Shatapatha Brahmana · Chapter 10.5.5

kuśrirha vājaśravaso'gniṃ cikye/ taṃ hovāca suśravāḥ kauśyo gautama yadagnimacaiṣīḥ prāñcamenamacaiṣīḥ pratyañcamenamacaiṣīrnyañcamenamacaiṣīruttānamenamacaiṣīḥ -

yadyahainaṃ prāñcamacaiṣīḥ yathā parāca āsīnāya pṛṣṭhato'nnādyamupāharettādṛktanna te haviḥ pratigrahīṣyati -

yadyu vā enaṃ pratyañcamacaiṣīḥ kasmādasya tarhi paścātpucchamakārṣīḥ -

yadyu vā enaṃ nyañcamacaiṣīḥ yathā nīcaḥ śayānasya pṛṣṭhe'nnādyaṃ pratiṣṭhāpayettādṛktannaiva te haviḥ pratigrahīṣyati -

yadyu vā enamuttānamacaiṣīḥ/ na vā uttānaṃ vayaḥ svargaṃ lokamabhivahati na tvā svargaṃ lokamabhivakṣyatyasvargya u te bhaviṣyatīti -

sa hovāca prāñcamenamacaiṣaṃ pratyañcamenamacaiṣaṃ nyañcamenamacaiṣamuttānamenamacaiṣaṃ sarvā anu diśa enamacaiṣamiti -

sa yatprāñcaṃ puruṣamupadadhāti/ prācyau srucau tatprāṅcīyate'tha yatpratyañcaṃ kūrmamupadadhāti pratyañci paśuśīrṣāṇi tatpratyaṅcīyate'tha yannyañcaṃ kūrmamupadadhāti nyañci paśuśīrṣāṇi nīcīriṣṭakāstannyaṅcīyate'tha yaduttānaṃ puruṣamupadadhātyuttāne srucā uttānamulūkhalamuttānāmukhāṃ taduttānaścīyate'tha yatsarvā anu diśaḥ parisarpamiṣṭakā upadadhāti tatsarvataścīyate -

atha ha koṣā dhāvayantaḥ/ nirūḍhaśirasamagnimupādhāvayāṃñcakrusteṣāṃ haika uvāca śrīrvai śiraḥ śriyamasya nirauhītsarvajyāniṃ jyāsyata iti sa ha tathaivāsa -

atha haika uvāca/ prāṇā vai śiraḥ prāṇānasya nirauhītkṣipre'muṃ lokameṣyatīti sa u ha tathaivāsa -

ūrdhvo vā eṣa etaccīyate/ yaddarbhastambo logeṣṭakāḥ puṣkaraparṇaṃ rukmapuruṣau srucau svayamātṛṇṇā dūrveṣṭakā dviyajū retaḥsicau viśvajyotirṛtavye'aṣāḍhā kūrmo'tha hāsyaitadeva pratyakṣatamāṃ śiro yaścite'gnirnidhīyate tasmānna nirūhet -