Shatapatha Brahmana · Chapter 11.2.7

saṃvatsaro yajñaḥ/ sa yo ha vai saṃvatsaro yajña iti vedānte haivāsya saṃvatsarasyeṣṭaṃ bhavatyatho yatkiṃ ca saṃvatsare kriyate sarvaṃ haivāsya tadāptamavaruddhamabhijitaṃ bhavati -

ṛtava ṛtvijaḥ/ sa yo ha vā ṛtava ṛtvija iti vedānte haivāsyartūnāmiṣṭaṃ bhavatyatho yatkiṃ cartuṣu kriyate sarvaṃ haivāsya tadāptamavaruddhamabhijitaṃ bhavati -

māsā havīṃṣi/ sa yo ha vai māsā havīṃṣīti vedānte haivāsya māsānāmiṣṭaṃ bhavatyatho yatkiṃ ca māseṣu kriyate sarvaṃ haivāsya tadāptamavaruddhamabhijitaṃ bhavati -

ardhamāsā haviṣpātrāṇi/ sa yo ha vā ardhamāsā haviṣpātrāṇīti vedānte haivāsyārdhamāsānāmiṣṭaṃ bhavatyatho yatkiṃ cārdhamāseṣu kriyate sarvaṃ haivāsya tadāptamavaruddhamabhijitaṃ bhavati -

ahorātre pariveṣṭrī/ sa yo ha vā ahorātre pariveṣṭrī iti vedānte haivāsyāhorātrayoriṣṭaṃ bhavatyatho yatkiṃ cāhorātrayoḥ kriyate sarvaṃ haivāsya tadāptamavaruddhamabhijitaṃ bhavati -

iyameva prathamā sāmidhenī/ agnirdvitīyā vāyustṛtīyāntarikṣaṃ caturthī dyauṣpañcamyādityaḥ ṣaṣṭhī candramāḥ saptamī mano'ṣṭamī vāṅnavamī tapo daśamī brahmaikādaśyetā hi vā idaṃ sarvaṃ samindhata etābhiridaṃ sarvaṃ samiddhaṃ tasmātsāmidhenyo nāma -

sa vai triḥ prathamāmanvāha/ sa yatprathamamanvāha prācīṃ tena diśaṃ jayati yaddvitīyaṃ dakṣiṇāṃ tena diśaṃ jayati yattṛtīyamūrdhvāmeva tena diśaṃ jayati -

trirvevottamāmanvāha/ sa yatprathamamanvāha pratīcīṃ tena diśaṃ jayati yaddvitīyamudīcīṃ tena diśaṃ jayati yattṛtīyamimāmeva tena pratiṣṭhāṃ jayatyevamu hābhirimāṃllokānjayatyetā diśaḥ -

ṛtameva pūrva āghāraḥ/ satyamuttaro'va ha vā ṛtasatye runddhe'tho yatkiṃcartasatyābhyāṃ jayyaṃ sarvaṃ haiva tajjayati -

tviṣireva prathamaḥ prayājaḥ/ apacitirdvitīyo yaśastṛtīyo brahmavarcasaṃ caturtho'nnādyaṃ pañcamaḥ -

sa prathamaṃ prayājamanumantrayate/ tviṣimānbhūyāsamityapacitimānbhūyāsamiti dvitīyaṃ yaśasvī bhūyāsamiti tṛtīyaṃ brahmavarcasī bhūyāsamiti caturthamannādo bhūyāsamiti pañcamaṃ tviṣimānha vā apacitimānyaśasvī brahmavarcasyannādo bhavati ya evametadveda -

etaddha sma vai tadvidvānāha/ śvetaketurāruṇeyaḥ kaṃ svidevāparīṣu mahānāgamivābhisaṃsāraṃ didṛkṣitāro ya evametatprayājānāṃ yaśo vediteti -

bhūtameva pūrva ājyabhāgaḥ/ bhaviṣyaduttaro'va ha vai bhūtaṃ ca bhaviṣyacca runddhe'tho yatkiṃ ca bhūtena ca bhaviṣyatā ca jayyaṃ sarvaṃ haiva tajjayati -

brahmāgneyaḥ puroḍāśaḥ/ sa yo ha vai brahmāgneyaḥ puroḍāśa iti vedāva ha brahma runddhe'tho yatkiṃ ca brahmaṇā jayyaṃ sarvaṃ haiva tajjayati -

kṣatramupāṃśuyājaḥ/ sa yo ha vai kṣatramupāṃśuyāja iti vedāva ha kṣatraṃ runddhe'tho yatkiṃ ca kṣatreṇa jayyaṃ sarvaṃ haiva tajjayati tadyadupāṃśuyājaṃ kurvantyeke naike tasmāduccaiścopāṃśu ca kṣatrāyācakṣate -

viḍuttaraḥ puroḍāśaḥ/ sa yo ha vai viḍuttaraḥ puroḍāśa iti vedāva ha viśaṃ runddhe'tho yatkiṃ ca viśā jayyaṃ sarvaṃ haiva tajjayati tadyadāgneyaśca puroḍāśa upāṃśuyājaśca pūrvau bhavatastasmādubhe brahma ca kṣatraṃ ca viśi pratiṣṭhite -

