udaraṃ pratiṣṭhityā eva śiśnānyevāsya kraiḍinaṃ haviḥ śiśnairhi krīḍatīvāyamevāvāṅprāṇa ādityeṣṭiḥ -

11.5.2.11.5.2.5

ayamevottara ūrurmahāhaviḥ/ tasya yāni pañca havīṃṣi samāyīni tā imāḥ pañcāṅgulayaḥ kulphāvevaindrāgnaṃ havistadvai dvidevatyaṃ bhavati tasmādimau dvau kulphāvidaṃ māhendramidaṃ vaiśvakarmaṇaṃ tadvā aniruktaṃ bhavati tasmāttadaniruktamatha yadidamantarudare tatpitṛyajñastadvā aniruktaṃ bhavati tasmāttadaniruktam -

11.5.2.11.5.2.6

ayamevottaro bāhuḥ śunāsīrīyam/ tasya yāni pañca havīṃṣi samāyīni tā imāḥ pañcāṅgulayo'tha ya eṣa upariṣṭāddhastasya saṃdhistacchunāsīrīyamidaṃ vāyavyaṃ doḥ sauryaṃ tadvā aniruktaṃ bhavati tasmāttadaniruktam -

11.5.2.11.5.2.7

tāni vā etāni/ cāturmāsyāni triṣaṃdhīni dvisamastāni tasmādimāni puruṣasyāṅgāni triṣaṃdhīni dvisamastāni teṣāṃ vai caturṇāṃ dvayostrīṇi trīṇi havīṃṣyaniruktāni bhavanti dvedve dvayoḥ -

11.5.2.11.5.2.8

teṣāṃ vai caturṣvagniṃ manthanti tasmāccaturbhiraṅgairāyute dvayoḥ praṇayanti tasmāddvābhyāmetyevamu ha prajāpatiścāturmāsyairātmānaṃ vidadhe tatho evaivaṃvidyajamānaścāturmāsyairātmānaṃ vidhatte -

11.5.2.11.5.2.9

tadāhuḥ/ sarvagāyatraṃ vaiśvadevaṃ haviḥ syātsarvatraiṣṭubhaṃ varuṇapraghāsāḥ sarvajāgataṃ mahāhaviḥ sarvānuṣṭubhaṃ śunāsīrīyaṃ catuṣṭomasyāptyā iti tadu tathā na kuryādyattvā etānyabhisampadyante tenaivāsya sa kāma upāpto bhavati -

11.5.2.11.5.2.10

tāni vā etāni cāturmāsyāni dvāṣaṣṭāni trīṇi śatāni bṛhatyaḥ sampadyante tadebhiḥ saṃvatsaraṃ ca mahāvrataṃ cāpnotyatho dvipratiṣṭho vā ayaṃ yajamāno yajamānamevaitatsvarge loka āyātayati pratiṣṭhāpayati -

Original text: śatapathabrāhmaṇam · Sanskrit Wikisource contributors · Sanskrit Wikisource · CC BY-SA 4.0