Shatapatha Brahmana · Chapter 11.1.4

११.१.४ naimittikī trihaviṣkā abhyudayeṣṭiḥ
taddhaike dṛṣṭvopavasanti/ śvo nodetetyabhrasya vā hetoranirjñāya vā'thotopavasantyathainamutābhyudeti sa yadyagṛhītaṃ havirabhyudiyātprajñātameva tadeṣaiva vratacaryā yatpūrvedyurdugdhaṃ dadhi havirātañcanaṃ tatkurvanti prati pramuñcanti vatsāṃstānpunarapākurvanti -

tānaparāhṇe parṇaśākhayāpākaroti/ tadyathaivādaḥ prajñātamāmāvāsyaṃ havirevameva tadyadyu vratacaryāṃ vā nodāśaṃseta gṛhītaṃ vā havirabhyudiyāditaratho tarhi kuryādetāneva taṇḍulāntsuphalīkṛtānkṛtvā sa ye'ṇīyāṃsastānagnaye dātre'ṣṭākapālaṃ puroḍāśaṃ śrapayati -

atha yatpūrvedyuḥ dugdhaṃ dadhi tadindrāya pradātre'tha tadānīṃ dugdhe viṣṇave śipiviṣṭāyaitāṃstaṇḍulāñchṛte caruṃ śrapayati caruru hyeva sa yatra kva ca taṇḍulānāvapati -

tadyadevaṃ bhavati/ eṣa vai somo rājā devānāmannaṃ yaccandramāstametadupaitsīttamapārātsīttamasmā agnirdātā dadātīndraḥ pradātā prayacchati tamasmā indrāgnī yajñaṃ dattastenendrāgnibhyāṃ dattena yajñena yajate'tha yadviṣṇave śipiviṣṭāyeti yajño vai viṣṇuratha yacchipiviṣṭāyeti yamupaipsīttamapārātsīttacchipitamiva yajñasya bhavati tasmācchipiviṣṭāyeti tatro yacchaknuyāttaddadyānnādakṣiṇaṃ haviḥ syāditi hyāhuratha yadaiva nodiyādathopavaset -