શતપથબ્રાહ્મણમ્ · અધ્યાય 11.5.1

ઉર્વશી હાપ્સરાઃ। પુરૂરવસમૈડં ચકમે તં હ વિન્દમાનોવાચ ત્રિઃ સ્મ માઽહ્નો વૈતસેન દણ્ડેન હતાદકામાં સ્મ મા નિપદ્યાસૈ મો સ્મ ત્વા નગ્નં દર્શમેષ વૈ ન સ્ત્રીણામુપચાર ઇતિ -

સા હાસ્મિઞ્જ્યોગુવાસ। અપિ હાસ્માદ્ગર્ભિણ્યાસ તાવજ્જ્યોગ્ઘાસ્મિન્નુવાસ તતો હ ગન્ધર્વાઃ સમૂદિરે જ્યોગ્વા ઇયમુર્વશી મનુષ્યેષ્વવાત્સીદુપજાનીત યથેયં પુનરાગચ્છેદિતિ તસ્યૈ હાવિર્દ્વ્યુરણા શયન ઉપબદ્ધાસ તતો હ ગન્ધર્વા અન્યતરમુરણં પ્રમેથુઃ -

સા હોવાચ। અવીર ઇવ બત મેઽજન ઇવ પુત્રં હરન્તીતિ દ્વિતીયં પ્રમેથુઃ સા હ તથૈવોવાચ -

અથ હાયમીક્ષાં ચક્રે। કથં નુ તદવીરં કથમજનં સ્યાદ્યત્રાહં સ્યામિતિ સ નગ્ન એવાનૂત્પપાત ચિરં તન્મેને યદ્વાસઃ પર્યધાસ્યત તતો હ ગન્ધર્વા વિદ્યુતં જનયાઞ્ચક્રુસ્તં યથા દિવૈવં નગ્નં દદર્શ તતો હૈવેયં તિરોબભૂવ પુનરૈમીત્યેત્તિરોભૂતાં સ આધ્યા જલ્પન્કુરુક્ષેત્રં સમયા ચચારાન્યતઃ પ્લક્ષેતિ બિસવતી તસ્યૈ હાધ્યન્તેન વવ્રાજ તદ્ધ તા અપ્સરસ આતયો ભૂત્વા પરિપુપ્લુવિરે -

તં હેયં જ્ઞાત્વોવાચ। અયં વૈ સ મનુષ્યો યસ્મિન્નહમવાત્સમિતિ તા હોચુસ્તસ્મૈ વા આવિરસામેતિ તથેતિ તસ્મૈ હાવિરાસુઃ -

તાં હાયં જ્ઞાત્વાભિપરોવાદ। હયે જાયે મનસા તિષ્ઠ ઘોરે વચાંસિ મિશ્રા કૃણવાવહૈ નુ। ન નૌ મન્ત્રા અનુદિતાસ એતે મયસ્કરન્પરતરે ચ નાહન્નિત્યુપ નુ રમ સં નુ વદાવહા ઇતિ હૈવૈનાં તદુવાચ -

તં હેતરા પ્રત્યુવાચ। કિમેતા વાચા કૃણવા તવાહં પ્રાક્રમિષમુષસામગ્રિયેવ। પુરૂરવઃ પુનરસ્તં પરેહિ દુરાપના વાત ઇવાહમસ્મીતિ ન વૈ ત્વં તદકરોર્યદહમબ્રવં દુરાપા વા અહં ત્વયૈતર્હ્યસ્મિ પુનર્ગૃહાનિહીતિ હૈવૈનં તદુવાચ -

અથ હાયં પરિદ્યૂન ઉવાચ। સુદેવો અદ્ય પ્રપતેદનાવૃત્પરાવતં પરમાં ગન્તવા ઉ। અધા શયીત નિરૃતેરુપસ્થેઽધૈનં વૃકા રભસાસો અદ્યુરિતિ સુદેવોઽદ્યોદ્વા બધ્નીત પ્ર વા પતેત્તદેનં વૃકા વા શ્વાનો વાઽદ્યુરિતિ હૈવ તદુવાચ -

