Scripture Library

Shatapatha Brahmana · Chapter 11.5.1

11.5.1.11.5.1.1

urvaśī hāpsarāḥ/ purūravasamaiḍaṃ cakame taṃ ha vindamānovāca triḥ sma mā'hno vaitasena daṇḍena hatādakāmāṃ sma mā nipadyāsai mo sma tvā nagnaṃ darśameṣa vai na strīṇāmupacāra iti -

11.5.1.11.5.1.2

sā hāsmiñjyoguvāsa/ api hāsmādgarbhiṇyāsa tāvajjyogghāsminnuvāsa tato ha gandharvāḥ samūdire jyogvā iyamurvaśī manuṣyeṣvavātsīdupajānīta yatheyaṃ punarāgacchediti tasyai hāvirdvyuraṇā śayana upabaddhāsa tato ha gandharvā anyataramuraṇaṃ pramethuḥ -

11.5.1.11.5.1.3

sā hovāca/ avīra iva bata me'jana iva putraṃ harantīti dvitīyaṃ pramethuḥ sā ha tathaivovāca -

11.5.1.11.5.1.4

atha hāyamīkṣāṃ cakre/ kathaṃ nu tadavīraṃ kathamajanaṃ syādyatrāhaṃ syāmiti sa nagna evānūtpapāta ciraṃ tanmene yadvāsaḥ paryadhāsyata tato ha gandharvā vidyutaṃ janayāñcakrustaṃ yathā divaivaṃ nagnaṃ dadarśa tato haiveyaṃ tirobabhūva punaraimītyettirobhūtāṃ sa ādhyā jalpankurukṣetraṃ samayā cacārānyataḥ plakṣeti bisavatī tasyai hādhyantena vavrāja taddha tā apsarasa ātayo bhūtvā paripupluvire -

11.5.1.11.5.1.5

taṃ heyaṃ jñātvovāca/ ayaṃ vai sa manuṣyo yasminnahamavātsamiti tā hocustasmai vā āvirasāmeti tatheti tasmai hāvirāsuḥ -

11.5.1.11.5.1.6

tāṃ hāyaṃ jñātvābhiparovāda/ haye jāye manasā tiṣṭha ghore vacāṃsi miśrā kṛṇavāvahai nu/ na nau mantrā anuditāsa ete mayaskaranparatare ca nāhannityupa nu rama saṃ nu vadāvahā iti haivaināṃ taduvāca -

11.5.1.11.5.1.7

taṃ hetarā pratyuvāca/ kimetā vācā kṛṇavā tavāhaṃ prākramiṣamuṣasāmagriyeva/ purūravaḥ punarastaṃ parehi durāpanā vāta ivāhamasmīti na vai tvaṃ tadakaroryadahamabravaṃ durāpā vā ahaṃ tvayaitarhyasmi punargṛhānihīti haivainaṃ taduvāca -

11.5.1.11.5.1.8

atha hāyaṃ paridyūna uvāca/ sudevo adya prapatedanāvṛtparāvataṃ paramāṃ gantavā u/ adhā śayīta nirṛterupasthe'dhainaṃ vṛkā rabhasāso adyuriti sudevo'dyodvā badhnīta pra vā patettadenaṃ vṛkā vā śvāno vā'dyuriti haiva taduvāca -

11.5.1.11.5.1.9

taṃ hetarā pratyuvāca/ purūravo mā mṛthā mā prapapto mā tvā vṛkāso aśivāsa u kṣan/ na vai straiṇāni sakhyāni santi sālāvṛkāṇāṃ hṛdayānyeteti maitadādṛthā na vai straiṇaṃ sakhyamasti punargṛhānihīti haivainaṃ taduvāca -

11.5.1.11.5.1.10

yadvirūpācaram/ martyeṣvavasaṃ rātrīḥ śaradaścatasraḥ/ ghṛtasya stokaṃ sakṛdahna āśnāṃ tā devedaṃ tātṛpāṇā carāmīti tadetaduktapratyuktaṃ pañcadaśarcaṃ bahvṛcāḥ prāhustasyai ha hṛdayamāvyayāñcakāra -

11.5.1.11.5.1.11

sā hovāca/ saṃvatsaratamīṃ rātrimāgacchatāttanma ekāṃ rātrimante śayitāse jāta u te'yaṃ tarhi putro bhaviteti sa ha saṃvatsaratamīṃ rātrimājagāmeddhiraṇyavimitāni tato hainamekamūcuretatprapadyasveti taddhāsmai tāmupaprajighyuḥ -

11.5.1.11.5.1.12

sā hovāca/ gandharvā vai te prātarvaraṃ dātārastaṃ vṛṇāsā iti taṃ vai me tvameva vṛṇīṣveti yuṣmākamevaiko'sānīti brūtāditi tasmai ha prātargandharvā varaṃ daduḥ sa hovāca yuṣmākamevaiko'sānīti -

11.5.1.11.5.1.13

te hocuḥ/ na vai sā manuṣyeṣvagneryajñiyā tanūrasti yayeṣṭvāsmākamekaḥ syāditi tasmai ha sthālyāmopyāgniṃ pradaduraneneṣṭvā'smākameko bhaviṣyasīti taṃ ca ha kumāraṃ cādāyāvavrāja so'raṇya evāgniṃ nidhāya kumāreṇaiva grāmameyāya punaraimītyettirobhūtaṃ yo'gniraśvatthaṃ taṃ yā sthālī śamīṃ tāṃ sa ha punargandharvāneyāya -

11.5.1.11.5.1.14

te hocuḥ/ saṃvatsaraṃ cātuṣprāśyamodanaṃ paca sa etasyaivāśvatthasya tisrastisraḥ samidho ghṛtenānvajya samidvatībhirghṛtavatībhirṛgbhirabhyādhattātsa yastato'gnirjanitā sa eva sa bhaviteti -

11.5.1.11.5.1.15

te hocuḥ/ paro'kṣamiva vā etadāśvatthīmevottarāraṇiṃ kuruṣva śamīmayīmadharāraṇiṃ sa yastato'gnirjanitā sa eva sa bhaviteti -

11.5.1.11.5.1.16

te hocuḥ/ paro'kṣamiva vā etadāśvatthīmevottarāraṇiṃ kuruṣvāśvatthīmadharāraṇiṃ sa yastato'gnirjanitā sa eva sa bhaviteti -

11.5.1.11.5.1.17

sa āśvatthīmevottarāraṇiṃ cakre/ āśvatthīmadharāraṇiṃ sa yastato'gnirjajñe sa eva sa āsa teneṣṭvā gandharvāṇāmeka āsa tasmādāśvatthīmevottarāraṇiṃ kurvītāśvatthīmadharāraṇiṃ sa yastato'gnirjāyate sa eva sa bhavati teneṣṭvā gandharvāṇāmeko bhavati -

Original text: śatapathabrāhmaṇam · Sanskrit Wikisource contributors · Sanskrit Wikisource · CC BY-SA 4.0