Shatapatha Brahmana · Chapter 11.4.1

uddālako hāruṇiḥ/ udīcyānvṛto dhāvayāñcakāra tasya niṣka upāhita āsaitaddha sma
vai tatpūrveṣāṃ vṛtānāṃ dhāvayatāmekadhanamupāhitaṃ bhavatyupavahlāya bibhyatāṃ tānhodīcyānāṃ brāhmaṇānbhīrviveda -

kaurupañcālo vā ayaṃ brahmā brahmaputraḥ/ yadvai no'yamarddhaṃ na paryādadīta hantainaṃ brahmodyamāhvayāmahā iti kena vīreṇeti svaidāyaneneti śaunako ha svaidāyana āsa -

te hocuḥ/ svaidāyana tvayā vīreṇemaṃ pratisaṃyatāmahā iti sa hovācopātra khalu ramatāhaṃ nvenaṃ vedānīti taṃ hābhiprapede taṃ hābhiprapannamabhyuvāda svaidāyanā३ iti ho३ gautamasya putretītaraḥ pratiśuśrāva taṃ ha tata eva praṣṭuṃ dadhre -

sa vai gautamasya putra vṛto janaṃ dhāvayet/ yo darśapūrṇamāsayoraṣṭau purastādājyabhāgānvidyātpañca madhyato havirbhāgānṣaṭprājāpatyānaṣṭā'upariṣṭādājyabhāgān -

sa vai gautamasya putra vṛto janaṃ dhāvayet/ yastaddarśapūrṇamāsayorvidyādyasmādimāḥ prajā adantakā jāyante yasmādāsāṃ jāyante yasmādāsāṃ prabhidyante yasmādāsāṃ saṃstiṣṭhante yasmādāsāṃ punaruttame vayasi sarva eva prabhidyante yasmādadhara evāgre jāyante'thottare yasmādaṇīyāṃsa evādhare prathīyāṃsa uttare yasmāddaṃṣṭrā varṣīyāṃso yasmātsamā eva jambhyāḥ -

sa vai gautamasya putra vṛto janaṃ dhāvayet/ yastaddarśapūrṇamāsayorvidyādyasmādimāḥ prajā lomaśā jāyante yasmādāsāṃ punariva śmaśrūṇyaupapakṣyāṇi durbīriṇāni jāyante yasmācchīrṣaṇyevāgre palitobhavatyatha punaruttame vayasi sarva eva palito bhavati -

sa vai gautamasya putra vṛto janaṃ dhāvayet/ yastaddarśapūrṇamāsayorvidyādyasmātkumārasya retaḥ siktaṃ na sambhavati yasmādasya madhyame vayasi sambhavati yasmādasya punaruttame vayasi na sambhavati -

yo gāyatrīṃ hariṇīm/ jyotiṣpakṣāṃ yajamānaṃ svargaṃ lokamabhivahantīṃ vidyāditi tasmai ha niṣkaṃ pradadāvanūcānaḥ svaidāyanāsi suvarṇaṃ vāva suvarṇavide dadatīti taṃ hopaguhya niścakrāma taṃ ha papracchuḥ kimivaiṣa gautamasya putro'bhūditi -

sa hovāca/ yathā brahmā brahmaputro mūrddhāsya vipatedya enamupavahleteti te ha tata eva vipreyustaṃ ha tata eva samitpāṇiḥ praticakramupa tvāyānīti kimadhyeṣyamāṇa iti yāneva mā praśnānaprākṣīstāneva me vibrūhīti sa hovācānupetāyaiva ta enānbravāṇīti -

tasmā u haitaduvāca/ dvāvāghārau pañca prayājā āgneya ājyabhāgo'ṣṭama ete'ṣṭau purastādājyabhāgāḥ saumya ājyabhāgo havirbhāgāṇāṃ prathamo havirhi soma āgneyaḥ puroḍāśo'gnīṣomīya upāṃśuyājo'gnīṣomīyaḥ puroḍāśo'gniḥ sviṣṭakṛdete pañca madhyato havirbhāgāḥ -

prāśitraṃ ceḍā ca/ yaccāgnīdha ādadhāti brahmabhāgo yajamānabhāgo'nvāhārya ete ṣaṭ prājāpatyāstrayo'nuyājāścatvāraḥ patnīsaṃyājāḥ samiṣṭayajuraṣṭamamete'ṣṭā upariṣṭādājyabhāgāḥ -

atha yadapuro'nuvākyakāḥ prayājā bhavanti/ tasmādimāḥ prajā adantakā jāyante'tha yatpuro'nuvākyavanti havīṃṣi bhavanti tasmādāsāṃ jāyante'tha yadapuro'nuvākyakā anuyājā bhavanti tasmādāsāṃ prabhidyante'tha yatpuro'nuvākyavantaḥ patnīsaṃyājā bhavanti tasmādāsāṃ saṃtiṣṭhante'tha yadapuro'nuvākyakaṃ samiṣṭayajurbhavati tasmādāsāṃ punaruttame vayasi sarva eva prabhidyante -

atha yadanuvākyāmanūcya/ yājyayā yajati tasmādadhara evāgre jāyante'thottare'tha yadgāyatrīmanūcya triṣṭubhā yajati tasmādaṇīyāṃsa evādhare prathīyāṃsa uttare'tha yatprāñcāvāghārāvāghārayati tasmāddaṃṣṭrā varṣīyāṃso'tha yatsacchandasāveva saṃyājye bhavatastasmātsamā eva jambhyāḥ -

atha yadbarhi stṛṇāti/ tasmādimāḥ prajā lomaśā jāyante'tha yatpunariva prastaraṃ stṛṇāti tasmādāsāṃ punariva śmaśrūṇyaupapakṣyāṇi durbīriṇāni jāyante'tha yatkevalamevāgre prastaramanupraharati tasmācchīrṣaṇyevāgre palito bhavatyatha yatsarvameva barhiranupraharati tasmātpunaruttame vayasi sarva eva palito bhavati -

atha yadājyahaviṣaḥ prayājā bhavanti/ tasmātkumārasya retaḥ siktaṃ na sambhavatyudakamivaiva bhavatyudakamiva hyājyamatha yanmadhye yajñasya dadhnā puroḍāśeneti yajanti tasmādasya madhyame vayasi sambhavati drapsīvaiva bhavati drapsīva hi reto'tha yadājyahaviṣa evānuyājā bhavanti tasmādasya punaruttame vayasi na sambhavatyudakamivaiva bhavatyudakamiva hyājyam -

vedireva gāyatrī/ tasyai ye'ṣṭau purastādājyabhāgāḥ sa dakṣiṇaḥ pakṣo ye'ṣṭā upariṣṭādājyabhāgāḥ sa uttaraḥ pakṣaḥ saiṣā gāyatrī hariṇī jyotiṣpakṣā yajamānaṃ svargaṃ lokamabhivahati ya evametadveda -