Shatapatha Brahmana · Chapter 11.2.5

११.२.५.
api ha vā etarhi/ devebhyo'śvamedhamālabhante tadāhuḥ prākṛto'śvamedha itītara innūnaṃ sa tadvā eṣa evāśvamedho yaccandramāḥ -

tadāhuḥ/ padepade'śvaśya medhyasyāhutiṃ juhvatīti sa yatsāyaṃprātaragnihotraṃ juhoti dve sāyamāhutī juhoti dve prātastāścatasra āhutyaścatuṣpādvā aśvastadasya pade pada evāhutirhutā bhavati -

tadāhuḥ/ vivṛtte'śvasyeṣṭiṃ nirvapatītyeṣa vai somo rājā devānāmannaṃ yaccandramāḥ sa yatraiṣa etāṃ rātriṃ na purastānna paścāddadṛśe tadimaṃ lokamāgacchati so'smiṃloke vivartate -

sa yadāmāvāsyena yajate/ vivṛtta evāsyaitadiṣṭiṃ nirvapatyatha yatpaurṇamāsena yajate'śvamedhamevaitadālabhate tamālabhya devebhyaḥ prayacchati saṃvatsare vā itaramaśvamedhamālabhanta eṣa vai māsaḥ pariplavamānaḥ saṃvatsaraṃ karoti tadasya saṃvatsare saṃvatsara evāśvamedha ālabdho bhavati -

taṃ vā etam/ māsimāsyevāśvamedhamālabhante sa yo haivaṃ vidvānagnihotraṃ ca juhoti darśapūrṇamāsābhyāṃ ca yajate māsimāsi haivāsyāśvamedheneṣṭaṃ bhavatyetadu hāsyāgnihotraṃ ca darśapūrṇamāsau cāśvamedhamabhisampadyete -