Scripture Library

Shatapatha Brahmana · Chapter 11.1.5

11.1.5.11.1.5.1

११.१.५ darśayāge paścāccaṃdradarśane trihaviṣkā abhyuditeṣṭiḥ (prāyaścitteṣṭiḥ)
adyāmāvāsyeti manyamāna upavasati/ athaiṣa paścāddadṛśe sa haiṣa divyaḥ śvā sa yajamānasya paśūnabhyavekṣate tadapaśavyaṃ syādaprāyaścittikṛta etasmāduhaitadbhīṣā'vacandramasāditi -

11.1.5.11.1.5.2

chāyāmupasarpanti/ eteno haitadupatapadācakṣate śvalucitamityetamu haivaitadācakṣate -

11.1.5.11.1.5.3

śaśaścāndramasa iti/ candramā vai somo devānāmannaṃ taṃ paurṇamāsyāmabhiṣuṇvanti so'parapakṣe'pa oṣadhīḥ praviśati paśavo vā apa oṣadhīradanti tadenametāṃ rātrīṃ paśubhyaḥ saṃnayati -

11.1.5.11.1.5.4

so'dyāmāvāsyeti manyamāna upavasati/ athaiṣa paścāddadṛśe tadyajamāno yajñapathādeti tadāhuḥ kathaṃ kuryāditvā yajñapathādyajetā३ na yajetā३ iti yajeta haiva na hyanyadapakramaṇaṃ bhavati śvaḥ śva evaiṣa jyāyānudeti saāmāvāsyavidhenaiveṣṭvā'theṣṭimanunirvapati tadaharvaiva śvo vā -

11.1.5.11.1.5.5

tasyai trīṇi havīṃṣi bhavanti agnaye pathikṛte'ṣṭākapālaṃ puroḍāśamindrāya vṛtraghna ekādaśakapālamagnaye vaiśvānarāya dvādaśakapālaṃ puroḍāśam -

11.1.5.11.1.5.6

sa yadagnaye pathikṛte nirvapati agnirvai pathaḥ kartā sa yasmādevādo yajamāno yajñapathādeti tamenamagniḥ panthānamāpādayati -

11.1.5.11.1.5.7

atha yadindrāya vṛtraghne/ pāpmā vai vṛtro yo bhūtervārayitvā tiṣṭhati kalyāṇātkarmaṇaḥ sādhostametadindreṇaiva vṛtraghnā pāpmānaṃ vṛtraṃ hanti tasmādindrāya vṛtraghne -

11.1.5.11.1.5.8

atha yadagnaye vaiśvānarāya dvādaśakapālaṃ puroḍāśaṃ nirvapati yatra vā indro vṛtramahaṃstamagninā vaiśvānareṇa samadahattadasya sarvaṃ pāpmānaṃ samadahattatho evaiṣa etadindreṇaiva vṛtraghnā pāpmānaṃ vṛtraṃ hatvā tamagninā vaiśvānareṇa saṃdahati tadasya sarvaṃ pāpmānaṃ saṃdahati sa yo haivaṃvidvānetayeṣṭyā yajate na hāsyālpaścana pāpmā pariśiṣyate -

11.1.5.11.1.5.9

tasyai saptadaśa sāmidhenyo bhavanti upāṃśu devatā yajati yāḥ kāmayate tā yājyānuvākyāḥ karotyevamājyabhāgāvevaṃ saṃyājye -

11.1.5.11.1.5.10

tisṛdhanvaṃ dakṣiṇāṃ dadāti dhanvanā vai śvānaṃ bādhante tadetamevaitadbādhate yattisṛdhanvaṃ dakṣiṇāṃ dadāti -

11.1.5.11.1.5.11

daṇḍaṃ dakṣiṇāṃ dadāti/ daṇḍena vai śvānaṃ bādhante tadetamevaitadbādhate yaddaṇḍaṃ dakṣiṇāṃ dadātyeṣā nvādiṣṭā dakṣiṇā dadyāttvevāsyāmapyanyadyā itarā dakṣiṇāstāsāṃ yatsampadyeta sā haiṣā paśavyeṣṭistayā'pyanabhyuddṛṣṭo yajetaiva -

Original text: śatapathabrāhmaṇam · Sanskrit Wikisource contributors · Sanskrit Wikisource · CC BY-SA 4.0