Scripture Library

Shatapatha Brahmana · Chapter 11.2.4

11.2.4.11.2.4.1

eṣa vai pūrṇamāḥ/ ya eṣa tapatyaharaharhyevaiṣa pūrṇo'thaiṣa eva darśo yaccandramā dṛdṛśa iva hyeṣaḥ -

11.2.4.11.2.4.2

atho itarathā''huḥ/ eṣa eva pūrṇamā yaccandramā etasya hyanu pūraṇaṃ paurṇamāsītyācakṣate'thaiṣa eva darśo ya eṣa tapati dadṛśa iva hyeṣaḥ -

11.2.4.11.2.4.3

iyameva pūrṇamāḥ/ pūrṇeva hīyamasāveva dyaurdarśo dadṛśa iva hyasau dyauḥ -

11.2.4.11.2.4.4

rātrireva pūrṇamāḥ/ pūrṇeva hīyaṃ rātrirahareva darśo dadṛśa iva hīdamahareṣā nu devatrā darśapūrṇamāsayormīmāṃsā -

11.2.4.11.2.4.5

athādhyātmam/ udāna eva pūrṇamā udānena hyayaṃ puruṣaḥ pūryata iva prāṇa eva darśo dadṛśa iva hyayaṃ prāṇastadetāvannādaścānnapradaśca darśapūrṇamāsau -

11.2.4.11.2.4.6

prāṇa evānnādaḥ/ prāṇena hīdamannamadyata udāna evānnaprada udānena hīdamannaṃ pradīyate sa yo haitāvannādaṃ cānnapradaṃ ca darśapūrṇamāsau vedānnādo haiva bhavati pra hāsmā annādyaṃ dīyate -

11.2.4.11.2.4.7

mana eva pūrṇamāḥ/ pūrṇamiva hīdaṃ mano vāgeva darśo dadṛśa iva hīyaṃ vāktadetāvadhyātmaṃ pratyakṣaṃ darśapūrṇamāsau sa yadupavasathe vratopāyanīyamaśnāti tenaitāvadhyātmaṃ pratyakṣaṃ darśapūrṇamāsau prīṇāti yajñena prātardevau -

11.2.4.11.2.4.8

tadāhuḥ/ yanna pūrṇamāsāyeti havirgṛhyate na darśāyeti havirgṛhyate na pūrṇamāsāyānubrūhi na darśāyānubrūhi na pūrṇamāsaṃ yaja na darśaṃ yajetyatha kenāsya darśapūrṇamāsāviṣṭau bhavata iti sa yaṃ manasa āghārayati mano vai pūrṇamāstena pūrṇamāsaṃ yajatyatha yaṃ vāca āghārayati vāgvai darśasteno darśaṃ yajatyeteno hāsya darśapūrṇamāsāviṣṭau bhavataḥ -

11.2.4.11.2.4.9

taddhaike carū nirvapanti/ paurṇamāsyāṃ sarasvate'māvāsyāyāṃ sarasvatyā etatpratyakṣaṃ darśapūrṇamāsau yajāmaha iti vadantastadu tathā na kuryānmano vai sarasvānvāksarasvatī sa yadevaitāvāghārāvāghārayati tadevāsya darśapūrṇamāsāviṣṭau bhavatastasmādetau carū na nirvapet -

11.2.4.11.2.4.10

tadāhuḥ/ āgūrtī vā eṣa bhavati yo darśapūrṇamāsābhyāṃ yajate paurṇamāsena hīṣṭvā vedāmāvāsyena yakṣya ityāmāvāsyeneṣṭvā veda punaḥ paurṇamāsena yakṣya iti sa āgūrtyevāmuṃ lokameti yadāmuṃ lokameti kathamanāgūrtī bhavatīti sa yadevaitā ubhayatrāghārāvāghārayati tadevāsya darśapūrṇamāsau saṃtiṣṭhete sa saṃsthitayoreva darśapūrṇamāsayorathāmuṃ lokameti tathānāgūrtī bhavati -

Original text: śatapathabrāhmaṇam · Sanskrit Wikisource contributors · Sanskrit Wikisource · CC BY-SA 4.0