Shatapatha Brahmana · Chapter 11.4.4

athāto haviṣaḥ samṛddhiḥ/ ṣaḍḍha vai brahmaṇo dvāro'gnirvāyurāpaścandramā vidyudādityaḥ -

sa ya upadagdhena haviṣā yajate agninā ha sa brahmaṇo dvāreṇa pratipadyate so'gninā brahmaṇo dvāreṇa pratipadya brahmaṇaḥ sāyujyaṃ salokatāṃ jayati -

atha yo vipatitena haviṣā yajate/ vāyunā ha sa brahmaṇo dvāreṇa pratipadyate sa vāyunā brahmaṇo dvāreṇa pratipadya brahmaṇaḥ sāyujyaṃ salokatāṃ jayati -

atha yo'śṛtena haviṣā yajate/ adbhirha sa brahmaṇo dvāreṇa pratipadyate so'dbhirbrahmaṇo dvāreṇa pratipadya brahmaṇaḥ sāyujyaṃ salokatāṃ jayati -

atha ya uparaktena haviṣā yajate/ candramasā ha sa brahmaṇo dvāreṇa pratipadyate sa candramasā brahmaṇo dvāreṇa pratipadya brahmaṇaḥ sāyujyaṃ salokatāṃ jayati -

atha yo lohitena haviṣā yajate/ vidyutā ha sa brahmaṇo dvāreṇa pratipadyate savidyutā brahmaṇo dvāreṇa pratipadya brahmaṇaḥ sāyujyaṃ salokatāṃ jayati -

atha yaḥ suśṛtena haviṣā yajate/ ādityena ha sa brahmaṇo dvāreṇa pratipadyate sa ādityena brahmaṇo dvāreṇa pratipadya brahmaṇaḥ sāyujyaṃ salokatāṃ jayati saiṣā haviṣaḥ samṛddhiḥ sa yo haivametāṃ haviṣaḥ samṛddhiṃ veda sarvasamṛddhena haivāsya haviṣeṣṭaṃ bhavati -

athāto yajñasya samṛddhiḥ/ yadvai yajñasya nyūnaṃ prajananamasya tadatha yadatiriktaṃ paśavyamasya tadatha yatsaṃkasukaṃ śriyā asya tadatha yatsampannaṃ svargyamasya tat -

sa yadi manyeta/ nyūnaṃ me yajñe'bhūditi prajananaṃ ma etatprajaniṣya ityeva tadupāsīta -

atha yadi manyeta atiriktaṃ me yajñe'bhūditi paśavyaṃ ma etatpaśumānbhaviṣyāmītyeva tadupāsīta -

atha yadi manyeta/ saṃkasukaṃ me yajñe'bhūditi śriyai ma etadā mā śrīstejasā yaśasā
brahmavarcasena parivṛtā gamiṣyatītyeva tadupāsīta -

atha yadi manyeta/ sampannaṃ me yajñe'bhūditi svargyaṃ ma etatsvargaloko bhaviṣyāmītyeva tadupāsīta saiṣā yajñasya samṛddhiḥ sa yo haivametāṃ yajñasya samṛddhiṃ veda sarvasamṛddhena haivāsya yajñeneṣṭaṃ bhavati -