Shatapatha Brahmana · Verses 10.3-6

prāṇo gāyatrī cakṣuruṣṇigvāganuṣṭummano bṛhatī śrotraṃ paṅktirya evāyaṃ prajananaḥ prāṇa eṣa triṣṭubatha yo'yamavāṅprāṇa eṣa jagatī tāni vā etāni sapta chandāṃsi caturuttarāṇyagnau kriyante -

prāṇo gāyatrīti tadya eva prāṇasya mahimā yadvīryaṃ tadetatsahasraṃ prāṇasyaivaitadvīryaṃ yaddhyasya cinvataḥ prāṇa utkrāmettata evaiṣo'gnirna cīyetaitenaivāsya rūpeṇa sahasrameṣa gāyatrīḥ saṃcito bhavati -

cakṣuruṣṇigiti tadya eva cakṣuṣo mahimā yadvīryaṃ tadetatsahasraṃ cakṣuṣa evaitadvīryaṃ yaddhyasya cinvataścakṣurutkrāmettata evaiṣo'gnirna cīyetaitenaivāsya rūpeṇa sahasrameṣa uṣṇihaḥ saṃcito bhavati -

vāganuṣṭubiti tadya eva vāco mahimā yadvīryaṃ tadetatsahasraṃ vāca evaitadvīryaṃ yaddhyasya cinvato vāgutkrāmettata evaiṣo'gnirna cīyetaitenaivāsya rūpeṇa sahasrameṣo'nuṣṭubhaḥ saṃcito bhavati -

mano bṛhatīti tadya eva manaso mahimā yadvīryaṃ tadetatsahasraṃ manasa evaitadvīryaṃ yaddhyasya cinvato mana utkrāmettata evaiṣo'gnirna cīyetaitenaivāsya rūpeṇa sahasrameṣa bṛhatīḥ saṃcito bhavati -

śrotraṃ paṅktiriti tadya eva śrotrasya mahimā yadvīryaṃ tadetatsahasraṃ śrotrasyaivaitadvīryaṃ yaddhyasya cinvataḥ śrotramutkrāmettata evaiṣo'gnirna cīyetaitenaivāsya rūpeṇa sahasrameṣa paṅktīḥ saṃcito bhavati -

ya evāyaṃ prajananaḥ prāṇaḥ eṣa triṣṭubiti tadya evaitasya prāṇasya mahimā yadvīryaṃ tadetatsahasrametasyaivaitatprāṇasya vīryaṃ yaddhyasya cinvata eṣa prāṇa ālubhyettata evaiṣo'gnirna cīyetaitenaivāsya rūpeṇa sahasrameṣa triṣṭubhaḥ saṃcito bhavati -

atha yo'yamavāṅprāṇaḥ/ eṣa jagatīti tadya evaitasya prāṇasya mahimā yadvīryaṃ tadetatsahasrametasyaivaitatprāṇasya vīryaṃ yaddhyasya cinvata eṣa prāṇa ālubhyettata evaiṣo'gnirna cīyetaitenaivāsya rūpeṇa sahasrameṣa jagatīḥ saṃcito bhavati -

tāni vā etāni sapta cchandāṃsi caturuttarāṇyanyo'nyasminpratiṣṭhitāni sapteme puruṣe prāṇā anyo'nyasminpratiṣṭhitāstadyāvantamevaṃvicchandasāṃ gaṇamanvāha cchandasaśchandaso haivāsya so'nūkto bhavati stuto vā śasto vopahito vā -