rāṣṭraṃ sāṃnāyyaṃ/ sa yo ha vai rāṣṭraṃ sāṃnāyyamiti vedāva ha rāṣṭraṃ runddhe'tho yatkiṃ ca rāṣṭreṇa jayyaṃ sarvaṃ haiva tajjayati tadyatsaṃnayantyekenaike tasmādrāṣṭraṃ saṃ caiti vi ca -

tapaḥ sviṣṭakṛt/ sa yo ha vai tapaḥ sviṣṭakṛditi vedāva ha tapo runddhe'tho yatkiṃ ca tapasā jayyaṃ sarvaṃ haiva tajjayati -

lokaḥ prāśitraṃ/ sa yo ha vai lokaḥ prāśitramiti vedāva ha lokaṃ runddhe'tho yatkiṃ ca lokena jayyaṃ sarvaṃ haiva tajjayati no ha lavena lokādvyathate lavena ha vā amuṣmiṃloke lokādvyathante'tha ya evaṃ veda na ha bahu cana pāpaṃ kṛtvā lokādvyathate -

śraddheḍā/ sa yo ha vai śraddheḍeti vedāva ha śraddhāṃ runddhe'tho yatkiṃ ca śraddhayā jayyaṃ sarvaṃ haiva tajjayati -

aśanireva prathamo'nuyājaḥ/ hrādunirdvitīya ulkuṣī tṛtīyaḥ -

sa prathamamanuyājamanumantrayeta/ aśanyamuṃ jahīti yaṃ dviṣyāddhrādunyamuṃ jahīti dvitīyamulkuṣyamuṃ jahīti tṛtīyam -

sa ya eṣa kṣipraṃ mriyate/ aśanirha tamanuyājo hantyatha yo visravanmiśra iva hrādunirha tamanuyājo hantyatha yo'bhyuṣṭamiśra ivolkuṣī ha tamanuyājo hanti -

saiṣā yajñameniḥ/ etayā vai menyā devā asurānparābhāvayāṃcakrustatho evaivaṃvidyajamānaḥ pāpmānaṃ dviṣantaṃ bhrātṛvyaṃ parābhāvayati -

sa yadanuyājānto yajñaḥ syāt/ aśanyantaḥ syāddhrādunyanta ulkuṣyantastasmādvai devānāṃ yajña iḍānto vaiva śaṃyvanto vā -

prayājairvai devāḥ svargaṃ lokamāyaṃstānasurā anvājigāṃsaṃstānanuyājaiḥ pratyauhaṃstadyadanuyājā ijyante pāpmānameva taddviṣantaṃ bhrātṛvyaṃ yajamānaḥ pratyūhati -

prāṇā vai prayājāḥ/ apānā anuyājāstasmātprayājāḥ prāñco hūyante taddhi prāṇarūpam / pratyañco'nuyājāstadapānarūpametā ha vai darśapūrṇamāsayorupasado yadanuyājāstasmātta upasadrūpeṇa pratyañco hūyante -

saṃsthā sūktavākaḥ/ sa yo ha vai saṃsthā sūktavāka iti vedāva ha saṃsthāṃ runddhe'tho yatkiṃ ca saṃsthayā jayyaṃ sarvaṃ haiva tajjayati gacchati vayasaḥ saṃsthām -

pratiṣṭhā śaṃyorvākaḥ/ sa yo ha vai pratiṣṭhā śaṃyorvāketi vedāva ha pratiṣṭhāṃ runddhe'tho yatkiṃ ca pratiṣṭhayā jayyaṃ sarvaṃ haiva tajjayati gacchati pratiṣṭhām -

te devāḥ/ etānpatnīsaṃyājānpaścātparyauhanta mithunamevaitadupariṣṭādadadhata prajātyai tadyatpatnīsaṃyājā ijyante mithunamevaitadupariṣṭāddhatte prajātyai devānāṃ ha vai prajātimanu prajāyate mithunena mithunena ha prajāyate ya evametadveda -

annaṃ samiṣṭayajuḥ/ sa yo ha vā annaṃ samiṣṭayajuriti vedāva hānnaṃ runddhe'tho yatkiṃ cānnena jayyaṃ sarvaṃ haiva tajjayati -

saṃvatsaro yajamānaḥ/ tamṛtavo yājayanti vasanta āgnīdhrastasmādvasante dāvāścaranti taddhyagnirūpaṃ grīṣmo'dhvaryustapta iva vai grīṣmastaptamivādhvaryurniṣkrāmati varṣā udgātā tasmādyadā balavadvarṣati sāmna ivopabdiḥ kriyate śaradbrahmā tasmādyadā sasyaṃ pacyate brahmaṇvatyaḥ prajā ityāhurhemanto hotā tasmāddhemanvaṣaṭkṛtāḥ paśavaḥ sīdantyetā ha vā enaṃ devatā yājayanti sa yadyenamaiṣāvīrā yājayeyuretā eva devatā manasā dhyāyedetā haivainaṃ devatā yājayanti -

atha haiṣaiva tulā/ yaddakṣiṇo vedyantaḥ sa yatsādhu karoti tadantarvedyatha yadasādhu tadbahirvedi tasmāddakṣiṇaṃ vedyantamadhispṛśyevāsīta tulāyāṃ ha vā amuṣmiṃloka ādadhati yataradyaṃsyati tadanveṣyati yadi sādhu vāsādhu vetyatha ya evaṃ vedāsminhaiva loke tulāmārohatyatyamuṣmiṃloke tulādhānaṃ mucyate sādhukṛtyā haivāsya yacchati na pāpakṛtyā -