તં હેતરા પ્રત્યુવાચ। પુરૂરવો મા મૃથા મા પ્રપપ્તો મા ત્વા વૃકાસો અશિવાસ ઉ ક્ષન્। ન વૈ સ્ત્રૈણાનિ સખ્યાનિ સન્તિ સાલાવૃકાણાં હૃદયાન્યેતેતિ મૈતદાદૃથા ન વૈ સ્ત્રૈણં સખ્યમસ્તિ પુનર્ગૃહાનિહીતિ હૈવૈનં તદુવાચ -

યદ્વિરૂપાચરમ્। મર્ત્યેષ્વવસં રાત્રીઃ શરદશ્ચતસ્રઃ। ઘૃતસ્ય સ્તોકં સકૃદહ્ન આશ્નાં તા દેવેદં તાતૃપાણા ચરામીતિ તદેતદુક્તપ્રત્યુક્તં પઞ્ચદશર્ચં બહ્વૃચાઃ પ્રાહુસ્તસ્યૈ હ હૃદયમાવ્યયાઞ્ચકાર -

સા હોવાચ। સંવત્સરતમીં રાત્રિમાગચ્છતાત્તન્મ એકાં રાત્રિમન્તે શયિતાસે જાત ઉ તેઽયં તર્હિ પુત્રો ભવિતેતિ સ હ સંવત્સરતમીં રાત્રિમાજગામેદ્ધિરણ્યવિમિતાનિ તતો હૈનમેકમૂચુરેતત્પ્રપદ્યસ્વેતિ તદ્ધાસ્મૈ તામુપપ્રજિઘ્યુઃ -

સા હોવાચ। ગન્ધર્વા વૈ તે પ્રાતર્વરં દાતારસ્તં વૃણાસા ઇતિ તં વૈ મે ત્વમેવ વૃણીષ્વેતિ યુષ્માકમેવૈકોઽસાનીતિ બ્રૂતાદિતિ તસ્મૈ હ પ્રાતર્ગન્ધર્વા વરં દદુઃ સ હોવાચ યુષ્માકમેવૈકોઽસાનીતિ -

તે હોચુઃ। ન વૈ સા મનુષ્યેષ્વગ્નેર્યજ્ઞિયા તનૂરસ્તિ યયેષ્ટ્વાસ્માકમેકઃ સ્યાદિતિ તસ્મૈ હ સ્થાલ્યામોપ્યાગ્નિં પ્રદદુરનેનેષ્ટ્વાઽસ્માકમેકો ભવિષ્યસીતિ તં ચ હ કુમારં ચાદાયાવવ્રાજ સોઽરણ્ય એવાગ્નિં નિધાય કુમારેણૈવ ગ્રામમેયાય પુનરૈમીત્યેત્તિરોભૂતં યોઽગ્નિરશ્વત્થં તં યા સ્થાલી શમીં તાં સ હ પુનર્ગન્ધર્વાનેયાય -

તે હોચુઃ। સંવત્સરં ચાતુષ્પ્રાશ્યમોદનં પચ સ એતસ્યૈવાશ્વત્થસ્ય તિસ્રસ્તિસ્રઃ સમિધો ઘૃતેનાન્વજ્ય સમિદ્વતીભિર્ઘૃતવતીભિરૃગ્ભિરભ્યાધત્તાત્સ યસ્તતોઽગ્નિર્જનિતા સ એવ સ ભવિતેતિ -

તે હોચુઃ। પરોઽક્ષમિવ વા એતદાશ્વત્થીમેવોત્તરારણિં કુરુષ્વ શમીમયીમધરારણિં સ યસ્તતોઽગ્નિર્જનિતા સ એવ સ ભવિતેતિ -

તે હોચુઃ। પરોઽક્ષમિવ વા એતદાશ્વત્થીમેવોત્તરારણિં કુરુષ્વાશ્વત્થીમધરારણિં સ યસ્તતોઽગ્નિર્જનિતા સ એવ સ ભવિતેતિ -

સ આશ્વત્થીમેવોત્તરારણિં ચક્રે। આશ્વત્થીમધરારણિં સ યસ્તતોઽગ્નિર્જજ્ઞે સ એવ સ આસ તેનેષ્ટ્વા ગન્ધર્વાણામેક આસ તસ્માદાશ્વત્થીમેવોત્તરારણિં કુર્વીતાશ્વત્થીમધરારણિં સ યસ્તતોઽગ્નિર્જાયતે સ એવ સ ભવતિ તેનેષ્ટ્વા ગન્ધર્વાણામેકો ભવતિ -