Scripture Library

Shatapatha Brahmana · Chapter 11.2.3

11.2.3.11.2.3.1

brahma vā idamagra āsīt/ taddevānasṛjata taddevāntsṛṣṭvaiṣu lokeṣu vyārohayadasminneva loke'gniṃ vāyumantarikṣe divyeva sūryam -

11.2.3.11.2.3.2

atha ye'tha ūrdhvā lokāḥ/ tadyā ata ūrdhvā devatāsteṣu tā devatā vyārohayatsa yathā haivema āvirlokā imāśca devatā evamu haiva ta āvirlokāstāśca devatā yeṣu tā devatā vyārohayat -

11.2.3.11.2.3.3

atha brahmaiva parārddhamagacchat/ tatparārddhaṃ gatvaikṣata kathaṃnvimāṃllokānpratyaveyāmiti taddvābhyāmeva pratyavaidrūpeṇa caiva nāmnā ca sa yasya kasya ca nāmāsti tannāma yasyo api nāma nāsti yadveda rūpeṇedaṃ rūpamiti tadrūpametāvadvā idaṃ yāvadrūpaṃ caiva nāma ca -

11.2.3.11.2.3.4

te haite brahmaṇo mahatī abhve/ sa yo haite brahmaṇo mahatī abhve veda mahaddhaivābhvaṃ bhavati -

11.2.3.11.2.3.5

te haite brahmaṇo mahatī yakṣye/ sa yo haite brahmaṇo mahatī yakṣye veda mahaddhaiva yakṣyaṃ bhavati tayoranyatarajjyāyo rūpameva yaddhyapi nāma rūpameva tatsa yo haitayorjyāyo veda jyāyānha tasmādbhavati yasmājjyāyānbubhūṣati -

11.2.3.11.2.3.6

martyā ha vā agre devā āsuḥ/ sa yadaiva te brahmaṇā''purathāmṛtā āsuḥ sa yaṃ manasa āghārayati mano vai rūpaṃ manasā hi vededaṃ rūpamiti tena rūpamāpnotyatha yaṃ vāca āghārayati vāgvai nāma vācā hi nāma gṛhṇāti teno nāmāpnotyetāvadvā idaṃ sarvaṃ yāvadrūpaṃ caiva nāma ca tatsarvamāpnoti sarvaṃ vā akṣayyameteno hāsyākṣayyaṃ sukṛtaṃ bhavatyakṣayyo lokaḥ -

11.2.3.11.2.3.7

tadvā ada āgneyyāmiṣṭā udyate/ yathā tadṛṣibhyo yajñaḥ prārocata taṃ yathā'tanvata tadyajñaṃ tanvānānṛṣīngandharvā upaniṣeduste ha sma saṃnidadhatīdaṃ vā atyarīricannidamūnamakranniti sa yadaiṣāṃ yajñaḥ saṃtasthe'thaināṃstaddarśayāṃcakruridaṃ vā atyarīricatedamūnamakarteti -

11.2.3.11.2.3.8

sa yadatirecayāṃcakruḥ/ yathā girirevaṃ tadāsātha yadūnaṃ cakruryathā śvabhrāḥ pradarā evaṃ tadāsa -

11.2.3.11.2.3.9

sa yatra śaṃyorāha/ tadabhimṛśati yajña namaśca ta upa ca yajñasya śive saṃtiṣṭhasva sviṣṭe me saṃtiṣṭhasveti sa yadatirecayati tannamaskāreṇa śamayatyatha yadūnaṃ karotyupa ceti tena tadanyūnaṃ bhavati yajñasya śive saṃtiṣṭhasveti yadvai yajñasyānyūnātiriktaṃ tacchivaṃ tena tadubhayaṃ śamayati sviṣṭe me saṃtiṣṭhasveti yadvai yajñasyānyūnātiriktaṃ tatsviṣṭaṃ teno tadubhayaṃ śamayatyevamu hāsyaitena yajñenānyūnātiriktenaiveṣṭaṃ bhavati ya evaṃ vidvānevamabhimṛśati tasmādevamevābhimṛśette ha te gandharvā āsuḥ śūrpaṃ yavamānkṛṣirudvālavāndhānāntarvān -

Original text: śatapathabrāhmaṇam · Sanskrit Wikisource contributors · Sanskrit Wikisource · CC BY-SA 4.0