Shatapatha Brahmana · Chapter 11.4.2

athātaḥ srucorādānasya/ taddhaitadeke kuśalā manyamānā dakṣiṇenaiva juhūmādadate savyenopabhṛtaṃ na tathā kuryādyo hainaṃ tatra brūyātpratipratiṃ nvā ayamadhvaryuryajamānasya dviṣantaṃ bhrātṛvyamakatpratyudyāminamitīśvaro ha tathaiva syāt -

itthameva kuryāt/ ubhābhyāmeva pāṇibhyāṃ juhūmparigṛhyopabhṛtyadhi nidadhyāttasya nopamīmāṃsāsti tatpaśavyamāyuṣyaṃ te asaṃśiñjayannādadīta yatsaṃśiñjayedayogakṣemo yajamānamṛcchettasmādasaṃśiñjayannādadīta -

athāto'tikramaṇasya/ vajreṇa ha vā anyo'dhvaryuryajamānasya paśūnvidhamati vajreṇa hāsmā anya upasamūhatyeṣa ha vā adhvaryurvajreṇa yajamānasya paśūnvidhamati ya āśrāvayiṣyandakṣiṇenātikrāmati savyenāśrāvyātha hāsmā eṣa upasamūhati ya āśrāvayiṣyantsavyenātikrāmati dakṣiṇenāśrāvyaiṣa hāsmā upasamūhati -

athāto dhāraṇasya/ taddhaitadeke kuśalā manyamānāḥ pragṛhya bāhū srucau dhārayanti na tathā kuryādyo hainaṃ tatra brūyācchūlau nvā ayamadhvaryurbāhū akṛta śūlabāhurbhaviṣyatītīśvaro ha tathaiva syādatha haiṣa madhyamaḥ prāṇastasmādu tamupanyacyevaiva dhārayet -

athāta āśrāvaṇasya/ ṣaḍu vā āśrāvitāni nyaktiryagūrdhvaṃ kṛpaṇaṃ bahiḥśryantaḥśri -

etaddha vai nyak/ yo'yamuccairādāya śanairnidadhāti sa yamicchetpāpīyāntsyāditi tasyoccairādāya śanairnidadhyāttena sa pāpīyānbhavati -

atha haitattiryak/ yo'yaṃ yāvataivādatte tāvatā nidadhāti sa yamicchennaiva śreyāntsyānna pāpīyāniti tasya yāvataivādadīta tāvatā nidadhyāttena sa naiva śreyānnapāpīyānbhavati -

atha haitadūrdhvam/ yo'yaṃ śanairādāyoccairnidadhāti sa yamicchecchreyāntsyāditi tasya śanairādāyoccairnidadhyāttena sa śreyānbhavati -

atha haitatkṛpaṇam/ yo'yamaṇu dīrghamasvaramāśrāvayati yo hainaṃ tatra brūyātkṛpaṇaṃ nvā ayamadhvaryuryajamānamakaddviṣato bhrātṛvyasyopāvasāyinamitīśvaro ha tathaiva syāt -

atha haitadbahiḥśri/ yo'yamapavyādāyauṣṭhā uccairasvaramāśrāvayati śrīrvai svaro bāhyata eva tacchriyaṃ dhatte'śanāyuko bhavati -

atha haitadantaḥśri/ yo'yaṃ saṃdhāyauṣṭhā uccaiḥ svaravadāśrāvayati śrīrvai svaro'ntarata eva tacchriyaṃ dhatte'nnādo bhavati -

sa vai mandramivorasi/ parāstabhyobhayato bārhatamuccairantato nidadhyāttasya nopamīmāṃsāsti tatpaśavyamāyuṣyam -

athāto homasya/ taddhaitadeke kuśalā manyamānāḥ prācīṃ srucamupāvahṛtya hutvā paryāhṛtyopabhṛtyadhinidadhati na tathā kuryādyo hainaṃ tatra brūyādanuyuvannvā ayamadhvaryuryajamānamakaddviṣato bhrātṛvyasyānvavasāyinamitīśvaro ha tathaiva syāt -

pārśvata u haike/ srucamupāvahṛtya hutvā paryāhṛtyopabhṛtyadhinidadhati na tathā kuryādyo hainaṃ tatra brūyādatīrthena nvā ayamadhvaryurāhutīḥ prārautsītsaṃ vā śariṣyate ghuṇirvā bhaviṣyatītīśvaro ha tathaiva syāt -

itthameva kuryāt/ prācīmeva srucamupāvahṛtya hutvā tenaivādhihṛtyopabhṛtyadhinidadhyāttasya nopamīmāṃsāsti tatpaśavyamāyuṣyam -

pradagdhāhutirha vā anyo'dhvaryuḥ/ āhutīrhānyaḥ saṃtarpayatyeṣa ha vai pradagdhāhutiradhvayuryo'yamājyaṃ hutvā'vadānāni juhotyetaṃ ha vai tadadṛśyamānā vāgabhyuvāda pradagdhāhutirvā ayamadhvaryurityatha hainā eṣa saṃtarpayati yo'yamājyaṃ hutvāvadānāni juhotyatha punarantata ājyenābhijuhotyeṣa haināḥ saṃtarpayati tāsāṃ saṃtṛptānāṃ devā hiraṇmayāṃścamasānpūrayante -

tadu hovāca yājñavalkyaḥ/ yadvā upastīryāvadāyābhighārayati tadevaināḥ saṃtarpayati tāsāṃ saṃtṛptānāṃ devā hiraṇmayāṃścamasānpūrayante'yasthūṇagṛhapatīnāṃ ha vai śaulbāyano'dhvaryurāsa -

sa hovāca/ idamahedaṃ sattraṃ kṛśapaśvalpājyamathāyaṃ gṛhapatirasmīti manyata iti -

sa hovāca/ adhvaryavā vai no'krukṣa ete vai te srucau ye tvaṃ saṃvatsaraṃ nāśaka ādātuṃ yadvai tvāhametayoranuśiṣyāṃ pra prajayā paśubhirjāyethā abhi svargaṃ lokaṃ vaheriti -

sa hovāca/ upa tvāyānīti sa hovācātra vāva khalvarhasi yo naḥ saṃvatsare'dhvaryurabhūranupetāyaiva ta enadbravāṇīti tasmā u haitadeva srucorādānamuvāca yadetadvyākhyāma tasmādevaṃvidamevādhvaryuṃ kurvīta nānevaṃvidam -