Shatapatha Brahmana · Chapter 11.4.3

११.४.३ mitravindā iṣṭiḥ
prajāpatirvai prajāḥ sṛjamāno'tapyata / tasmācchrāntāttepānācchrīrudakrāmatsā dīpyamānā
bhrājamānā lelāyantyatiṣṭhattāṃ dīpyamānāṃ bhrājamānāṃ lelāyantīṃ devā abhyadhyāyan -

te prajāpatimabruvan hanāmemāmedamasyā dadāmahā iti sa hovāca strī vā eṣā yacchrīrna vai striyaṃ ghnantyuta tvā asyā jīvantyā evādadata iti -

tasyā agnirannādyamādatta somo rājyaṃ varuṇaḥ sāmrājyaṃ mitraḥ kṣatramindro balaṃ bṛhaspatirbrahmavarcasaṃ savitā rāṣṭraṃ pūṣā bhagaṃ sarasvatī puṣṭiṃ tvaṣṭā rūpāṇi -

sā prajāpatimabravīt ā vai ma idamadiṣateti sa hovāca yajñenainānpunaryācasveti -

saitāṃ daśahaviṣamiṣṭimapaśyat āgneyamaṣṭākapālaṃ puroḍāśaṃ saumyaṃ caruṃ vāruṇaṃ daśakapālaṃ puroḍāśaṃ maitraṃ carumaindramekādaśakapālaṃ puroḍāśaṃ bārhaspatyaṃ caruṃ sāvitraṃ dvādaśakapālaṃ vāṣṭākapālaṃ vā puroḍāśaṃ pauṣṇaṃ caruṃ sārasvataṃ caruṃ tvāṣṭraṃ daśakapālaṃ puroḍāśam -

tānetayānuvākyayā'nvavadat agniḥ somo varuṇo mitra' indro bṛhaspatiḥ savitā yaḥ
sahasrī/ pūṣā no gobhiravasā sarasvatī tvaṣṭā rūpāṇi samanaktu yajñairiti te pratyupātiṣṭhanta -

tānetayā yājyayā parastātpratilomaṃ pratyaittvaṣṭā rūpāṇi dadatī sarasvatī pūṣā bhagaṃ savitā me dadātu / bṛhaspatirdadadindro balaṃ me mitraṃ kṣatraṃ varuṇaḥ somo agniriti te punardānāyādhriyanta -

saitānupahomānapaśyat / agnirannādo'nnapatirannādyamasminyajñe mayi dadhātu svāhetyāhutimevādāyāgnirudakrāmatpunarasyā annādyamadadāt -

somo rājā rājapatiḥ rājyamasminyajñe mayi dadhātu svāhetyāhutimevādāya soma udakrāmatpunarasyai rājyamadadāt -

varuṇaḥ samrāṭsamrāṭpatiḥ sāmrājyamasminyajñe mayi dadhātu svāhetyāhutimevādāya varuṇa udakrāmatpunarasyai sāmrājyamadadāt -

mitraḥ kṣatraṃ kṣatrapatiḥ kṣatramasminyajñe mayi dadhātu svāhetyāhutimevādāya mitra' udakrāmatpunarasyai kṣatramadadāt -

indro balaṃ balapatiḥ balamasminyajñe mayi dadhātu svāhetyāhutimevādāyendra udakrāmatpunarasyai balamadadāt -

bṛhaspatirbrahma brahmapatiḥ brahmavarcasamasminyajñe mayi dadhātu svāhetyāhutimevādāya bṛhaspatirudakrāmatpunarasyai brahmavarcasamadadāt -

savitā rāṣṭraṃ rāṣṭrapatiḥ rāṣṭramasminyajñe mayi dadhātu svāhetyāhutimevādāya savitodakrāmatpunarasyai rāṣṭramadadāt -

pūṣā bhagaṃ bhagapatiḥ bhagamasminyajñe mayi dadhātu svāhetyāhutimevādāya pūṣodakrāmatpunarasyai bhagamadadāt -

sarasvatī puṣṭiṃ puṣṭipatiḥ puṣṭimasminyajñe mayi dadhātu svāhetyāhutimevādāya sarasvatyudakrāmatpunarasyai puṣṭimadadāt -

tvaṣṭā rūpāṇāṃ rūpakṛdrūpapatiḥ rūpeṇa paśūnasminyajñe mayi dadhātu svāhetyāhutimevādāya tvaṣṭodakrāmatpunarasyai rūpeṇa paśūnadadāt/ -

tā vā etāḥ/ daśa devatā daśa havīṃṣi daśāhutayo daśa dakṣiṇā daśaṃdaśinī virāṭchrīrvirāṭchriyāṃ haitadvirājyannādye pratitiṣṭhati/ -

tasyai pañcadaśa sāmidhenyo bhavanti upāṃśu devatā yajati pañca prayājā bhavanti trayo'nuyājā ekaṃ samiṣṭayajuḥ puṣṭimantāvājyabhāgāvagninā rayimaśnavatpoṣameva divedive yaśasaṃ vīravattamam gayasphāno amīvahā vasuvitpuṣṭivardhanaḥ sumitraḥ soma no bhaveti sahasravatyau saṃyājye nū no rāsva sahasravattokavatpuṣṭimadvasu dyumadagne suvīryaṃ varṣiṣṭhamanupakṣitam uta no brahmannaviṣa uktheṣu devahūtamaḥ / śaṃ naḥ śocā marudvṛdho'gne sahasrasātama iti -

tāṃ haitāṃ gotamo rāhūgaṇaḥ vidāṃ cakāra sā ha janakaṃ vaidehaṃ pratyutsasāda tāṃ hāṅgajidbrāhmaṇeṣvanviyeṣa tāmu ha yājñavalkye viveda sa hovāca sahasraṃ bho yājñavalkya dadmo yasminvayaṃ tvayi mitravindāmanvavidāmeti vindate mitraṃ rāṣṭramasya bhavatyapa punarmṛtyuṃ jayati sarvamāyureti ya evaṃ vidvānetayeṣṭyā yajate yo vaitadevaṃ veda -