શતપથબ્રાહ્મણમ્ · અધ્યાય 11.2.5

૧૧.૨.૫.
અપિ હ વા એતર્હિ। દેવેભ્યોઽશ્વમેધમાલભન્તે તદાહુઃ પ્રાકૃતોઽશ્વમેધ ઇતીતર ઇન્નૂનં સ તદ્વા એષ એવાશ્વમેધો યચ્ચન્દ્રમાઃ -

તદાહુઃ। પદેપદેઽશ્વશ્ય મેધ્યસ્યાહુતિં જુહ્વતીતિ સ યત્સાયંપ્રાતરગ્નિહોત્રં જુહોતિ દ્વે સાયમાહુતી જુહોતિ દ્વે પ્રાતસ્તાશ્ચતસ્ર આહુત્યશ્ચતુષ્પાદ્વા અશ્વસ્તદસ્ય પદે પદ એવાહુતિર્હુતા ભવતિ -

તદાહુઃ। વિવૃત્તેઽશ્વસ્યેષ્ટિં નિર્વપતીત્યેષ વૈ સોમો રાજા દેવાનામન્નં યચ્ચન્દ્રમાઃ સ યત્રૈષ એતાં રાત્રિં ન પુરસ્તાન્ન પશ્ચાદ્દદૃશે તદિમં લોકમાગચ્છતિ સોઽસ્મિંલોકે વિવર્તતે -

સ યદામાવાસ્યેન યજતે। વિવૃત્ત એવાસ્યૈતદિષ્ટિં નિર્વપત્યથ યત્પૌર્ણમાસેન યજતેઽશ્વમેધમેવૈતદાલભતે તમાલભ્ય દેવેભ્યઃ પ્રયચ્છતિ સંવત્સરે વા ઇતરમશ્વમેધમાલભન્ત એષ વૈ માસઃ પરિપ્લવમાનઃ સંવત્સરં કરોતિ તદસ્ય સંવત્સરે સંવત્સર એવાશ્વમેધ આલબ્ધો ભવતિ -

તં વા એતમ્। માસિમાસ્યેવાશ્વમેધમાલભન્તે સ યો હૈવં વિદ્વાનગ્નિહોત્રં ચ જુહોતિ દર્શપૂર્ણમાસાભ્યાં ચ યજતે માસિમાસિ હૈવાસ્યાશ્વમેધેનેષ્ટં ભવત્યેતદુ હાસ્યાગ્નિહોત્રં ચ દર્શપૂર્ણમાસૌ ચાશ્વમેધમભિસમ્પદ્યેતે -