શતપથબ્રાહ્મણમ્ · અધ્યાય 11.1.5

૧૧.૧.૫ દર્શયાગે પશ્ચાચ્ચંદ્રદર્શને ત્રિહવિષ્કા અભ્યુદિતેષ્ટિઃ (પ્રાયશ્ચિત્તેષ્ટિઃ)
અદ્યામાવાસ્યેતિ મન્યમાન ઉપવસતિ। અથૈષ પશ્ચાદ્દદૃશે સ હૈષ દિવ્યઃ શ્વા સ યજમાનસ્ય પશૂનભ્યવેક્ષતે તદપશવ્યં સ્યાદપ્રાયશ્ચિત્તિકૃત એતસ્માદુહૈતદ્ભીષાઽવચન્દ્રમસાદિતિ -

છાયામુપસર્પન્તિ। એતેનો હૈતદુપતપદાચક્ષતે શ્વલુચિતમિત્યેતમુ હૈવૈતદાચક્ષતે -

શશશ્ચાન્દ્રમસ ઇતિ। ચન્દ્રમા વૈ સોમો દેવાનામન્નં તં પૌર્ણમાસ્યામભિષુણ્વન્તિ સોઽપરપક્ષેઽપ ઓષધીઃ પ્રવિશતિ પશવો વા અપ ઓષધીરદન્તિ તદેનમેતાં રાત્રીં પશુભ્યઃ સંનયતિ -

સોઽદ્યામાવાસ્યેતિ મન્યમાન ઉપવસતિ। અથૈષ પશ્ચાદ્દદૃશે તદ્યજમાનો યજ્ઞપથાદેતિ તદાહુઃ કથં કુર્યાદિત્વા યજ્ઞપથાદ્યજેતા૩ ન યજેતા૩ ઇતિ યજેત હૈવ ન હ્યન્યદપક્રમણં ભવતિ શ્વઃ શ્વ એવૈષ જ્યાયાનુદેતિ સઆમાવાસ્યવિધેનૈવેષ્ટ્વાઽથેષ્ટિમનુનિર્વપતિ તદહર્વૈવ શ્વો વા -

તસ્યૈ ત્રીણિ હવીંષિ ભવન્તિ અગ્નયે પથિકૃતેઽષ્ટાકપાલં પુરોડાશમિન્દ્રાય વૃત્રઘ્ન એકાદશકપાલમગ્નયે વૈશ્વાનરાય દ્વાદશકપાલં પુરોડાશમ્ -

સ યદગ્નયે પથિકૃતે નિર્વપતિ અગ્નિર્વૈ પથઃ કર્તા સ યસ્માદેવાદો યજમાનો યજ્ઞપથાદેતિ તમેનમગ્નિઃ પન્થાનમાપાદયતિ -

અથ યદિન્દ્રાય વૃત્રઘ્ને। પાપ્મા વૈ વૃત્રો યો ભૂતેર્વારયિત્વા તિષ્ઠતિ કલ્યાણાત્કર્મણઃ સાધોસ્તમેતદિન્દ્રેણૈવ વૃત્રઘ્ના પાપ્માનં વૃત્રં હન્તિ તસ્માદિન્દ્રાય વૃત્રઘ્ને -

અથ યદગ્નયે વૈશ્વાનરાય દ્વાદશકપાલં પુરોડાશં નિર્વપતિ યત્ર વા ઇન્દ્રો વૃત્રમહંસ્તમગ્નિના વૈશ્વાનરેણ સમદહત્તદસ્ય સર્વં પાપ્માનં સમદહત્તથો એવૈષ એતદિન્દ્રેણૈવ વૃત્રઘ્ના પાપ્માનં વૃત્રં હત્વા તમગ્નિના વૈશ્વાનરેણ સંદહતિ તદસ્ય સર્વં પાપ્માનં સંદહતિ સ યો હૈવંવિદ્વાનેતયેષ્ટ્યા યજતે ન હાસ્યાલ્પશ્ચન પાપ્મા પરિશિષ્યતે -

તસ્યૈ સપ્તદશ સામિધેન્યો ભવન્તિ ઉપાંશુ દેવતા યજતિ યાઃ કામયતે તા યાજ્યાનુવાક્યાઃ કરોત્યેવમાજ્યભાગાવેવં સંયાજ્યે -

તિસૃધન્વં દક્ષિણાં દદાતિ ધન્વના વૈ શ્વાનં બાધન્તે તદેતમેવૈતદ્બાધતે યત્તિસૃધન્વં દક્ષિણાં દદાતિ -

દણ્ડં દક્ષિણાં દદાતિ। દણ્ડેન વૈ શ્વાનં બાધન્તે તદેતમેવૈતદ્બાધતે યદ્દણ્ડં દક્ષિણાં દદાત્યેષા ન્વાદિષ્ટા દક્ષિણા દદ્યાત્ત્વેવાસ્યામપ્યન્યદ્યા ઇતરા દક્ષિણાસ્તાસાં યત્સમ્પદ્યેત સા હૈષા પશવ્યેષ્ટિસ્તયાઽપ્યનભ્યુદ્દૃષ્ટો યજેતૈવ -